شىمكەنت قالاسى اكىمىنىڭ ورىنباسارى رۋسلان بەردەنوۆ وزىنە جاسالعان قاستاندىق پەن ودان كەيىنگى سوت پروسەسىنە قاتىستى العاش رەت مالىمدەمە جاسادى،- دەپ حابارلايدى Aqshamnews.kz ءتىلشىسى.
ونىڭ ايتۋىنشا، ءقازىر ول بەس وق جاراقاتىنان كەيىن ەم الىپ ءجۇر جانە وسى سەبەپتى سوت وتىرىستارىنا جەكە قاتىسا الماي وتىر. دەگەنمەن ول سوت پروسەسىن جانە اقپاراتتىق كەڭىستىكتەگى جاعدايدى مۇقيات باقىلاپ وتىرعانىن ايتتى.
بەردەنوۆ سوتتا ايىپتالۋشى جيەنباي تاراپىنان ايتىلىپ جاتقان مالىمدەمەلەرگە ءۇنسىز قالا المايتىنىن ايتتى.
«بۇل – شانتاج بەن قىسىم كورسەتۋ ارەكەتى. كەيىنگى رەت مەن ونى ءدال سول كەشتە، ءوزى اڭشى مىلتىعىنان وق اتقان ساتتە كوردىم. ودان كەيىن بىزدە ەشقانداي بايلانىس بولمادى. كەيىن ول ءوز وكىلدەرى ارقىلى مەنىڭ قورعاۋشىلارىممەن بايلانىس ورناتىپ، «دوستاسۋدى» ۇسىندى. ەگەر كەشىرىم بەرىلسە، شۋ كوتەرمەيمىز، ال باس تارتساق، اقپاراتتىق شابۋىل جاسايمىز دەپ سەس كورسەتتى. ءتىپتى ايىپتالۋشىنىڭ اكەسى ءوزىن-وزى ورتەيدى دەگەن مالىمدەمە تاراتۋعا دايىن بولعانىن جەتكىزدى. مۇنى مەن تىكەلەي قىسىم دەپ باعالايمىن»، – دەيدى اكىمنىڭ ورىنباسارى.
ول قانداي دا ءبىر ارانداتۋعا جول بەرمەگەنىن جانە باستاپقى ۇستانىمىنىڭ وزگەرمەگەنىن اتاپ ءوتتى. ونىڭ ايتۋىنشا، جانجالدىڭ نەگىزىندە كاسىبي سەبەپتەر جاتىر.
«جاۋاپكەر كەلىسىم اياسىنداعى جۇمىسىن ادال اتقارعىسى كەلمەدى، ەسەپ بەرۋدەن جالتاردى. مەن تەك اشىقتىقتى جانە مىندەتتەمەلەردىڭ ورىندالۋىن تالاپ ەتتىم»، – دەدى بەردەنوۆ.
سونىمەن قاتار، ول سوت پروسەسىنە قاتىسى جوق جەكە ماسەلەلەردى قوزعاپ، قوعام نازارىن باسقا ارناعا بۇرۋدى «جالعان اقپارات پەن مانيپۋلياسيا» دەپ اتادى.
«مەن ونىڭ جۇبايىن دا، وتباسىن دا تانىمايمىن. ول مەن ءۇشىن تەك مەردىگەر بولاتىن. بۇدان دا سوراقىسى – بۇگىندە بۇل جالعان مالىمدەمەلەرگە قالا اكىمىنە قاتىستى تۇستاردى دا قوسىپ جاتىر. بۇل تاعى دا ءىستىڭ اقيقاتقا ەمەس، قىسىم كورسەتۋ مەن بەدەلگە نۇقسان كەلتىرۋگە باعىتتالعان ورەسكەل مانيپۋلياسيا ەكەنىن دالەلدەيدى. مەن مۇنداي مالىمدەمەلەردى ۇزىلدى-كەسىلدى جوققا شىعارامىن جانە ولاردى مويىندامايمىن»، – دەپ ناقتىلادى ول.
