حالىقارالىق Vogue جۋرنالى 2025 جىلى رەداكسياسى ارالاپ كورگەن الەمدەگى ەڭ ۇزدىك 14 تۋريستىك باعىتتىڭ تىزىمىنە قازاقستاندى قوستى، - دەپ حابارلايدى Aqshamnews.kz.
بەدەلدى رەيتينگتە ەلىمىز لوندون، ساردينيا، بارسەلونا جانە پالم-سپرينگس سىندى جاھاندىق تۋريستىك ورتالىقتارمەن قاتار اتالدى. ماقالادا الماتى قالاسىنا ەرەكشە نازار اۋدارىلعان.
Vogue رەداكسياسى الماتىنى زاماناۋي قالالىق ورتا مەن كوركەم تابيعات ۇيلەسىم تاپقان، ايقىن كونتراستتارعا تولى قالا رەتىندە سيپاتتايدى. ماتەريالدا ىلە الاتاۋىنىڭ ەتەگىندەگى كەڭەستىك كەزەڭ ساۋلەتى، دامىعان گاسترونوميالىق مادەنيەت جانە قازاقتىڭ ۇلتتىق اسحاناسى ەرەكشە اتالادى.
«العاشقى كۇندەرىمدى كونتراستتارعا تولى قالانى ارالاۋمەن وتكىزدىم: ىلە الاتاۋى اياسىنداعى كەڭەستىك داڭعىلدار، زاماناۋي ءدامحانالار مەن ءداستۇرلى قازاق دۇكەندەرى ءبىر كەڭىستىكتە توعىسقان»، — دەپ جازادى ماتەريال اۆتورى، كرەاتيۆتى دامۋ جونىندەگى مەنەدجەر الي فارۋكي.
سونداي-اق، الماتى ءوڭىردى ارالاۋعا، سونىڭ ىشىندە كورشىلەس قىرعىزستانعا ساپارلاۋعا قولايلى باستاپقى نۇكتە رەتىندە كورسەتىلەدى. ماتەريال اۆتوردىڭ العان اسەرىنە جانە ورتالىق ازيا بويىنشا جاساعان ساياحاتىنا نەگىزدەلگەن.
Vogue نۇسقاسى بويىنشا ۇزدىك 14 تۋريستىك باعىتتىڭ قاتارىنا الماتىنىڭ ەنۋى قالاعا دەگەن حالىقارالىق قىزىعۋشىلىقتىڭ ارتىپ كەلە جاتقانىن ايعاقتاپ، قازاقستاننىڭ الەمدىك تۋريستىك كارتاداعى ورنىن نىعايتا تۇسەدى. الدىن الا بولجامعا سايكەس، 2026 جىلى الماتىعا 800 مىڭنان استام شەتەلدىك تۋريست كەلۋى مۇمكىن.