دەپۋتات جارقىنبەك امانتاي ۇلى پرەمەر-مينيستردىڭ ورىنباسارى – مادەنيەت جانە اقپارات ءمينيسترى ايدا بالايەۆاعا جانە باس پروكۋرور بەرىك اسىلوۆقا دەپۋتاتتىق ساۋال جولداپ، ەل ىشىندە كەڭىنەن جارنامالاناتىن كەيبىر ترەنينگتىك كۋرستار ازاماتتارعا رۋحاني، پسيحولوگيالىق جانە قارجىلىق زيان كەلتىرىپ وتىرعانىن مالىمدەدى، - دەپ حابارلايدى aqshamnews.kz ءتىلشىسى.
دەپۋتات مۇنداي باعدارلامالاردىڭ ادىستەمەسىن رەسمي تەكسەرىپ، قۇقىقتىق باعا بەرۋدى جانە ليسەنزيالاۋ/سەرتيفيكاتتاۋ ارقىلى مەملەكەتتىك رەتتەۋ تەتىگىن ەنگىزۋدى ۇسىندى.
دەپۋتات جارقىنبەك امانتاي ۇلى قىزىلوردادا وتكەن ۇلتتىق قۇرىلتايدا مەملەكەت باسشىسى "قوعام ساناسىن ۋلايتىن جات قۇندىلىققا" قارسى باعدارلامالار ازىرلەۋدى تاپسىرعانىن ەسكە سالا وتىرىپ، وسى باعىتتاعى ءقاۋىپتىڭ ءبىر كورىنىسى رەتىندە ءتۇرلى "ترەنينگتىك كۋرستاردى" اتادى.
"بۇگىندە جارناماسى جاڭعىرىپ تۇرعان ترەنينگتەر ازاماتتارىمىزعا پايدا ەمەس، كەرىسىنشە رۋحاني، پسيحولوگيالىق جانە قارجىلىق زيان كەلتىرىپ وتىر. مىسال كەلتىرەيىن. vybor.kz ينتەرنەت پلاتفورماسى ارقىلى ءوز قىزمەتىن بەلسەندى تۇردە ناسيحاتتايتىن MINDFULNESS وقۋ ورتالىعى ءۇش ساتىلى ترەنينگ ۇسىنادى. ءبىرىنشى جالپى كۋرس - 50 000 مىڭ تەڭگە. ەكىنشى ترانسفورماسيالىق كۋرس - 95 000 مىڭ تەڭگە. ءۇشىنشى كوشباسشىلىقتى دامىتۋ كۋرسى - 150 000 مىڭ تەڭگە. ونلاين فورماتتاعى "ەموسيونالدىق ەركىندىك" كۋرسىنىڭ قۇنى 200 000 مىڭ تەڭگەگە جەتەدى. وسىنداي "كرەاتيۆتى ويلاۋدى"، "ءتيىمدى كوممۋنيكاسيانى"، "شەشەن سويلەۋدى" تەگىن ۇيرەتەمىز دەپ ۋادە بەرەتىن ورتالىقتار دا از ەمەس. ولاردىڭ قاتارىندا شەتەلدىك "ۆەكتور"، "ليدەر-موتيۆاتور" سەكىلدى اتاۋمەن جۇمىس ىستەيتىن ورتالىقتار بار"، - دەدى ول.
امانتاي ۇلى كەيبىر كۋرستاردا قاتىسۋشىلاردىڭ تەلەفوندارىن جيناپ الىپ، مورالدىق قىسىم ارقىلى جەكە پروبلەماسىن كوپشىلىك الدىندا ايتۋعا ماجبۇرلەيتىن تاجىريبەلەر بارىن، ءتىپتى قورلاۋ سيپاتىنداعى تاپسىرمالار كەزدەسۋى مۇمكىن ەكەنىن كەلتىرەدى. ول مۇنىڭ سوڭى ادامنىڭ ساناسىن "تاجىريبە الاڭىنا" اينالدىرۋعا ۇلاسىپ، كۋرس اياقتالعاننان كەيىن قاتىسۋشىدان مىندەتتى تۇردە باسقا ادامداردى تارتۋدى تالاپ ەتۋ، قورقىتۋ، مانيپۋلياسيا سياقتى ارەكەتتەرگە جالعاسۋى ىقتيمال ەكەنىن ايتادى.
وسىعان بايلانىستى دەپۋتات ۋاكىلەتتى ورگانداردان:
- بۇل كۋرستاردىڭ باعدارلامالىق مازمۇنى مەن ادىستەمەسىن، زاڭناماعا سايكەستىگىن رەسمي تەكسەرۋدى؛
- ازاماتتاردى قورلاۋ، پسيحولوگيالىق قىسىم كورسەتۋ، ماجبۇرلەۋ جانە مانيپۋلياسيا بەلگىلەرى بار ارەكەتتەرگە قۇقىقتىق باعا بەرۋدى؛
- مۇنداي ترەنينگتەرگە ليسەنزيالاۋ، سەرتيفيكاتتاۋ جانە مەملەكەتتىك رەتتەۋ تەتىگىن ەنگىزۋ مۇمكىندىگىن قاراستىرۋدى سۇرايدى.