استانا قالاسىنىڭ اكىمى جەڭىس قاسىمبەك Instagram پاراقشاسىندا الەم چەمپيوناتىندا مەدال العان بوكسشىلاردى قۇتتىقتاعانىن جازدى، - دەپ حابارلايدى Aqshamnews.kz.
بۇل تۋرالى ەلوردا اكىمدىگىنىڭ رەسمي سايتى جازعان.
«استانالىق سپورتشىلارىمىز ليۆەرپۋلدە (ۇلىبريتانيا) بوكستان وتكەن 2025 جىلعى الەم چەمپيوناتىندا التىن مەدالدار جەڭىپ الدى.
سانجار تاشكەنباي ەكى دۇركىن الەم چەمپيونى اتاندى. سانجار العاش رەت 2023 جىلى 19 جاسىندا 48 كگ سالماق دارەجەسىندە الەم چەمپيوناتىن جەڭىپ العان ەدى، ەكى جىلدان كەيىن بۇل جەتىستىگىن ليۆەرپۋلدە 50 كگ سالماقتا قايتالاپ وتىر.
ايبەك ورالباي ءوز ەسىمىن قازاقستان سپورتى تاريحىندا التىن ارىپتەرمەن جازدى. ول الەم چەمپيوناتىندا سۋپەراۋىر سالماقتا ەل تاريحىنداعى تۇڭعىش التىن مەدالدى جەڭىپ الدى.ناتيجەسىندە ەلىمىز جالپى ەسەپتە ءبىرىنشى ورىنعا شىعىپ، 7 التىن، 1 كۇمىس جانە 2 قولا مەدال جەڭىپ الدى.
سپورتشىلارىمىز نامىستى قولدان بەرمەي، كەرەمەت ناتيجە كورسەتتى. ولار ءوز ۇلگىسىمەن ەڭبەكتىڭ، ءتارتىپتىڭ جانە وزىنە دەگەن سەنىمنىڭ ۇلكەن جەتىستىكتەرگە اپاراتىنىن كورسەتتى. بۇل جەتىستىكتەرگە باپكەرلەرىنىڭ دە قوسقان ۇلەسى زور.
استانا ىلعي دا سپورتتى قولداپ، تالانتتى سپورتشىلارىمىزدىڭ دامۋىنا جاعداي جاساپ كەلەدى. ماسەلەن، قالامىزدا بوكستى دامىتۋ ورتالىعى بار، ال بيىل بەكزات ساتتارحانوۆ اتىنداعى سپورت كەشەنى پايدالانۋعا بەرىلدى.
سىزدەردى وسى جەڭىستەرىڭىزبەن تاعى دا شىن جۇرەكتەن قۇتتىقتايمىن! الدا سىزدەرگە ۇلكەن تابىستار، جاڭا جەتىستىكتەر مەن بيىك بەلەستەر تىلەيمىن!» – دەپ جازدى جەڭىس قاسىمبەك.
