№136 مەكتەپ-گيمنازيادا قالا مەكتەپتەرى ۇستازدارىنىڭ باسىن قوسقان «ءمىرجاقىپ وقۋلارى» اتتى شىعارماشىلىق بايقاۋ ءوتتى. ءىس-شارانى المالى اۋدانى اكىمىنىڭ اپپاراتى مەن اۋداندىق ءبىلىم ءبولىمى ۇيىمداستىردى، - دەپ حابارلايدى Aqshamnews.kz.
باعدارلاما باستالار الدىندا قوناقتارعا ءمىرجاقىپ دۋلاتوۆ اتىنداعى مەكتەپ مۋزەيىنە شاعىن ەكسكۋرسيا وتكىزىلدى. كەلۋشىلەرگە اعارتۋشىنىڭ جەكە زاتتارى، سيرەك قۇجاتتارى، قولجازبالارى مەن ونىڭ ءومىرى مەن قوعامدىق قىزمەتىنە قاتىستى دەرەكتەر تانىستىرىلدى. باستاۋىش سىنىپتىڭ ەكى وقۋشىسى دۋلاتوۆتىڭ ءومىربايانىن بايانداپ، ولەڭدەرىن وقىدى.
ءىس-شارانىڭ رەسمي ءبولىمى اكت زالىندا باستاۋىش سىنىپ وقۋشىلارىنىڭ ورىنداۋىنداعى «الاش مارشى» انىمەن اشىلدى. حور بولىپ شىرقالعان بۇل تۋىندى بايقاۋدىڭ شىمىلدىعىن ءتۇرىپ، قازاقستان تاريحىنداعى الاش قوزعالىسىنىڭ ماڭىزى مەن ءمىرجاقىپ دۋلاتوۆتىڭ ۇلتتىڭ رۋحىن وياتۋداعى ءرولىن ەسكە سالدى.
«بۇگىن ءبىز ۇلى اقىننىڭ تۋعان كۇنىندە جينالىپ، ەلدىڭ ەرتەڭىن ويلاپ، ۇلت بولاشاعى ءۇشىن كۇرەسكەن الاش قايراتكەرلەرىن ەسكە الىپ وتىرمىز. ءمىرجاقىپ دۋلاتوۆتىڭ «ويان، قازاق!» دەگەن ۇندەۋى بۇگىن دە وزەكتى. بايقاۋدىڭ ماقساتى – وسكەلەڭ ۇرپاقتى اتا-بابا مۇراسىمەن تانىستىرىپ، ايگىلى تۇلعانىڭ ءومىرى مەن شىعارماشىلىعىن ناسيحاتتاۋ، ونى بۇگىنگى جاس بۋىننىڭ تاربيەسىمەن ساباقتاستىرۋ. دۋلاتوۆتىڭ يدەيالارى قازاقتىڭ ۇلتتىق ساناسىنىڭ قالىپتاسۋىنا جانە ەلدى اعارتۋ ارقىلى بىرىكتىرۋگە زور ىقپال ەتتى»، – دەدى قۇتتىقتاۋ سوزىندە ءمىرجاقىپ دۋلاتوۆتىڭ تاريحي تۇلعا رەتىندەگى ءمانى مەن ونىڭ مۇراسىن ۇرپاققا جەتكىزۋدىڭ ماڭىزىن اتاعان المالى اۋدانى اكىمىنىڭ ورىنباسارى ەربول قالداربەكوۆ.
سونداي-اق، ول مۇعالىمدەر ءقازىر دە اعارتۋشىلىق ميسسيانى جالعاستىرىپ، جاستارعا ءبىلىم مەن قۇندىلىقتى بويىنا سىڭىرۋدە ۇلكەن ءرول اتقاراتىنىن ايتتى.
مەكتەپ ۇجىمى «باقىتسىز جامال» رومانى بويىنشا ساحنالىق قويىلىم كورسەتىپ، قازاق پروزاسىنىڭ العاشقى رومانى سانالاتىن بۇل تۋىندىنىڭ اتموسفەراسىن كورەرمەنگە جەتكىزە ءبىلدى. ودان كەيىن ءتورتىنشى سىنىپ وقۋشىلارى حالىق ءبيىن بيلەپ، پەداگوگتار مۋزىكالىق نومىرلەر ۇسىندى.
№136 مەكتەپ-گيمنازيا ديرەكتورىنىڭ تاربيە ءىسى جونىندەگى ورىنباسارى مايرا تۇرعانبايەۆا بۇل ءىس-شارانىڭ اۋقىمىن، بايقاۋعا 180 ادام قاتىسقانىن اتادى. ونىڭ ايتۋىنشا، بايقاۋ العاش رەت وتكىزىلىپ وتىر، بولاشاقتا جىل سايىنعى داستۇرگە اينالۋى مۇمكىن. سونىمەن قاتار 855 وقۋشى ءبىلىم الىپ جاتقان گيمنازياداعى وقۋشىلاردىڭ ءمىرجاقىپ دۋلاتوۆتىڭ مۇراسىمەن تانىسۋى ەرەكشە ماڭىزدى ەكەنىن جەتكىزدى.