بۇگىن قازاقستاندا اتوم ەلەكتر ستانسياسىن سالۋ بويىنشا رەسپۋبليكالىق رەفەرەندۋم باستالدى. تاڭەرتەڭنەن بەرى الماتىلىقتار بەلسەندى تۇردە داۋىس بەرىپ جاتىر، كەيبىر سايلاۋ ۋچاسكەلەرىندە ۇزىن-سونار كەزەكتەر بايقالۋدا.
بۇل ازاماتتاردىڭ قوعامدىق ماسەلەلەرگە دەگەن قىزىعۋشىلىعى مەن بەلسەندىلىگىنىڭ جوعارى ەكەنىن كورسەتەدى.
الماتىنىڭ ناۋرىزباي اۋدانىنداعى سايلاۋ ۋچاسكەلەرىنە كەلگەن قارت كىسىلەر تاريحي ساتتە تەك داۋىس بەرىپ قانا قويماي، جاستارعا باتا بەرىپ، ەل بولاشاعىنا دەگەن ۇمىتتەرىن ءبىلدىردى. ولار ءاربىر ازاماتتىڭ تاڭداۋى ەلدىڭ دامۋىنا قوسقان ماڭىزدى ۇلەس ەكەنىن اتاپ ءوتتى.
«بۇگىن ءبىز ماڭىزدى ماسەلە بويىنشا ءوز پىكىرىمىزدى ءبىلدىرىپ، جاستارىمىزدىڭ جارقىن بولاشاعىنا ۇمىتتەنەمىز»، – دەدى داۋىس بەرۋشىلەردىڭ ءبىرى.
رەفەرەندۋمعا تانىمال قوعامدىق قايراتكەرلەر، سپورتشىلار، جانە ارتيستەر دە قاتىسىپ جاتىر. الماتى اكىمى ەربولات دوسايەۆ جۇبايىمەن بىرگە №48 مەكتەپ-ليسەيىندەگى №388 سايلاۋ ۋچاسكەسىنە بارىپ، العاشقى داۋىس بەرۋشىلەردىڭ ءبىرى بولدى.
الماتى قالاسىندا 624 سايلاۋ ۋچاسكەسى جۇمىس ىستەپ تۇر. قالا تۇرعىندارى تۇرعىلىقتى مەكەنجايى بويىنشا سايلاۋ ۋچاسكەلەرىنە بارىپ، ساعات 20.00-گە دەيىن داۋىس بەرە الادى.