الماتى قالاسىندا 2025 جىلدىڭ باسىنان بەرى 4 جەكەمەنشىك جانە 2 جوعارى وقۋ ورنىنا تيەسىلى جاتاقحانا پايدالانۋعا بەرىلدى. جىل سوڭىنا دەيىن تاعى 5 جاتاقحانانىڭ قۇرىلىسى اياقتالىپ، ىسكە قوسىلادى. بۇل تۋرالى الماتى وڭىرلىك كوممۋنيكاسيالار قىزمەتىندە وتكەن باسپا ءسوز ءماسليحاتىندا قالا اكىمىنىڭ ورىنباسارى ازامات قالدىبەكوۆ حابارلادى.
«ءبىز ءۇشىن الماتىدا ءبىلىم الىپ جاتقان ستۋدەنتتەردىڭ جايلى جاعدايدا تۇرۋى اسا ماڭىزدى. وسى باعىتتا ينۆەستورلاردى قولدايمىز، جوعارى وقۋ ورىندارى مەن جەكە ارىپتەستەر ءۇشىن جاڭا مۇمكىندىكتەر ۇسىنامىز. بۇل جاي عانا قۇرىلىس ەمەس، بۇل ەرتەڭ قالانى دامىتۋعا اتسالىساتىن جاستارعا جاسالعان ينۆەستيسيا»، - دەدى ازامات قالدىبەكوۆ.
2025 جىلدىڭ العاشقى توعىز ايىندا قالادا جالپى سىيىمدىلىعى 1 115 ورىنعا ارنالعان 6 جاتاقحانا ىسكە قوسىلدى. ونىڭ تورتەۋى جەكەمەنشىك، ەكەۋى جوعارى وقۋ ورىندارىنا ارنالعان. جىل اياعىنا دەيىن تاعى 4 934 ورىنعا ارنالعان 5 نىسان پايدالانۋعا بەرىلەدى.
جوبالاردىڭ جۇزەگە اسۋ قارقىنىن ارتتىرۋ جانە بيزنەستىڭ قىزىعۋشىلىعىن كۇشەيتۋ ماقساتىندا الماتىداعى ۇلتتىق جوعارى وقۋ ورىندارى ءۇشىن عيماراتتاردى جاتاقحاناعا بەيىمدەۋگە بەرىلەتىن مەملەكەتتىك تاپسىرىس مولشەرى ۇلعايتىلدى. بۇرىن بۇل كورسەتكىش ءبىر ورىنعا 92 اەك بولسا، ەندى ول 182 اەك-كە دەيىن ارتتى.
بