الماتىدا قاتەرلى ىسىككە شالدىققاندار ءولىمى ازايدى

الماتىدا قاتەرلى ىسىكتەن بولاتىن ءولىم ازايىپ كەلەدى. 2025 جىلدىڭ العاشقى التى ايىنىڭ قورىتىندىسى بويىنشا بۇل كورسەتكىش 100 مىڭ تۇرعىنعا شاققاندا 60،2 جاعدايدى قۇرادى. بۇل – ەل بويىنشا ەڭ ۇزدىك ناتيجەلەردىڭ ءبىرى جانە 2019 جىلمەن سالىستىرعاندا 30 پايىزعا تومەن.

مۇنداي وڭ ديناميكاعا ەرتە دياگنوستيكا مەن «جاسىل ءدالىز» قاعيداتتارىن قاتاڭ ۇستانۋ سەپ بولدى. ونكولوگيالىق قىزمەت پەن العاشقى مەديسينالىق-سانيتاريالىق كومەك (مساك) ۇيىمدارىنىڭ بىرلەسكەن جۇمىسىنىڭ ارقاسىندا اۋرۋدى ەرتە كەزەڭدە انىقتاۋ كورسەتكىشى ايتارلىقتاي وسكەن.

ماسەلەن، 2019 جىلى وبىردىڭ 0–I-كەزەڭدە انىقتالۋ ۇلەسى 33،6% بولسا، 2025 جىلدىڭ ورتاسىندا بۇل كورسەتكىش 39،9%-عا جەتتى. بۇل دا – قازاقستان بويىنشا ەڭ ۇزدىك ناتيجە.

سونىمەن قاتار، ۆيزۋالدى قولجەتىمدى ىسىكتەردى كەش ساتىدا انىقتاۋ جاعدايلارى ازايدى. 2019 جىلى مۇنداي كورسەتكىش 10% بولسا، بيىل – 7%. بۇل ينديكاتور بويىنشا دا الماتى ءبىرىنشى ورىندا تۇر.

بۇل جەتىستىكتەردىڭ ارتىندا – جۇيەلى سكرينينگ، حالىقتى قامتۋ جۇمىستارى جانە قاتەرلى ىسىككە كۇدىكتى ناۋقاستاردى شۇعىل ءارى كەزەكسىز تەكسەرۋگە مۇمكىندىك بەرەتىن «جاسىل ءدالىز» جۇيەسى جاتىر.

سكرينينگ قالاي ءجۇرىپ جاتىر؟
التى ايدا جىلدىق جوسپاردىڭ 52،6%-ى ورىندالدى:

• جاتىر موينى وبىرى بويىنشا 46 مىڭنان استام ايەل تەكسەرۋدەن ءوتتى. 20 جاعداي انىقتالىپ، ونىڭ 80%-ى اۋرۋدىڭ باستاپقى كەزەڭىندە بەلگىلى بولدى. سونىمەن قاتار، 411 وبىرالدى جاعداي تىركەلدى.

• ءسۇت بەزى وبىرى سكرينينگىندە 60 مىڭنان استام ايەل قامتىلىپ، 104 ناۋقاس انىقتالدى. ونىڭ 62،5%-ى – ءبىرىنشى ساتىدا.

• كولورەكتالدىق وبىر بويىنشا 62 مىڭ ادام قارالدى. 19 اۋرۋ دەرەگى بەلگىلى بولىپ، ولاردىڭ جارتىسىنا جۋىعى – باستاپقى كەزەڭدە. 240-تان استام ادامدا وبىرالدى وزگەرىستەر تىركەلدى.

دارىگەرلەردىڭ ايتۋىنشا، سكرينينگ اۋرۋ سيمپتومسىز جۇرگەن كەزدە، ياعني ادام ءوزىن ساۋ سەزىنگەن شاقتا-اق دياگنوز قويۋعا مۇمكىندىك بەرەدى. بۇل – ۋاقىتىلى ەم مەن تولىق ساۋىعۋعا جول اشادى.

ونكولوگيامەن كۇرەستەگى باسىم باعىت – «جاسىل ءدالىز»
قاتەرلى ىسىككە كۇدىكتى پاسيەنتتەردى جەدەل تۇردە مامانعا جولداۋ جۇيەسى – ونكولوگيامەن كۇرەستەگى باستى قۇرالدىڭ ءبىرى. ق ر دەنساۋلىق ساقتاۋ مينيسترلىگىنىڭ بۇيرىعىنا سايكەس، دياگنوستيكا كەزەڭدەرى ءۇشىن ناقتى مەرزىمدەر بەلگىلەنگەن.

الماتىدا ەڭ ءجيى كەزدەسەتىن ونكولوگيالىق اۋرۋ تۇرلەرى:

• ءسۇت بەزى وبىرى

• كولورەكتالدىق وبىر

• وكپە وبىرى

• قۋىقاستى بەزى وبىرى

• اسقازان وبىرى

مامانداردىڭ ايتۋىنشا، بۇل ناتيجەلەر – العاشقى بۋىنداعى مەديسينالىق قىزمەتتەن باستاپ، ونكولوگيا ورتالىقتارىنا دەيىنگى بارلىق دەڭگەيدە جۇيەلى ءارى ۇيلەسىمدى جۇمىستىڭ جەمىسى. سونىمەن قاتار، حالىقتىڭ دەنساۋلىققا جاۋاپكەرشىلىكپەن قاراۋى مەن پروفيلاكتيكالىق تەكسەرۋلەرگە قاتىسۋى دا ماڭىزدى ءرول اتقارىپ وتىر.