مونيتورينگتىڭ ماقساتى – مەكتەپتەردىڭ جاڭا وقۋ جىلىنا دايىندىق جاعدايىن انىقتاۋ، وقۋشىلاردىڭ ءبىلىم الۋىنا قولايلى جانە ءقاۋىپسىز جاعداي جاساۋ. بۇل تۋرالى وڭىرلىك كوممۋنيكاسيالار قىزمەتىندە وتكەن بريفينگتە الماتى قالاسىنىڭ ءبىلىم سالاسىندا ساپانى قامتاماسىز ەتۋ دەپارتامەنتىنىڭ باسشىسى گۇلنار ەرمەكبايەۆا مالىمدەدى، دەپ حابارلايدى aqshamnews.kz.
«جاڭا وقۋ جىلىنا ساپالى دايىندالۋ ماقساتىندا دەپارتامەنت قىزمەتكەرلەرى ءبىلىم بەرۋ ۇيىمدارىندا جۇرگىزىلىپ جاتقان اعىمداعى جوندەۋ جۇمىستارىنا، جاڭا وقۋ جىلىنا دايىندىعىنا، ءبىلىم بەرۋ ۇيىمدارىندا بەينەباقىلاۋ، تۋرنيكەت، دابىل تۇيمەلەرىنىڭ بار-جوعىنا كەشەندى مونيتورينگ جۇرگىزدى. جاڭا ۇلگىدەگى كابينەتتەر مەن روبوتوتەحنيكا كابينەتتەرى»، - دەدى گۇلنار ەرمەكبايەۆا.
سونىمەن قاتار، وقۋلىقتارمەن قامتاماسىز ەتىلۋى مەن جەتكىزىلۋىنە مونيتورينگ جۇرگىزىلۋدە، وقۋشىلاردىڭ وقۋلىقپەن دەر كەزىندە جانە تولىق قامتىلۋى. قازىرگى ۋاقىتتا وقۋلىقتاردى تاراتۋ جۇمىستارى جۇرگىزىلۋدە. جۇرگىزىلگەن مونيتورينگ نەگىزىندە تاۋەكەل دارەجەسىن باعالاۋ كريتەرييلەرى دايىندالدى، ءقازىر قالانىڭ ءاربىر ءبىلىم بەرۋ ۇيىمدارىنىڭ قىزمەتىن باعالاۋ بويىنشا كومپوزيتتىك يندەكس جاسالدى.
ءبىلىم سالاسىندا ساپانى قامتاماسىز ەتۋ كوميتەتى وڭىرلەردىڭ ادىستەمەلىك ورتالىقتارىمەن بىرلەسىپ، 2023-2024 وقۋ جىلىندا ءبىلىم ساپاسىن جەتىلدىرۋ ماقساتىندا «1000 مەكتەپكە ادىستەمەلىك كومەك» اتتى رەسپۋبليكالىق جوباسى ىسكە اسىرىلدى. قالانىڭ ءبىرقاتار مەكتەپتەرى وسى جوباعا قاتىسىپ، وزىق ادىسكەرلەر ءبىلىم ساپاسىن ارتتىرۋعا باعىتتالعان ۇزدىك جوبالارى مەن كەيستەرمەن ءبولىستى. جوبانىڭ قورىتىندىسى بويىنشا ءار مەكتەپ ءوزىنىڭ 5 جىلدىق دامۋ جوسپارىنا ساپانى ارتتىرۋعا باعىتتالعان ءتيىستى وزگەرىستەر ەنگىزىپ، جۇمىستى جالعاستىراتىن بولادى.
«ءبىلىم ساپاسىن باقىلاۋ نىساندارىنىڭ ءبىرى – 4 جانە 9-سىنىپ وقۋشىلارىن كەشەندى تەستىلەۋ شەڭبەرىندە وقۋشىلاردىڭ جەتىستىكتەرىن باقىلاۋ جانە مەملەكەتتىك اتتەستاتتاۋ وتكىزۋ تۇرىندەگى ءبىلىم ساپاسىن سىرتقى باقىلاۋ. بيىلعى جىلى مونيتورينگكە 166 ءبىلىم بەرۋ مەكەمەسى قاتىستى»، - دەدى گ. ەرمەكبايەۆا.
بۇگىنگى تاڭدا الماتى قالاسى بويىنشا ءبىلىم ساپاسىن قامتاماسىز ەتۋ دەپارتامەنتىمەن مەملەكەتتىك اتتەستاتتاۋ، بارۋ ارقىلى پروفيلاكتيكالىق باقىلاۋ جانە بىلىكتىلىك تالاپتارىنا سايكەستىگىن انىقتاۋ، بارلىعى 253 ءبىلىم بەرۋ ۇيىمى قامتىلدى. مەملەكەتتىك اتتەستاتتاۋ جوسپارلانعان 295 ءبىلىم بەرۋ مەكەمەسىنىڭ 233-ىندە (78%)، ونىڭ ىشىندە 132 مەملەكەتتىك مەكتەپكە دەيىنگى مەكەمەدە جانە 91 مەكتەپتە وتكىزىلدى.
