الماتىدا ينجەنەرلىك ينفراقۇرىلىمدى – سۋ قۇبىرى مەن كارىز جۇيەسىن، جىلۋ جانە ەلەكترمەن جابدىقتاۋدى، گاز جەلىلەرىن ءارى كوشە جارىقتاندىرۋدى جاڭارتۋ بويىنشا كەشەندى باعدارلاما جۇزەگە اسىرىلىپ جاتىر. بۇل تۋرالى قالا اكىمىنىڭ ورىنباسارى الماسحان سماتلايەۆ وڭىرلىك كوممۋنيكاسيالار قىزمەتىندە وتكەن باسپا ءسوز ءماسليحاتىندا ايتتى.
ونىڭ ايتۋىنشا، بۇگىندە «اقساي»، «ەرمەنساي» سۋقابىلداۋ نىساندارى سالىنىپ، «بارلىق» جوبالانىپ جاتىر. بۇل 245 مىڭنان استام تۇرعىندى اۋىز سۋمەن قامتاماسىز ەتۋگە مۇمكىندىك بەرەدى. سونداي-اق، ۇزىندىعى 34،9 شاقىرىم بولاتىن باتىس كوللەكتورىنىڭ قۇرىلىسى اياقتالۋعا جاقىن. سونىڭ ناتيجەسىندە الاتاۋ جانە ناۋرىزباي اۋداندارىنىڭ 150 مىڭ تۇرعىنى ورتالىقتاندىرىلعان كارىز جۇيەسىنە قوسىلادى.
جاڭعىرتۋ جۇمىستارى جىلۋ جەلىلەرىن دە قامتيدى: بيىل 37 شاقىرىم قۇبىر جاڭارتىلىپ، 17 كوممۋنالدىق قازاندىقتا رەكونسترۋكسيا جۇرگىزىلۋدە. ەلەكتر جانە گاز جەلىلەرى دە جاڭارتىلىپ جاتىر، جەكەمەنشىك جەلىلەر كوممۋنالدىق كاسىپورىنداردىڭ بالانسىنا وتكىزىلىپ جاتىر. اسىرەسە، كوشەنىڭ جارىقتاندىرۋعا ەرەكشە نازار اۋدارىلعان: 20 مىڭنان استام جاڭا شام ورناتىلىپ، قالا كوشەلەرىنىڭ بارلىعى جارىقپەن قامتىلادى. بۇل كورسەتكىش قالانىڭ جارىقتاندىرۋ دەڭگەيىن ەكى ەسەگە ارتتىرماق.
«جۇمىس كەزەڭ-كەزەڭىمەن جانە تۇراقتى باقىلاۋمەن جۇرگىزىلۋدە. ماقساتىمىز – كوممۋنالدىق قىزمەتتەردى تۇراقتى، قولجەتىمدى ءارى زاماناۋي ەتۋ»، – دەدى الماسحان سماتلايەۆ.