الماتى پوليسياسى ەسىرتكى قىلمىسىنا قارسى كۇرەستى كۇشەيتتى.
جىل باسىنان بەرى قالادا شامامەن 600 ەسىرتكى قىلمىسى انىقتالدى، ونىڭ 260-تان استامى تىيىم سالىنعان زاتتى ساتۋعا قاتىستى، - دەپ حابارلايدى Aqshamnews.kz.
Polisia.kz مالىمەتىنە ساي، 440-تان استام ادام، سونىڭ ىشىندە 28 شەتەلدىك ازامات قىلمىستىق جاۋاپكەرشىلىككە تارتىلدى.
- ءبىز ەسىرتكى قىلمىسىنىڭ بارلىق ءتۇرىن تىركەپ وتىرامىز. سونىڭ ىشىندە جاسىرىن قويمالار مەن ەلەكتروندى تولەمدەر ارقىلى جۇزەگە اساتىن بايلانىسسىز تاراتۋ تاسىلدەرى دە بار. ەسەپتىك كەزەڭدە 91 ەسىرتكىنى جاسىرىن قويىپ كەتۋشى ۇستالدى. سونىمەن قاتار سينتەتيكالىق ەسىرتكى دايىندايتىن ەكى زەرتحانا جويىلىپ، ولاردان قوماقتى سوماعا باعالاناتىن جابدىقتار مەن پرەكۋرسورلار تاركىلەندى، – دەدى الماتى قالاسى پد ەسىرتكى قىلمىسىنا قارسى ءىس-قيمىل باسقارماسىنىڭ باستىعى مۇرات جۇمابايەۆ.
قارجى ۇيىمدارىمەن بىرلەسكەن جۇمىستىڭ ناتيجەسىندە 1،5 مىڭنان استام بانك كارتاسى جانە 1 مىڭنان اسا كريپتاميان بۇعاتتالدى. زاڭسىز اينالىممەن بايلانىستى قارجى وپەراسيالارى توقتاتىلىپ، جالپى كولەمى 68 ميلليون تەڭگەدەن اساتىن قاراجاتتىڭ جولى كەسىلدى. پوليسيا ەسىرتكىگە قارسى پروفيلاكتيكاعا دا باسا نازار اۋدارىپ وتىر. جىل باسىنان بەرى وقۋ ورىندارىندا 950-گە جۋىق پروفيلاكتيكالىق ءىس-شارا وتكىزىلىپ، دارىستەر، شىعارماشىلىق كونكۋرستار، ءتۇسىندىرۋ فلەشموبتارى ۇيىمداستىرىلدى. اقپاراتتىق پلاتفورمالاردا، بۇقارالىق اقپارات قۇرالدارىندا جانە قالاداعى LED-ەكرانداردا 1 400-دەن استام ناشاقورلىققا قارسى ماتەريال، ونىڭ ىشىندە "ناركوستوپ" جوباسىنىڭ بەينەروليكتەرى تاراتىلدى.
- ءبىزدىڭ جۇمىسىمىز ءۇش نەگىزگى باعىتقا نەگىزدەلەدى: قىلمىستىق ارەكەتتى انىقتاۋ جانە جولىن كەسۋ، قارجىلىق ارنالاردى بۇعاتتاۋ، سونداي-اق حالىقتى اقپاراتتاندىرۋ جانە الدىن الۋ شارالارى. الماتى قالاسىنىڭ ەسىرتكى احۋالىن تۇراقتاندىرۋ، تۇرعىنداردىڭ دەنساۋلىعى مەن بولاشاعىن قورعاۋ ءۇشىن بارلىق كۇش-جىگەرىمىزدى جۇمىلدىرامىز، – دەپ اتاپ ءوتتى مۇرات جۇمابايەۆ.