الماتىدا تاڭەرتەڭنەن باستاپ سايلاۋ ۋچاسكەلەرىنىڭ بىرىنە بىردەن ءتورت تۋعان كۇن يەسى كەلدى. بارلىعى ەلىمىزدە اتوم ەلەكتر ستانسياسىن (اەس) سالۋ ماسەلەسى بويىنشا داۋىس بەرۋۋدى ۇيعارعان.
«ءبىزدىڭ ۋچاسكەدە 2 123 سايلاۋشى تىركەلگەن، مۇندا تاڭنان بەرى بەلسەندىلىك بايقالادى. ءتورت تۋعان كۇن يەسى داۋىس بەردى»، - دەدى ءى.جانسۇگىروۆ اتىنداعى №130 گيمنازيادا ورنالاسقان №165 ۋچاسكەلىك كوميسسيانىڭ ءتوراعاسى ءاليا قاسقىربايەۆا.
ەستەرىڭىزگە سالا كەتەيىك، بۇگىن بۇكىل ەل بويىنشا اەس سالۋ ماسەلەسى بويىنشا رەسپۋبليكالىق رەفەرەندۋم ءوتىپ جاتىر.
الماتىدا بارلىعى 624 سايلاۋ ۋچاسكەسى جۇمىس ىستەيدى، ولار 20.00-گە دەيىن اشىق. الماتى اكىمى ەربولات دوسايەۆ جۇبايىمەن بىرگە تاڭەرتەڭ №48 مەكتەپ-ليسەيىندە ورنالاسقان №388 سايلاۋ ۋچاسكەسىنە بارىپ، داۋىس بەردى.