ۆ جانە س گەپاتيتتەرى – الەمدەگى ەڭ كوپ تارالعان ينفەكسيا تۇرىنە جاتادى
اعىمداعى جىلدىڭ العاشقى ەكى ايىندا الماتىدا ەرەسەك تۇرعىندار اراسىندا ءجىتى ۆ ۆيرۋستى گەپاتيتىنىڭ (جۆۆگ) ەكى جاعدايى تىركەلدى. بۇل تۋرالى الماتى قالاسىنىڭ سانيتاريالىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى اسەل قالىقوۆا ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
دارىگەردىڭ ايتۋىنشا، قالادا ءجىتى س ۆيرۋستى گەپاتيتىنىڭ (جسۆگ) جاعدايى تىركەلگەن جوق.
«سوزىلمالى ۆ جانە س ۆيرۋستىق گەپاتيتتەرمەن (سۆۆگ جانە سسۆگ) سىرقاتتانۋشىلىق كورسەتكىشى 100 مىڭ تۇرعىنعا شاققاندا – 2،56. بۇل وتكەن جىلدىڭ وسى كەزەڭىمەن سالىستىرعاندا 2،49 ەسە جوعارى. 14 جاسقا دەيىنگى بالالاردىڭ ۇلەس سالماعى – 1،75% قۇرادى. سوزىلمالى ۆيرۋستىق گەپاتيتتەردىڭ قۇرىلىمىندا سۆۆگ - 45،6% جانە سسۆگ – 54،4% قۇرادى»، - دەدى اسەل قالىقوۆا.
ۆ جانە س گەپاتيتتەرى – الەمدەگى ەڭ كوپ تارالعان ينفەكسيا تۇرىنە جاتادى. ولار باۋىردىڭ سوزىلمالى قابىنۋىن دامىتىپ، سيرروزعا جانە باۋىر ىسىگىنە الىپ كەلۋى مۇمكىن.
«ينفەكسيا كوزى – جەدەل جانە سوزىلمالى گەپاتيتتىڭ بارلىق تۇرىمەن اۋىراتىن ناۋقاستار، سونداي-اق ۆيرۋستىڭ تاسىمالداۋشىلارى. گەپاتيت ۆيرۋستارى كوبىنەسە اعزاعا گەماتوگەندىك جولمەن (قان ارقىلى)، سونداي-اق جىنىستىق، پەريناتالدىق، ياعني، انادان بالاعا جاتىردا نەمەسە تۋىلعان كەزدە جانە تۇرمىستىق-بايلانىس جولدارىمەن (تىعىز تۇرمىستىق قارىم – قاتىناس جاعدايىندا) ەنەدى. ۆ گەپاتيت ۆيرۋسى ءارتۇرلى فيزيكالىق جانە حيميالىق فاكتورلارعا ءتوزىمدى، سىرتقى ورتادا ءبىر اپتاعا جۋىق ۋاقىت ساقتالۋى مۇمكىن، مىسالى، كەپتىرىلگەن جانە بايقالمايتىن قان داقتارى، ۇستارادا، شپريستە جانە ينەكسيالىق ينەلەردە، ت.ب»، - دەدى دارىگەر.
ۆ گەپاتيتىنەن قورعانۋدىڭ جالعىز جولى – ۆاكسينالاۋ.
«قازاقستاننىڭ ەگۋ كۇنتىزبەسىنە سايكەس ۆۆگ-كە قارسى ۆاكسيناسيا پەرزەنتحانادا نارسەتەگە ءومىرىنىڭ العاشقى 12 ساعاتىندا، 2 اي جانە 4 اي جاسىندا جۇرگىزىلەدى. سونداي-اق، تاۋەكەل توبىنداعى ادامدار، ونىڭ ىشىندە جىنىستىق جانە تۇرمىستىق بەرىلۋ جولدارىنىڭ پروفيلاكتيكاسى ءۇشىن ۆۆگ-پەن اۋىراتىن ناۋقاسپەن بايلانىستا بولعان ادامدار، مەديسينالىق جوو-دا وقيتىن ستۋدەنتتەر، مەديسينا قىزمەتكەرلەرى، قاننىڭ، ونىڭ كومپونەنتتەرى مەن پرەپاراتتارىنىڭ رەسيپيەنتتەرى، ايتۆ-ينفەكسياسىن جۇقتىرعان العاش رەت انىقتالعان ادامدار، گەمودياليز جانە تىندەر مەن مۇشەلەردى ترانسپلانتاسيالاۋعا جاتاتىن تۇلعالار، ونكوگەماتولوگيالىق جانە يممۋنوسۋپرەسسيۆتى پرەپاراتتاردى قابىلدايتىن ناۋقاستار ۆۆگ-نە قارسى ۆاكسيناسياعا جاتادى. بۇگىنگى كۇنى س گەپاتيتىنە قارسى ۆاكسينا جوق»، - دەدى سپيكەر.
سپيكەر ۆ جانە س ۆيرۋستىق گەپاتيتتەرىن جۇقتىرۋ ءقاۋپىن تومەندەتۋ ماقساتىندا تومەندەگى ەرەجەلەردى ساقتاۋعا شاقىردى:
- ۆۆگ-كە قارسى ۆاكسيناسيانى ۋاقتىلى الۋ؛
- جۇقتىرعان ادامنىڭ قانىمەن بايلانىستا بولۋى مۇمكىن باسقا ادامداردىڭ جەكە گيگيەنالىق زاتتارىن پايدالانباۋ – ۇستارا، ءتىس ششەتكالارى، تىرناق قايشىلارى، قانداعى قانت ولشەگىش سياقتى نەمەسە ءتىپتى سىرعالار؛
- سۇلۋلىق سالوندارىنا بارعان كەزدە قۇلاقتى تەسۋ، پيرسينگ، ينەمەن شانشۋ، تاتۋيروۆكا جاساۋ ءۇشىن ءبىر رەتتىك ينەلەر قولدانىلاتىنىنا كوز جەتكىزۋ، سونىمەن قاتار مانيكيۋر، پەديكيۋر، سۇلۋلىق سالوندارىنداعى كەز-كەلگەن پروسەدۋرالار تەك ستەريلدى جابدىقپەن جاسالۋى كەرەك؛
- ينەكسيالىق ەسىرتكى زاتتارىن قولدانباۋ؛
- بەي-بەرەكەتسىز جىنىستىق قاتىناستان اۋلاق بولۋ، جالعىز ساۋ جىنىستىق سەرىكتەستىڭ بولۋى نەمەسە قورعالعان جىنىستىق قاتىناس؛
- حيدجاما جانە ت.ب. ءداستۇرلى ەمدەۋ ادىستەرىنەن اۋلاق بولۋ؛
- كەز كەلگەن كەسىلگەن جەردى نەمەسە اشىق جاراقاتتى جابۋ.
«ەگەر ۆيرۋستى جۇقتىرۋىڭىز مۇمكىن جاعداي بولسا، ەرتەرەك مەديسينالىق ۇيىمعا حابارلاسىڭىز، وندا ءسىز ۆيرۋستىق گەپاتيت ماركەرلەرىنە تەست تاپسىرا الاسىز. ەسىڭىزدە بولسىن، ەرتە انىقتاۋ جانە ەمدەۋ كەش بولعاننان الدەقايدا جاقسى»، - دەدى قالالىق سانيتاريالىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى اسەل قالىقوۆا.