«اتتەستاتتاۋدان وتكىزىلگەن 233 مەكەمەنىڭ ءبىرىنشى رەتتەن 85 مەكتەپ، 87 بالاباقشا اتتەستاتتالدى. بۇزۋشىلىقتاردى جويۋدى ەسكەرە وتىرىپ، قايتا اتتەستاتتاۋ كەزىندە: 33 بالاباقشا اتتەستاتتالدى، جىلدىڭ سوڭىنا دەيىن قالعان ۇيىمدار جوسپار بويىنشا قايتا وتكىزىلەدى. بارۋ ارقىلى پروفيلاكتيكالىق باقىلاۋ قورىتىندىسى بويىنشا مەملەكەتتىك جالپىعا مىندەتتى ءبىلىم بەرۋ ستاندارتى تالاپتارىنىڭ بۇزىلۋى جويىلىپ، ناتيجەسىندە 1 جەكەمەنشىك مەكتەپ اتتەستاتتالدى»، - دەپ ءتۇسىندىردى گ. ەرمەكبايەۆا.
الماتى قالاسى پروكۋراتۋراسىنىڭ تالابى بويىنشا كوميسسيا ءبىلىم بەرۋ ۇيىمدارىندا ءبىلىم بەرۋ سالاسىنداعى نورماتيۆتىك قۇقىقتىق اكتىلەردىڭ، ونىڭ ىشىندە بىلىكتىلىك تالاپتارى مەن ۇلگىلىك جۇمىس ەرەجەلەرىنىڭ ساقتالۋىنا كەشەندى زەرتتەۋ جۇرگىزدى. تەكسەرۋ قورىتىندىسى بويىنشا مۇعالىمدەردىڭ بىلىكتىلىگىن ارتتىرۋ كۋرستارىن ۋاقتىلى اياقتاماۋىنا بايلانىستى زاڭ بۇزۋشىلىقتار انىقتالدى. قازىرگى ۋاقىتتا بۇل بۇزۋشىلىقتار تۇزەتىلۋدە.
اعىمداعى جىلى تەستىلەۋ اياسىندا كومپيۋتەرلىك تەحنيكانىڭ ۇزدىكسىز جۇمىسىن قامتاماسىز ەتۋ ءۇشىن Zoom فورماتىندا پروكتورينگ جۇرگىزىلدى جانە تەست سىنىپتارىندا ۆەب-كامەرالار ىسكە قوسىلدى؛ 166 وقۋ ورنىندا وقۋشىلاردىڭ جەتىستىكتەرىن باقىلاۋ بويىنشا تەحنيكالىق وقىتۋ ۇيىمداستىرىلىپ، ءبىلىم بەرۋ ۇيىمدارىندا ينتەرنەت جىلدامدىعى كەمىندە 20 مبيت/س قامتاماسىز ەتىلدى. پروسەسس بارىسىندا زاڭ بۇزۋشىلىقتار تىركەلگەن جوق.
سونىمەن قاتار، «بارشاعا ارنالعان ساپالى ءبىلىم» ۇلتتىق بايانداماسى اياسىندا «ەلدەگى ماقساتتى مەكتەپتەردى دامىتۋ» جوباسى ازىرلەندى.
جوبانىڭ ماقساتى – وڭىرلەردەگى ءبىلىم ساپاسىن ارتتىرۋ بويىنشا جۇمىستى كۇشەيتۋ شارالارىن قابىلداۋ. بۇل جوباعا قالانىڭ 22 جالپى ءبىلىم بەرۋ مەكەمەسىندە اتالعان تىزىمدەگى ءپان مۇعالىمدەرى ءۇشىن ارنايى بىلىكتىلىك ارتتىرۋ كۋرستارى ۇيىمداستىرىلىپ، باسشىلارعا ادىستەمەلىك كومەك كورسەتىلىپ، قىزمەت باعىتتارى ايقىندالدى.
«ءبىلىم ساپاسىن قامتاماسىز ەتۋ دەپارتامەنتى ءبىلىم ساپاسىن ارتتىرۋ بويىنشا جۇمىستى جالعاستىرۋدا جانە مەكتەپتەردىڭ جاڭا وقۋ جىلىنا دايىندىعىن قاداعالايدى»، - دەپ قوستى گۇلنار ەرمەكبايەۆا.