الماتىدا كريمينالدىق پوليسيا قىزمەتكەرلەرى ادام كوپ شوعىرلاناتىن ورىنداردا جاسالعان ءبىرقاتار قالتا ۇرلىعىن اشكەرەلەدى، - دەپ حابارلايدى Aqshamnews.kz.
جەدەل ىزدەستىرۋ ءىس-شارالارىنىڭ ناتيجەسىندە ءۇش كۇدىكتى ۇستالدى. كۇدىكتىلەردىڭ ەكەۋى ءبىر توپتىڭ قۇرامىندا ارەكەت ەتكەن. ولار ساۋدا ۇيلەرىندە، ازىق-تۇلىك دۇكەندەرىندە جانە ادام كوپ جۇرەتىن وزگە دە ورىنداردا جاڭا جىل الدىنداعى قاربالاس پەن ازاماتتاردىڭ بەيقامدىعىن پايدالانىپ، قىلمىس جاساعان. قازىرگى ۋاقىتتا ولاردىڭ كەمىندە 12 قالتا ۇرلىعى دەرەگىنە قاتىسى بارى دالەلدەندى. انىقتالعانداي، اتالعان ازاماتتار بۇعان دەيىن دە بوتەننىڭ مۇلكىن ۇرلاۋ بويىنشا قىلمىستىق جاۋاپكەرشىلىككە تارتىلعان. تاعى ءبىر كۇدىكتى قىلمىستى جالعىز ءوزى جاساعان. ول قوعامدىق كولىكتە ۇرلىق جاساۋمەن اينالىسقان. بۇل ازاماتتىڭ كەمىندە 7 قىلمىستىق ەپيزودقا قاتىسى بارى دالەلدەندى. بارلىق كۇدىكتىلەر ۇستالىپ، ۋاقىتشا ۇستاۋ يزولياتورىنا قامالدى. سونداي-اق ولاردىڭ وزگە دە وسىعان ۇقساس قىلمىستارعا قاتىسى بارى تەكسەرىلۋدە. ءاربىر دەرەك بويىنشا سوتقا دەيىنگى تەرگەپ-تەكسەرۋ امالدارى باستالدى.
— قالتاكەسەرلەر ءاردايىم ادام كوپ جينالاتىن، ازاماتتاردىڭ نازارى بولىنەتىن ورىنداردى تاڭدايدى. قوعامدىق كولىك، بازارلار، ساۋدا ورتالىقتارى مەن دۇكەندەر. ءدال وسىنداي ساتتەردە ولار ارەكەت ەتەدى. ۇستالعانداردىڭ بارلىعى — سەريالىق قىلمىسكەرلەر، ولاردىڭ ءبىر بولىگى بۇرىن سوتتالعان. قازىرگى ۋاقىتتا قوسىمشا ەپيزودتاردى انىقتاۋ جۇمىستارى جالعاسۋدا، — دەدى الماتى قالالسى پوليسيا دەپارتامەنتى كريمينالدىق پوليسيا باسقارماسىنىڭ باستىعى اسحات داۋلەتياروۆ.
سونداي-اق ول قالا تۇرعىندارى مەن قوناقتارىن ساق بولۋعا شاقىردى.
— ازاماتتاردى جەكە زاتتارىنا مۇقيات قاراۋعا، تەلەفون مەن ءامياندى سىرتقى قالتادا قالدىرماۋعا، قوعامدىق كولىكتە جانە ادام كوپ شوعىرلانعان جەرلەردە سومكەنى الدىڭىزعا ۇستاپ جۇرۋگە شاقىرامىز. ساقتىق — قالتا ۇرلىعىنىڭ الدىن الۋداعى ەڭ ءتيىمدى قورعانىس، — دەپ تۇيىندەدى اسحات داۋلەتياروۆ.