كيپردەن كەلگەن جانكۇيەرلەر الماتىنىڭ سۇلۋلىعىنا ءتانتى بولىپ، «قايرات» كلۋبىنىڭ جەيدەسىن ساتىپ الدى. بۇگىن ورتالىق ستاديوندا وتەتىن الماتىلىق «قايرات» پەن كيپرلىك «پافوس» اراسىنداعى ماڭىزدى كەزدەسۋ الدىندا ستاديون ماڭىندا قىزۋ دايىندىق ءجۇرىپ جاتىر، - دەپ حابارلايدى اqshamnews.kz ءتىلشىسى.
قۇقىق قورعاۋ قىزمەتكەرلەرى مەن ۆولونتەرلەرمەن قاتار، ستاديون اۋماعىندا ەكى كوماندانىڭ جانكۇيەرلەرى دە جينالىپ جاتىر. ءوز كومانداسىن قولداۋ ءۇشىن الماتىعا كيپردان دا شەتەلدىك جانكۇيەرلەر كەلدى.
كيپرلىك جانكۇيەرلەر ديميتريس استروس پەن پەرەكليس زاۆريديس الماتىدا العاش رەت ەكەنىن ايتىپ، قالانىڭ قوناقجايلىعى مەن تازالىعىنا، اسەمدىگىنە ەرەكشە اسەر العاندارىن جەتكىزدى. ماچ الدىندا ولار «قايرات» فۋتبول كلۋبىنىڭ فيرمالىق دۇكەنىنە كىرىپ، كادەسىيلار ساتىپ العان. ولاردىڭ ءبىرى الماتىلىق كلۋبتىڭ جەيدەسىن ەستەلىك ءارى قۇرمەت بەلگىسى رەتىندە العانىن ايتتى.
"ءبىز الماتىدا العاش رەتپىز، بۇل قالا ءبىزدى تاڭعالدىردى. مۇندا وتە ادەمى، تازا ءارى ادامدار مەيىرىمدى. مەن "پافوستىڭ“ جەڭىسىنە سەنەمىن، ءبىراق "قايرات“ تا مىقتى قارسىلاس. ءتىپتى سىزدەردىڭ تاۋلارىڭىزعا دا بارىپ ۇلگەردىم. ۇمىتىلماس اسەر قالدىردى!" - دەدى ديميتريس استروس.
ال پەرەكليس زاۆريديس الماتىنى زاماناۋي ءارى سپورتتى سۇيەتىن قالا رەتىندە سيپاتتاپ، مۇنداعى ەرەكشە اتموسفەرانى اتاپ ءوتتى:
"بۇرىن "قايرات“ جايلى كوپ بىلە بەرمەيتىنمىن، ءبىراق كلۋب چەمپيوندار ليگاسىنا شىققاننان كەيىن قىزىعۋشىلىعىم ارتتى. بۇگىن ادەمى ويىن كۇتەمىن. الماتى - تازا، جايلى جانە وتە جىلى قالا ەكەن"،- دەدى جانكۇيەر.
الداعى ماچ تەك سپورتتىق باسەكە ەمەس، ءتۇرلى ەلدىڭ جانكۇيەرلەرىن بىرىكتىرەتىن مەرەكەلىك شارا بولماق. الماتى تاعى دا سپورت ارقىلى دوستىق پەن حالىقارالىق ىنتىماقتاستىقتىڭ قالاسى ەكەنىن دالەلدەپ وتىر.