الماتىدا ازىق-تۇلىك دۇكەنىندە جاسالعان شابۋىل مەن توناۋ قىلمىسى اشىلدى، - دەپ حابارلايدى اqshamnews.kz Polisia.kz-كە سىلتەمە جاساپ.
الماتىنىڭ كريمينالدىق پوليسيا قىزمەتكەرلەرى اۋەزوۆ اۋداندىق پوليسيا باسقارماسىنداعى ارىپتەستەرىنىڭ قولداۋىمەن قاراقشىلىق شابۋىلدىڭ بەتىن اشتى. قىلمىس قالاداعى ازىق-تۇلىك دۇكەندەرىنىڭ بىرىندە بولعان. بەلگىسىز ەر ادام ايەل ادامعا شابۋىل جاساپ، وعان دەنە جاراقاتىن سالىپ، التىن بۇيىمىن اشىق تۇردە يەمدەنىپ، وقيعا ورنىنان بوي تاسالاعان. جابىرلەنۋشىگە دەر كەزىندە مەديسينالىق كومەك كورسەتىلدى. اتالعان دەرەك بويىنشا قىلمىستىق ءىس قوزعالدى. جەدەل-ىزدەستىرۋ ءىس-شارالارىنىڭ كەشەنى بارىسىندا كۇدىكتى تۇلعا انىقتالىپ، ۇستالدى. ۇرلانعان مۇلىك تاركىلەنىپ، قىلمىستىق ءىستىڭ ماتەريالدارىنا تىركەلدى. كۇدىكتى ۋاقىتشا ۇستاۋ يزولياتورىنا قاماۋعا الىندى. سوتقا دەيىنگى تەرگەپ-تەكسەرۋ جالعاسىپ جاتىر.
— كريمينالدىق پوليسيا قىزمەتكەرلەرىنىڭ اۋماقتىق بولىمشەمەن بىرلەسكەن ۇيلەسىمدى ءارى كاسىبي ارەكەتتەرىنىڭ ناتيجەسىندە كۇدىكتى قىسقا مەرزىم ىشىندە ۇستالدى. قىلمىستىڭ بارلىق ءمان-جايى انىقتالىپ، ۇرلانعان مۇلىك قايتارىلدى. قوعامدىق قاۋىپسىزدىكتى قامتاماسىز ەتۋ جانە جاسالعان قىلمىستار ءۇشىن جازانىڭ بۇلتارتپاستىعى قاعيداتىن ساقتاۋ باعىتىنداعى جۇمىس جالعاسا بەرەدى، — دەپ ناقتىلادى الماتى قالاسى پوليسيا دەپارتامەنتى كريمينالدىق پوليسيا باسقارماسىنىڭ باستىعى اسحات داۋلەتياروۆ.