الماتىدا پەريناتالدىق كومەكتىڭ جاڭا ستاندارتتارى ەنگىزىلدى

الماتىندا رەسپۋبليكا بويىنشا العاش رەت بوساندىرۋ ستاسيونارىندا ماگنيتتىك-رەزونانستىق توموگرافيا (مرت) كابينەتى اشىلىپ، نەوناتالدىق سكرينينگ زەرتحاناسى ەنگىزىلدى.
 
جاڭا مەديسينالىق مۇمكىندىكتەر الماتى قالاسىنىڭ قوعامدىق دەنساۋلىق ساقتاۋ باسقارماسى باسشىسى مارات پاشيموۆتىڭ جۇمىس ساپارى بارىسىندا قالالىق پەريناتالدىق ورتالىقتا تانىستىرىلدى.
 
ساپار بارىسىندا قالالىق پەريناتالدىق ورتالىق ديرەكتورى ءاليا ايماعامبەتوۆا 2025 جىلدىڭ قورىتىندىسى بويىنشا ەسەپ بەردى. تالقىلاۋعا قوعامدىق دەنساۋلىق ساقتاۋ باسقارماسى باسشىسىنىڭ ورىنباسارى لەيلا يمانعالييەۆا جانە انا مەن بالا دەنساۋلىعىن قورعاۋ ءبولىمىنىڭ باسشىسى جادىرا احمەتوۆا قاتىستى.
 
2025 جىلدىڭ قورىتىندىسى بويىنشا ورتالىق پەريناتالدىق كومەكتىڭ III دەڭگەيدەگى جەتەكشى مەديسينالىق ۇيىمى مارتەبەسىن راستادى.
 
بارلىق نىسانالى كلينيكالىق ينديكاتور ورىندالدى: جاڭا تۋعان نارەستەنىڭ جالپى ومىرشەڭدىگى 100%-عا جۋىقتادى. ماتەريالدىق-تەحنيكالىق بازانىڭ جاراقتاندىرىلۋ دەڭگەيى 97،3% بولدى. پەرزەنتحاناعا جۇگىنگەندەر سانى 22،5 مىڭ جاعدايعا دەيىن ارتتى، ەمدەلىپ شىققان پاسيەنتتەر سانى 15،5 مىڭنان استى.
 
جىلدىڭ باستى وقيعاسى — ەلىمىزدىڭ مەديسينالىق تاجىريبەسىندە العاش رەت بوساندىرۋ ستاسيونارىنىڭ وزىندە مرت كابينەتىن اشۋ بولدى. بۇل جۇكتى ايەلدەر مەن بوساناتىن انالارعا باسقا مەديسينالىق ۇيىمدارعا بارماي-اق جوعارى دالدىكتەگى دياگنوستيكالىق زەرتتەۋ جۇرگىزۋگە مۇمكىندىك بەرەدى، اسىرەسە اسقىنعان جانە شۇعىل جاعدايدا اسا ماڭىزدى. سونىمەن قاتار، نەوناتالدىق سكرينينگ زەرتحاناسى ىسكە قوسىلىپ، جاڭا تۋعان سابيدەگى تۋا بىتكەن جانە تۇقىم قۋالايتىن اۋرۋلاردى ەرتە انىقتاۋ مۇمكىندىگى كەڭەيتىلىپ، ەمدەۋدى بارىنشا ەرتە مەرزىمدە باستاۋعا جول اشىلدى.
 
ورتالىقتا 516 قىزمەتكەر ەڭبەك ەتەدى، شتاتتىڭ جيناقتالۋ دەڭگەيى 98،8%. ۇجىم قۇرامىندا مەديسينا عىلىمدارىنىڭ دوكتورلارى مەن كانديداتتارى، قوعامدىق دەنساۋلىق ساقتاۋ سالاسىنىڭ 18 ماگيسترى، جوعارى ءبىلىمدى اكۋشەرلەر مەن مەديسينالىق مەيىربيكەلەر بار. 2025 جىلى قىزمەتكەرلەردىڭ 100%-ى وقىتۋدان ءوتتى، ونىڭ ىشىندە كلينيكالىق دايارلىق، دياگنوستيكا، ينفەكسيالىق جانە رادياسيالىق قاۋىپسىزدىك، شۇعىل جانە كريتيكالىق جاعدايدا مەديسينالىق كومەك كورسەتۋ باعىتتارى قامتىلدى. ماماندار حالىقارالىق، رەسپۋبليكالىق جانە وڭىرلىك عىلىمي-تاجىريبەلىك ءىس-شارالارعا قاتىسىپ، قازاقستاننىڭ، تمد ەلدەرىنىڭ جانە الىس شەتەلدەردىڭ جەتەكشى مەديسينالىق ورتالىقتارىندا ءبىلىمىن جەتىلدىردى.
 
مرت مەن نەوناتالدىق سكرينينگتەن بولەك، بىلتىر ورتالىق ستەريليزاسيالاۋ بولىمشەسىنە رەنوۆاسيا جۇرگىزىلدى، گوسپيتالدىق فارماسيا جانە دارىلىك قامتاماسىز ەتۋ ءبولىمى قۇرىلدى، جوعارى تەحنولوگيالىق گينەكولوگيالىق وتالادىڭ كولەمى ارتتى، سيمۋلياسيالىق ورتالىق پەن سيفرلىق مەديسينا دامىتىلىپ كەلەدى.
 
ساپار قورىتىندىسى بويىنشا مارات پاشيموۆ اۋىر اعىمداعى جۇكتىلىگى بار ءاربىر پاسيەنتتى تۇراقتى باقىلاۋدا ۇستاۋدى، شۇعىل تۇردە كونسيليۋم ۇيىمداستىرۋدى جانە مەديسينالىق كومەكتى كورسەتۋدىڭ زاماناۋي تاسىلدەرى مەن يننوۆاسياسىن قالىپتاستىرۋدا باس شتاتتان تىس اكۋشەر-گينەكولوگتىڭ ءرولىن كۇشەيتۋدى تاپسىردى.