رۋسلان بەردەنوۆ اكىمدىككە قالا اكىمىنىڭ شاقىرۋىمەن كەلگەنىن، بۇل قىزمەتتى اشىق ءارى ادال اتقارىپ جۇرگەنىن ايتتى. ونىڭ ايتۋىنشا، ەل مەن وزگەرىستەرگە سەنەتىن جاستاردىڭ سەنىمىن اقتاۋ – ونىڭ باستى ماقساتى.
«مەن سايلاۋعا بارىپ، ەلىمدى جاقسارتقىم كەلدى. بۇل – ۇلكەن جاۋاپكەرشىلىك. ماعان قارسى ايتىلعان جالا مەن جاپقان جالعان ايىپتار مەنى جولىمنان تايدىرمايدى. مەن ادىلەتتى سوتقا سەنەمىن»، – دەپ تۇيىندەدى ول.
ونىڭ ايتۋىنشا، ءقازىر دەنەسىندە اڭشى مىلتىعىنان قالعان 60-تان استام قورعاسىن وق بار، بۇل مەديسينالىق قۇجاتتارمەن راستالعان. سوتتاعى ۇنسىزدىگىنە بايلانىستى جاسالىپ جاتقان ءتۇرلى پايىمدارعا دا جاۋاپ بەردى:
«ۇنسىزدىك – كەلىسىم ەمەس. مەن ادىلەتتىڭ سالتانات قۇرۋىن كۇتىپ وتىرمىن»، – دەدى بەردەنوۆ.
ايتا كەتەيىك، بۇگىن شىمكەنتتە قالا اكىمىنىڭ ورىنباسارى رۋسلان بەردەنوۆكە قاستاندىق جاساۋ ءىسى بويىنشا باستى سوت وتىرىسى باستالدى. سوتتالۋشى ەرنار جيەنبايدىڭ ايتۋىنشا، ارەكەتىنە قىزمەتتەگى كيكىلجىڭ ەمەس، جەكە قىزعانىش سەبەپ بولعان.
6 تامىزدا باستالعان سوت وتىرىسى سوتتالۋشىدان جاۋاپ الۋدان باستالدى. جيەنباي بۇل ءىستىڭ قىزمەتتىك ماسەلەلەرگە قاتىسى جوق ەكەنىن، ءبارى قىزعانىشتان تۋعانىن ايتتى.
بۇعان دەيىن، 28 شىلدەدە شىمكەنتتىڭ مامانداندىرىلعان قىلمىستىق ىستەر جونىندەگى سوتىندا الدىن الا تىڭداۋ وتكەن بولاتىن. ول كەزدە دە رۋسلان بەردەنوۆ سوتقا قاتىسپاعان.
ءىستى پروكۋرور باۋىرجان قارامانوۆ جۇرگىزىپ جاتىر. ونىڭ مالىمەتىنشە، 2025 جىلعى 21 ساۋىردە ەرنار جيەنباي قالا قۇرىلىس باسقارماسىنداعى نىسانداردى باقىلاۋ ءبولىمىنىڭ باستىعىنان "تۇرعىن ءۇي شىمكەنت" ج ش س باسشىسى قىزمەتىنەن كەتۋ تۋرالى بەردەنوۆتىڭ نۇسقاۋى بارىن ەستىگەن.
سوت ەرنار جيەنبايدى ق ر قك 24-بابى 3-بولىگى جانە 99-بابى 1-بولىگى ("ادام ولتىرۋگە وقتالۋ") بويىنشا ايىپتاپ وتىر. كەيبىر دەرەكتەرگە قاراعاندا، ول بۇعان دەيىن "تۇرعىن ءۇي شىمكەنت" ج ش س مەكەمەسىن باسقارعان. سوت جيەنبايدىڭ بەت-جۇزىن تۇسىرۋگە قارسى ەكەنىن ەسكەرىپ، تۇسىرىلىمگە شەكتەۋ قويدى.