الماتى قالاسىندا بۇرىن اتاۋى بولماعان كوشەلەرگە اتاۋ بەرۋ جۇمىستارى جۇيەلى تۇردە جۇرگىزىلۋدە. بۇل تۋرالى الماتى قالاسى اكىمىنىڭ ورىنباسارى ازامات قالدىبەكوۆ حابارلادى.
قالالىق توپونيميكانى جاڭارتۋ جۇمىستارى تاريحي جادىنى ساقتاۋ، ۇلتتىق بىرەگەيلىكتى نىعايتۋ جانە مەگاپوليس تۇرعىندارى ءۇشىن ىڭعايلى مەكەنجاي جۇيەسىن قالىپتاستىرۋعا باعىتتالعان. جالپى قالا بويىنشا بۇرىن اتاۋى بولماعان 156 بولعان كوشەگە اتاۋ بەرىلدى.
«ءار اۋداندا تۇرعىندارعا مەكەنجاي مەن تىركەۋ ماسەلەسىندە قولايسىزدىق تۋدىراتىن كوشەلەردى انىقتاپ جاتامىز. ءبىز ولاردىڭ ءتىزىمىن جاساپ، ءتيىستى ورگاندارعا ۇسىنامىز. كوشەلەرگە اتاۋ بەرۋ كەزىندە نەگىزىنەن قازاق توپونيمدەرى – جەرگىلىكتى تابيعي جانە گەوگرافيالىق ەرەكشەلىكتەردى بەينەلەيتىن اتاۋلار، سونداي-اق كورنەكتى تاريحي تۇلعالاردىڭ ەسىمدەرى پايدالانىلادى. بىزدە الماتى قالاسىنان شىققان جانە قالانىڭ دامۋىنا ۇلەس قوسقان ازاماتتار قامتىلعان رەسپۋبليكالىق ءتىزىم بار. وسى ۇسىنىستار جەرگىلىكتى ونوماستيكالىق كوميسسيادا قارالىپ، كەيىن ءماسليحات پەن رەسپۋبليكالىق ونوماستيكالىق كوميسسيانىڭ قاراۋىنا جىبەرىلەدى»، - دەدى تىلدەردى دامىتۋ جانە ونوماستيكا ءبولىمىنىڭ باسشىسى باقىت قالىمبەت.