الماتىدا رەسپۋبليكا كۇنىنە ارنالعان اۋقىمدى «جاناشىر جۇرەك» اكسياسى باستالدى. ءىس-شارا قالالىق ەرىكتىلەر فرونت-كەڭسەسىنىڭ باستاماسىمەن جانە جاستار ساياساتى باسقارماسىنىڭ قولداۋىمەن وتكىزىلىپ جاتىر.
16-25 قازان ارالىعىندا اكسيا اياسىندا 20-دان استام ءتۇرلى ءىس-شارا ۇيىمداستىرىلۋدا. سولاردىڭ قاتارىندا «Qamqor bol» ءۇيسىز جاندارعا ىستىق شاي مەن تاعام تاراتۋ، قارتتار ۇيىندە شىعارماشىلىق كەش وتكىزۋ، اشىق اسپان استىنداعى J-FEST كونسەرتى، جاستار پىكىرسايىس ءتۋرنيرى جانە الەۋمەتتىك نىسانداردى تازالاۋ مەن اباتتاندىرۋعا ارنالعان «الەۋمەتتىك شەبەرحانا» اكسياسى بار. سونىمەن قاتار Republic Day اتتى ونلاين چەللەندج ىسكە قوسىلىپ، بەلسەندى جاستار مەن بلوگەرلەر يگى ءىسىن ايتىپ، قالا تۇرعىندارىن مەرەكەمەن قۇتتىقتاپ جاتىر.
«الماتىلىق ەرىكتىلەر ىزگىلىكتىڭ – ۋاقىتشا ناۋقان ەمەس، ءومىر سالتى ەكەنىن كورسەتىپ كەلەدى. «جاناشىر جۇرەك» – بالالار ۇيلەرىنە، قارتتار ۇيىنە كومەك كورسەتەتىن، ەكولوگيالىق جانە الەۋمەتتىك جوبالار ۇيىمداستىراتىن، از قامتىلعان وتباسىلارعا قولداۋ بىلدىرەتىن جاستاردى بىرىكتىرەتىن داستۇرگە اينالدى. ءبىز الماتىدان باستاۋ العان مەيىرىم تولقىنىنىڭ وزگە وڭىرلەرگە دە شابىت بەرىپ جاتقانىنا قۋانىشتىمىز»، – دەدى قالالىق جاستار ساياساتى باسقارماسىنىڭ باسشىسى ازيز كاجدەنبەك.
الداعى كۇندەرى «جاناشىر جۇرەك» اكسياسى اياسىندا ەكولوگيالىق سەنبىلىك Eco Day، قان ورتالىعىمەن بىرلەسە وتەتىن قان تاپسىرۋ اكسياسى، سونداي-اق ەلىمىزدىڭ تانىمال تۇلعالارى تۋرالى بەينەروليكتەر توپتاماسىن قامتيتىن «Elge qyzmet» جوباسى جۇزەگە اسپاق. بۇعان قوسا، بالالار ءۇيى تاربيەلەنۋشىلەرى اراسىندا سپارتاكيادا جانە پاتريوتتىق باعىتتاعى زياتكەرلىك ويىن Almaly Night ۇيىمداستىرىلادى. بارلىق ءىس-شارا الماتىلىق جاستاردىڭ ازاماتتىق بەلسەندىلىگىن ارتتىرۋعا، مەيىرىمدىلىك مادەنيەتى مەن الەۋمەتتىك جاۋاپكەرشىلىكتى قالىپتاستىرۋعا باعىتتالعان.
«رەسپۋبليكا كۇنىنە ارنالعان «جاناشىر جۇرەك» اكسياسى جاستاردىڭ قوعامدىق بەلسەندىلىگىن ارتتىرۋعا جانە ەرىكتىلىك مادەنيەتىن دامىتۋعا باعىتتالعان كەشەندى باستامالاردىڭ ءبىرى. رەسپۋبليكا كۇنى – تاۋەلسىز ەلىمىزدىڭ بەرىك ىرگەتاسىن قالاعان ۇلىق مەرەكە. ايتۋلى مەرەكەگە وراي قولعا الىنعان يگى ىستەر جاستاردىڭ پاتريوتتىق رۋحىن كۇشەيتىپ، ەل دامۋىنا ۇلەس قوسۋعا ىنتالاندىرادى. ءبىز الماتىلىق ەرىكتىلەردىڭ بەلسەندىلىگىن، قوعام يگىلىگى ءۇشىن جاساپ جاتقان ناقتى ىستەرىن جوعارى باعالايمىز»، – دەدى «QAMQOR CHARITY» قوعامدىق قورىنىڭ ءتورايىمى باعدات اناربايەۆا.