الماتىدا كىسى ولىمىنەن كەيىن ءبىر كوشە جويىلدى

بارلىق ماسەلە ۋاكىلەتتى ورگاندارمەن بىرلەسىپ شەشىلەدى

الماتىداعى رۇقسات ەتىلمەگەن ميتينگ قايعىلى جاعدايمەن اياقتالعاننان كەيىن كورولەنكو كوشەسى تولىق جويىلدى، دەپ حابارلايدى Almaty-akshamy.kz Inform.kz-كە سىلتەمە جاساپ.

الماتى قالاسى بوستاندىق اۋدانى اكىمىنىڭ ورىنباسارى رەنات سەيدرامانوۆتىڭ ايتۋىنشا، تۇرعىنداردىڭ ءوتىنىشى بويىنشا كورولەنكو كوشەسىنىڭ ءتورت جەرىندە جىلدامدىقتى شەكتەيتىن كەدەرگىلەر توسەلىپ، گاگارين جانە رادوستوۆسا كوشەلەرىنە ەكى شلاگباۋم ورناتىلدى.

«سونىمەن قاتار، الماتى قالاسى اكىمدىگىنىڭ قاۋلىسىمەن كورولەنكو كوشەسى جويىلدى، بۇل كوشە ءقازىر جوق. بۇل اۋماق ءقازىر تۇرعىن ءۇي ايماعىنا اينالدى. ەندى كوشە ستاتۋسى جوق»، – دەيدى اۋدان باسشىسىنىڭ ورىنباسارى.

سپيكەر ءقازىر اۋداندا جاپپاي قۇرىلىس ءجۇرىپ جاتقانىن، تۇرعىندارعا بايلانىستى بارلىق ماسەلەلەر ۋاكىلەتتى ورگاندارمەن بىرلەسىپ شەشىلەتىنىن ايتتى.

«بۇل جاعدايدى تولىق باقىلاۋدا ۇستايمىز. ەندى قايعىلى جاعداي قايتالانباۋ ءۇشىن جۇمىس ىستەپ جاتىرمىز»، – دەيدى رەنات سەيدرامانوۆ.

ەسكە سالايىق، ماۋسىمنىڭ 11ء-ى كۇنى كورولەنكو كوشەسىندەگى ۇيلەردىڭ ءبىرىنىڭ تۇرعىندارى رۇقسات ەتىلمەگەن اكسياعا شىعىپ، جاڭا تۇرعىن ءۇي كەشەنىنىڭ قۇرىلىسى مەن كولىك سانىنىڭ كوبەيۋىنە بايلانىستى گاگارين كوشەسىنىڭ بويىنداعى جولدى جاۋىپ تاستاعان بولاتىن.

رۇقسات ەتىلمەگەن اكسياعا قاتىسۋشىلاردىڭ ءبىرى – 1980 جىلى تۋعان م. ەسىمدى ازامات. جانجال كەزىندە قوزعالىسى بوگەلگەن كولىكتەردىڭ ءبىرىنىڭ جۇرگىزۋشىسى 1974 جىلى تۋعان ك. ەسىمدى ازاماتتى جاراقاتتاعان. جابىرلەنۋشى قايتىس بولدى.