الەمدىك پوپ-جۇلدىزى دجەننيفەر لوپەستىڭ الماتىداعى كونسەرتى 10 تامىز كۇنى وتەدى. مۋزىكالىق كەشتى جوعارى دەڭگەيدە وتكىزۋگە قالانىڭ ورتالىق ستاديونى بارلىق جاعىنان دايىن. قاۋىپسىزدىك شارالارى كۇشەيتىلىپ، ينفراقۇرىلىم تولىق جاڭعىرتىلدى. تريبۋنالار جوندەلىپ، باسپالداقتار جاڭارتىلىپ، ورىندىقتار اۋىستىرىلدى.
ستاديون اۋماعىندا ءجۇرىپ جاتقان كىشىگىرىم قۇرىلىس جانە جوندەۋ جۇمىستارى 9 تامىزعا دەيىن تولىق اياقتالادى. بۇعان دەيىن ستاديوننىڭ جارىق جۇيەسى جاڭارتىلىپ، 50-دەن استام شام اۋىستىرىلدى. قازىرگى تاڭدا ساحنانىڭ تەحنيكالىق جابدىقتالۋى مەن قاۋىپسىزدىك تالاپتارىنا سايكەستىگى تەكسەرىلۋدە. سىرتقى دارەتحانالار جاڭارتىلدى، قورشاۋلار قالپىنا كەلتىرىلىپ، ىرگەلەس اۋماق اباتتاندىرىلدى.
قازىرگى ۋاقىتتا ساحنانىڭ تەحنيكالىق جابدىقتالۋى مەن قاۋىپسىزدىك تالاپتارىنا سايكەستىگى تەكسەرىلۋدە.
«بۇل كونسەرت – الماتى ءۇشىن اسا ماڭىزدى وقيعا. ونىڭ قالاي وتەتىنى قالانىڭ حالىقارالىق بەدەلىنە تىكەلەي اسەر ەتەدى، سوندىقتان ۇساق-تۇيەك جايتتاردى دا ەسكەرۋ قاجەت. مۇنداي شارالار الماتىعا دەگەن قىزىعۋشىلىقتى ارتتىرىپ، تۋريستەردى تارتۋ ءۇشىن ماڭىزدى»، – دەپ اتاپ ءوتتى الماتى قالاسى اكىمىنىڭ ورىنباسارى ازامات قالدىبەكوۆ.
كونسەرت كەزىندە قوعامدىق قاۋىپسىزدىكتى قامتاماسىز ەتۋ ءۇشىن 2960 قىزمەتكەر جۇمىلدىرىلادى: ونىڭ ىشىندە 2240 پوليسيا قىزمەتكەرى، 600 اسكەري قىزمەتكەر، 120 جەكە كۇزەت اگەنتتىگى وكىلدەرى جانە 300 ەرىكتى بار.
كەشكە كەلەتىن قوناقتاردىڭ قاۋىپسىزدىگىن قامتاماسىز ەتۋ ماقساتىندا ستاديونعا كىرەتىن 26 باقىلاۋ بەكەتىنىڭ ءارقايسىسىندا مەتالل دەتەكتورلار مەن 52 قول سكانەرلەرى جۇمىس ىستەيتىن بولادى.
ستاديون اۋماعى ءتورت نەگىزگى فان-ايماققا بولىنەدى، ءارقايسىسىنا ەكى-ۇش مىڭ ادامنان ارتىق جىبەرىلمەيدى. وسىلايشا، كورەرمەندەردىڭ قوزعالىسىن باقىلاۋ مەن ءتارتىپتى ساقتاۋ بارىنشا وڭتايلاندىرىلدى.
قالا اكىمدىگى تاراپىنان سانيتارلىق تالاپتار دا باستى نازاردا. ستاديون جانىنا قوسىمشا 100-گە جۋىق بيوتۋالەت قويىلادى، اۋماق بىرنەشە كەزەڭ بويىنشا زارارسىزداندىرىلادى. تازالىققا ءمان بەرۋ ماقساتىندا ۆولونتەرلەر اراسىندا "تازا قازاقستان" اكسياسى اياسىندا تازالىق شارالارى جۇرگىزىلەدى.
وقيعا ورنىندا جەدەل جاردەم مەن ءورت ءسوندىرۋ قىزمەتتەرىنىڭ كولىكتەرى كەزەكشىلىك ەتەدى. بارلىق توتەنشە جاعدايلار قىزمەتتەرى تولىقتاي دايىن. سونىمەن قاتار، ەۆاكۋاسيالىق جوسپار مەن دىبىستىق حابارلاۋ جۇيەلەرى تەكسەرۋدەن وتكىزىلدى.
كەلۋشىلەرگە قولايلى بولۋى ءۇشىن 50 قوعامدىق اۆتوبۋس ارنايى مارشرۋتتارمەن قىزمەت كورسەتەدى. قوزعالىس باعىتتارى اباي، ساتبايەۆ، بايتۇرسىنوۆ كوشەلەرى بويىمەن بەلگىلەنىپ، ناۆيگاسيا مەن LED-ەكراندار ارقىلى كورسەتىلەتىن بولادى.
الماتى دجەننيفەر لوپەستىڭ كونسەرتىنە تەك ساحنا جاعىنان عانا ەمەس، قاۋىپسىزدىك پەن ۇيىمداستىرۋ جاعىنان دا الەمدىك ستاندارتتارعا ساي دايىن.