قازاقستان بويىنشا جازىقسىز ۇستالعانداردىڭ سانى 800 ادامنان اسادى ەكەن.
الماتىداعى تارتىپسىزدىك كەزىندە نەگىزسىز قۋدالاۋعا ۇشىراعان 36 ادام تەرگەۋ يزولياتورىنان بوساپ شىقتى. بۇل تۋرالى بۇگىن بۇقارالىق اقپارات قۇرالدارى وكىلدەرىنە ارنايى بريفينگ وتكىزگەن «امانات» قوعامدىق كوميسسياسىنىڭ جەتەكشىسى ابزال قۇسپان مالىمدەدى، دەپ حابارلايدى Almaty-akshamy.kz Almaty.tv سىلتەمە جاساپ.
زاڭگەرلەردىڭ سوزىنشە، ءقازىر تۇركسىب اۋدانىنداعى 155/18 سوتقا دەيىنگى تەرگەۋ يزولياتورىندا الماتىداعى تارتىپسىزدىككە قاتىسى بار دەگەن كۇدىككە ىلىنگەن 200-دەن استام ادام بار ەكەن. قوعامدىق كوميسسيا توبى ولاردىڭ 60-ىنىڭ كىناسى جوق ەكەنىن ايتىپ، قالالىق پروكۋراتۋراعا بوساتۋ تۋرالى ارىز بەرگەن. ءقازىر بۇل ارىز-شاعىمدار قارالىپ جاتىر. بۇگىندە بەيبىت شەرۋ كەزىندە ۇستالعاندارعا قىلمىستىق كودەكستىڭ 272-بابى بويىنشا ءىس قوزعالعان. زاڭ سالاسىنىڭ ماماندارى ولاردىڭ الداعى ۋاقىتتا تولىق اقتالىپ شىعۋىنا مۇمكىندىك بار ەكەنىن ايتادى.
«272-باپ ءۇش بولىمنەن تۇرادى. ءبىرىنشىسى - ۇيىمداستىرۋشىلارعا، ەكىنشىسى - قاتىسۋشىلارعا، ءۇشىنشىسى - ارانداتۋشىلارعا قاتىستى كوزدەلگەن جاۋاپكەرشىلىك. ءبىز نەگىزگى اكسەنتتى وسى 272-باپتىڭ 2-بولىگىمەن قىلمىستىق جاۋاپكەرشىلىككە تارتىلعاندارعا قاتىستى قويىپ وتىرمىز. ويتكەنى، نەگىزگى ساندى دا وسى بولىمدەر بەرىپ وتىر. ياعني، بەلگىسىز ۇيىمداستىرۋشىلار مەن بىزگە بەلگىسىز ارانداتۋشىلاردىڭ سوزىنە ەرىپ، ابايسىزدا ارانداپ قالعان ازاماتتار قۇرايدى»، - دەدى «امانات» قوعامدىق كوميسسياسىنىڭ جەتەكشىسى ابزال قۇسپان.
پرەزيدەنت اكىمشىلىگىنىڭ قولداۋىمەن جۇمىسىن باستاعان «امانات» قوعامدىق كوميسسياسى ەندى وسى جۇمىسىن ەلىمىزدىڭ باسقا دا وڭىرلەرىندە جالعاستىرماق نيەتتە. كوميسسيا مۇشەلەرىنىڭ سوزىنشە، ەلىمىز بويىنشا جازىقسىز ۇستالعانداردىڭ سانى 800 ادامنان اسادى ەكەن. ولاردىڭ كوپشىلىگى — جارالىلار. سول سەبەپتى ولاردىڭ ەم-دومدى تەرگەۋ يزولياتورىندا ەمەس، ۇيىندە قابىلداۋىنا جاعداي جاساماق. زاڭگەرلەر بوساتىلعانداردىڭ قوعامعا ەشقانداي زيانى جوق ەكەنىن ايتادى. ودان بولەك، الماتىدا «امانات» قوعامدىق كوميسسياسىنىڭ اتىن جامىلىپ، جازىقسىز وتىرعانداردى شىعارۋعا اقشا سۇراپ، وزدەرىن جارنامالاپ جۇرگەندەر دە بار ەكەن.
- «امانات» كوميسسياسىنىڭ جۇمىسى تەگىن، اقىسىز. ءبىز ەشقانداي اقشا، قۇندى زاتتار المايمىز. بىزگە ماراپاتتاۋ، سىياقى كەرەك ەمەس. ءبىز كوميسسيا مۇشەسىمىز دەپ كەلىپ، دوسىڭىزدى، تۋىسىڭىزدى، تانىسىڭىزدى شىعارىپ بەرەمىز دەپ كەلگەندەرگە الدانىپ قالماۋلارىڭىزدى سۇرايمىز»، - دەدى «امانات» قوعامدىق كوميسسياسىنىڭ مۇشەسى ءمادي مىرزاعارايەۆ.