الماتىدا تۇراق ينفراقۇرىلىمىن جاڭعىرتۋ جالعاسۋدا. 5 جەلتوقساننان باستاپ جەتىسۋ اۋدانىنداعى «ادەم» سو، «ياليان» سو، «الاتاۋ 1» سو، «باتىر» سو، «المالى» سو، «ولجا» سو، «بارىس» بازارى، سونداي-اق ءال-فارابي داڭعىلىنىڭ سولتۇستىگىندەگى «نۇرلى تاۋ» بو الدىنداعى الاڭدىق ۇلگىدەگى اۆتوتۇراقتار اۋماعىندا ءال - فارابي، جەلتوقسان كوشەسىنىڭ شىعىسىندا بوستاندىق اۋدانىندا كەدەرگىسىز تۇراق جۇيەسى ىسكە قوسىلادى، دەپ حابارلايدى aqshamnews.kz.
شلاگباۋمسىز اۆتوتۇراق جۇيەسى اۆتوموبيلدەردىڭ كىرۋى مەن شىعۋىن باقىلاۋ ءۇشىن زاماناۋي فوتو جانە بەينە ءتۇسىرۋ كامەرالارىن پايدالانادى. اۆتوتۇراققا كىرگەن كەزدە كامەرا اۆتوماتتى تۇردە كولىكتىڭ مەملەكەتتىك ءنومىرى مەن كەلۋ ۋاقىتىن تىركەيدى. سول سياقتى شىعۋ ۋاقىتى دا بەلگىلەنەدى. بۇل اۆتوتۇراقتىڭ ۇزاقتىعىن ءدال ەسكەرۋگە مۇمكىندىك بەرەدى جانە شلاگباۋم الدىندا توقتاۋ قاجەتتىلىگىن بولدىرمايدى، بۇل ۋاقىتتى ەداۋىر قىسقارتادى جانە كەزەكتەردى جويادى.
اۆتوتۇراقتىڭ بۇل ءتۇرىن ىسكە قوسۋ مىڭداعان جۇرگىزۋشىلەرگە كۇن سايىن ۋاقىتتى ۇنەمدەۋگە جانە كىرۋلەر مەن شىعۋلارداعى كەپتەلىستەردى بولدىرماۋعا مۇمكىندىك بەرەدى. جىلدام تولەۋ ءۇشىن نۇسقاۋلىق تاقتايشالارى مەن QR كودتارىن ورناتۋ پروسەستى ودان دا ىڭعايلى ەتەدى.
كوممۋنالدىق اۆتوتۇراقتاردا الدىن الا تولەنگەن تولەم جۇيەسى بار. جۇرگىزۋشىلەرگە بىرنەشە ىڭعايلى تاسىلدەر ۇسىنىلادى:
* «الماتى اۆتوتۇراقتارى» ءموبيلدى قوسىمشاسى: iOS جانە Android قۇرىلعىلارى ءۇشىن قولجەتىمدى. قولدانبادا «الدىن الا تولەمدى» نەمەسە «كەيىنگى تولەمدى» تاڭداۋعا بولادى (اعىمداعى كۇننىڭ 23:59 دەيىن).
* سايت Almaty-parking.kz: اۆتوتۇراقتى تىركەۋسىز ونلاين تولەۋگە مۇمكىندىك بەرەدى.
* SMS-تولەم: Kcell، Activ، Beeline، Tele2، Activ ابونەنتتەرى 1309 نومىرىنە SMS جىبەرە الادى جانە ءموبيلدى شوتتىڭ بالانسىنان تولەي الادى.
* Kassa24 جانە Qiwi تەرمينالدارى: قولما-قول ەسەپ ايىرىسۋدى قالايتىندار ءۇشىن.
* بانكتىك قوسىمشالار: ەكىنشى دەڭگەيلى بانكتەردىڭ ءموبيلدى قوسىمشالارى ارقىلى تولەۋ.
ەستەرىڭىزگە سالا كەتەيىك، اعىمداعى جىلدىڭ قازان ايىندا «قازىنا»، «ارلان»، «الاتاۋ-2»، «اقبۇلاق-1»، «اقبۇلاق-2» جانە «اقبۇلاق-3» امبەباپ بازارلارىنىڭ الاڭدىق ۇلگىسىندەگى اۆتوتۇراقتار اۋماعىندا وسىنداي تۇراق جۇيەسى ىسكە قوسىلدى. جۇرگىزۋشىلەر جاڭا جۇيەنىڭ ىڭعايلىلىعىن اتاپ وتەدى.
«الدىڭىزداعى كولىك ءوز تالونىن الىپ، اۆتوتۇراققا كىرگەنشە كۇتۋدىڭ قاجەتى جوق. شىعۋ كەزىندە ءسىز باسقا جۇرگىزۋشىلەردىڭ تولەم جاساۋىن كۇتپەيسىز، كەيدە ولار قالاي تولەۋ كەرەكتىگىن بىلمەيدى. كىرۋ جانە شىعۋ كەزىندە كەپتەلىستەر ايتارلىقتاي از بولدى»، - دەپ ءتۇسىندىردى جۇرگىزۋشىلەردىڭ ءبىرى.
كەدەرگىسىز تۇراق جۇيەسىن ەنگىزۋ قالالىق ينفراقۇرىلىمدى جاقسارتۋدىڭ جاھاندىق ستراتەگياسىنىڭ بولىگى بولىپ تابىلادى. جاقىن ارادا الماتىلىقتارعا ىڭعايلى بولۋ ءۇشىن مۇنداي جۇيە قالانىڭ كوپتەگەن كوممۋنالدىق تۇراقتارىندا ورناتىلادى دەپ جوسپارلانۋدا.
بارلىق سۇراقتار بويىنشا تۇرعىندار كۇن سايىن ساعات 08:00-دەن 20:00-گە دەيىن +7 (727) 390-8000 تەلەفونى بويىنشا call-ورتالىققا جۇگىنە الادى.