الماتى قالاسىنىڭ پەريناتولوگيا جانە بالالار كارديوحيرۋرگياسى ورتالىعىندا قر-دا العاش رەت جاڭا جوبا ىسكە قوسىلۋدا: ەمشەك ءسۇتىنىڭ جەكە بانكى.
بۇل ماڭىزدى الەۋمەتتىك جوبا ق ر دەنساۋلىق ساقتاۋ مينيسترلىگىنىڭ باستاماسىمەن جانە AYALA قايىرىمدىلىق قورىنىڭ قولداۋىمەن ىسكە اسىرىلۋدا، ول ەڭ وسال پاسيەنتتەردىڭ: تابيعي تاماقتانۋدى تىكەلەي اناسىنان الا المايتىن ەرەكشە مەديسينالىق قاجەتتىلىكتەرى بار شالا تۋعان جانە جاڭا تۋعان نارەستەلەردىڭ ءومىرىن ساقتاۋعا باعىتتالعان.
ەمشەك ءسۇتىنىڭ جەكە بانكى - بۇل قارقىندى تەراپيانى قاجەت ەتەتىن جاڭا تۋعان نارەستەلەردى قولداۋعا باعىتتالعان ماڭىزدى باستاما. اۋرۋحانا جاعدايىندا، نارەستە ءارتۇرلى سەبەپتەرمەن اناسىنان ەمشەك ءسۇتىن الا الماعان كەزدە (مىسالى، قيىن بوسانۋ كەزىندەگى مەديسينالىق كورسەتىلىمدەرگە بايلانىستى)، مۇنداي بانك تاپتىرماس رەسۋرسقا اينالادى.
رەانيماسياداعى جاڭا تۋعان نارەستەلەرىنەن ءماجبۇرلى تۇردە بولىنگەن انالارعا قولداۋ كورسەتۋ وتە ماڭىزدى.
ەمشەك ءسۇتىن ءقاۋىپسىز ساۋۋ جانە ساقتاۋ پروسەسىن ۇيىمداستىرۋ نارەستەلەردى قۇندى تاماقپەن قامتاماسىز ەتىپ قانا قويمايدى، سونىمەن قاتار لاكتاسيانى ساقتاۋعا، انالارداعى سترەستى ازايتۋعا جانە اۋىر، قيىن بوسانعاننان كەيىن دە بالامەن بايلانىسىن نىعايتۋعا كومەكتەسەدى.
ەمشەك ءسۇتىنىڭ جەكە بانكىن اشۋ - نەوناتالدىق قىزمەتتى جەتىلدىرۋدەگى وتە ماڭىزدى قادام.
ەمشەك ءسۇتىن ساۋۋ مەيىرگەردىڭ باقىلاۋىمەن مىندەتتى تاڭبالانۋى بار ستەريلدى جەكە ىدىستاردا (ساۋۋ كۇنى مەن ۋاقىتى) جۇزەگە اسىرىلادى. جەكە جانە كلينيكالىق ەمشەك سورعىلارىن پايدالانۋعا رۇقسات ەتىلەدى. بارلىق ءىس-شارالار سانيتاريالىق-گيگيەنالىق نورمالاردى ساقتاي وتىرىپ جۇرگىزىلەدى.
بانك ستەريلدى ىدىستارعا جينالعان جانە ەمشەك سۇتىمەن قورەكتەندىرۋ مۇمكىن بولماعان كەزدە بالانى تاماقتاندىرۋ ءۇشىن تومەن تەمپەراتۋرادا ساقتالاتىن ساۋىلعان ءسۇت قورى بولىپ تابىلادى. مۇندا سالقىنداتىلعان (4 ± 2 °C تەمپەراتۋرادا ساقتالعان) جانە مۇزداتىلعان (-18...-20 °C تەمپەراتۋرادا) ساۋىلعان تابيعي (شيكى) ءسۇتتى ساقتاۋعا بولادى.
بولاشاقتا دەنساۋلىق ساقتاۋ مينيسترلىگى جوعارى ءقاۋىپتى فاكتورلارى بار جۇكتى ايەلدەر كەلەتىن جانە شالا تۋعان جانە سالماعى از بالالار تۋاتىن ەلدىڭ ءاربىر 3ء-شى دەڭگەيدەگى پەريناتالدىق ورتالىعىندا وسىنداي بانكتەر اشۋدى جوسپارلاپ وتىر.
ەمشەك ءسۇتى جاڭا تۋعان نارەستەلەر ءۇشىن وڭتايلى قورەكتەندىرۋ رەتىندە تانىلادى: ونىڭ قۇرامىندا بالانىڭ تولىق وسۋىنە، دامۋىنا جانە تۇراقتى يممۋنيتەتىن قالىپتاستىرۋعا قاجەتتى قورەكتىك زاتتار مەن فەرمەنتتەردىڭ تاماشا تەڭدەستىرىلگەن كەشەنى بار. ونىڭ بىرەگەي قۇرامى ينفەكسيالىق اۋرۋلاردان قورعاۋدى قامتاماسىز ەتەدى جانە ۇزاق مەرزىمدى دەنساۋلىقتى قالىپتاستىرۋعا ىقپال ەتەدى.
بۇل جوبا ددۇ باستاماسى بويىنشا جىل بويى وتكىزىلەتىن دەنساۋلىق كۇنىنە ارنالعان ءىس-شارالار شەڭبەرىندە: «سالاماتتى ءومىردىڭ باستالۋى - بەرەكەلى بولاشاقتىڭ كەپىلى» ۇرانىمەن ىسكە اسىرىلدى. جوبا سونىمەن قاتار انالار مەن جاڭا تۋعان نارەستەلەردىڭ دەنساۋلىعىن ساقتاۋ جونىندەگى حالىقارالىق اقپاراتتىق ناۋقاننىڭ بولىگى بولدى.