الماتى قالاسىندا "قۇقىقتىق ءتارتىپ" كەڭ اۋقىمدى رەسپۋبليكالىق جەدەل-الدىن الۋ ءىس-شاراسى جالعاسىپ جاتىر.
ونىڭ اياسىندا پوليسيانىڭ جەدەل بولىمشەلەرى بوتەننىڭ مۇلكىن، سونىڭ ىشىندە ۇيالى تەلەفوندار مەن باسقا دا گادجەتتەردى ۇرلاۋدىڭ الدىن الۋ جانە اشۋعا باعىتتالعان "ۇيالى تەلەفون" اتتى ماقساتتى ءىس-شارا جۇرگىزۋدە، - دەپ حابارلايدى Aqshamnews.kz.
الماتى قالالىق پوليسيا دەپارتامەنتى كريمينالدىق پوليسيا باسقارماسىنىڭ باستىعى تالانت يسايەۆتىڭ ايتۋىنشا، بۇل شارانىڭ باستى ماقساتى – قالتا ۇرلىعىنىڭ جولىن كەسۋ، ۇرلانعان قۇرىلعىلاردى وتكىزۋمەن اينالىساتىن تۇلعالاردى انىقتاۋ، سونداي-اق ادامدار كوپ جينالاتىن ورىندار مەن قوعامدىق كولىكتەردە ازاماتتاردىڭ قىراعىلىعىن ارتتىرۋ.
- جۇرگىزىلگەن جۇمىستاردىڭ ناتيجەسىندە ۇيالى تەلەفونداردى جۇيەلى تۇردە ۇرلاۋمەن اينالىسقان بىرنەشە ادام ۇستالدى. ولاردىڭ كەيبىرى بۇرىن دا وسىنداي قىلمىستار ءۇشىن بىرنەشە رەت سوتتالعان. سونىمەن قاتار ۇرلانعان مۇلىكتى ساتىپ الۋمەن اينالىسقان ادامداردىڭ زاڭسىز قىزمەتى توقتاتىلدى. بارلىق دەرەك بويىنشا قاجەتتى قۇجاتتار راسىمدەلىپ، سوتقا دەيىنگى تەرگەۋ امالدارى باستالدى، – دەدى تالانت يسايەۆ.
ءىس-شارا باستالعالى بەرى قالاداعى قوعامدىق كولىكتەردە، بازارلاردا جانە ساۋدا ورتالىقتارىندا جاسالعان ءبىرقاتار ۇرلىق دەرەگى انىقتالدى. جەدەل ءىس-شارالار ناتيجەسىندە ۇرلانعان قۇرىلعىلاردىڭ ءبىر بولىگى يەلەرىنە قايتارىلدى. پوليسيا قىزمەتكەرلەرى قالتا ۇرلىقتارىنىڭ كوپ جاعدايدا ادامدار كوپ جينالاتىن ۋاقىتتا بولاتىنىن ەسكەرتەدى جانە تۇرعىنداردى جەكە زاتتارىنا ۇقىپتى بولۋعا، تەلەفوندار مەن سومكەلەردى قاراۋسىز قالدىرماۋعا شاقىرادى. "قۇقىقتىق ءتارتىپ" جەدەل-الدىن الۋ ءىس-شاراسى اياسىنداعى پروفيلاكتيكالىق جۇمىستار جالعاسۋدا. الماتى قالاسىنىڭ جەدەل بولىمشەلەرى كۇن سايىن ازاماتتاردىڭ قاۋىپسىزدىگىن قامتاماسىز ەتۋگە جانە ولاردىڭ مۇلكىن قورعاۋعا باعىتتالعان جۇيەلى جۇمىستار جۇرگىزىپ كەلەدى.