الماتىدا پوليسيانىڭ سەرۆيستىك ورتالىقتارىنىڭ جۇمىسى زەردەلەندى

تانىسۋ پراكتيكاسى اياسىندا الماتى قالاسى پوليسيا دەپارتامەنتىنىڭ باستىعى ايدىن كابدۋلدينوۆ الاتاۋ اۋداندىق پوليسيا باسقارماسىنا، سونداي-اق المالى جانە الاتاۋ اۋداندارىنداعى پوليسيانىڭ سەرۆيستىك ورتالىقتارىنا باردى. ساپار بارىسىندا ىشكى ىستەر ورگاندارىنداعى ادامعا باعدارلانعان مودەلدىڭ نەگىزگى تەتىگى سانالاتىن سەرۆيستىك ورتالىقتاردىڭ جۇمىسىنا ەرەكشە نازار اۋدارىلدى. سەرۆيستىك ورتالىقتار ازاماتتار مەن پوليسيا اراسىنداعى ءوزارا ءىس-قيمىلدى جەڭىل ءارى قولجەتىمدى ەتۋ ماقساتىندا قۇرىلعان. بۇگىندە ولار قالاداعى ءاربىر اۋداندا جۇمىس ىستەيدى جانە "قادامدىق قولجەتىمدىلىك" قاعيداتى بويىنشا ۇيىمداستىرىلعان. بۇل ازاماتتاردىڭ ارتىق ۋاقىت جوعالتپاي، ۇزاق كەزەك پەن كۇردەلى راسىمدەرسىز قاجەتتى قىزمەت الۋىنا مۇمكىندىك بەرەدى. پوليسيا دەپارتامەنتىنىڭ باستىعى ازاماتتاردى قابىلداۋ جاعدايىمەن، ماماندار جۇمىسىنىڭ ۇيىمداستىرىلۋىمەن، قىزمەتتەردىڭ قولجەتىمدىلىگىمەن، كەلۋشىلەرگە ارنالعان ناۆيگاسيامەن جانە سەرۆيستىك قىزمەت كورسەتۋ دەڭگەيىمەن تانىستى. ءوز سوزىندە ايدىن كابدۋلدينوۆ سەرۆيستىك ورتالىقتاردىڭ جاڭا فورماتتاعى پوليسيانىڭ فيلوسوفياسى ەكەنىن اتاپ ءوتتى. — سەرۆيستىك ورتالىقتار حالىق ءۇشىن قۇرىلعان. بۇل — قولجەتىمدىلىك، تۇسىنىكتى ناۆيگاسيا، اشىقتىق جانە ءاربىر ازاماتقا قۇرمەتپەن قاراۋ. ادام ءوزىن ءوتىنىش بەرۋشى رەتىندە ەمەس، زاڭدا كوزدەلگەن قىزمەتتى الۋعا كەلگەن ازامات رەتىندە سەزىنۋى ءتيىس، — دەدى ول. دەپارتامەنت باسشىسىنىڭ ايتۋىنشا، سەرۆيستىك ورتالىقتاردىڭ باستى يدەياسى — جازالاۋشى مودەلدەن كومەك كورسەتۋ جانە سۇيەمەلدەۋ مودەلىنە كوشۋ. — ءبىزدىڭ مىندەتىمىز — تەك قۇقىق بۇزۋشىلىققا دەن قويۋ ەمەس، كۇندەلىكتى ومىرلىك جاعدايلاردا ازاماتتارعا قولداۋ كورسەتۋ. قۇجاتىن جوعالتتى ما، انىقتاما نەمەسە كەڭەس قاجەت پە، قۇقىقتارىن قورعاۋ كەرەك پە — ادام قايدا جۇگىنەتىنىن جانە ول جەردە ونىڭ ماسەلەسى ەسكەرۋسىز قالمايتىنىن ءبىلۋى كەرەك. ءار اۋداندا سەرۆيستىك ورتالىقتىڭ بولۋى — بۇل مەملەكەتتىڭ سانالى قادامى. پوليسيا ازاماتتارعا جاقىنداي تۇسەدى. ءار اۋداندا — ءوز ورتالىعى، ءوز كومەك كورسەتۋ الاڭى، — دەپ تۇيىندەدى ايدىن كابدۋلدينوۆ. پوليسيانىڭ سەرۆيستىك ورتالىقتارى ازاماتتارعا قولايلىلىق، قولجەتىمدىلىك جانە قۇرمەت قاعيداتتارىنا نەگىزدەلگەن زاماناۋي كەڭىستىك رەتىندە دامۋىن جالعاستىرۋدا. ويتكەنى قاۋىپسىزدىك ەڭ الدىمەن ادامعا دەگەن قارىم-قاتىناستان باستالادى.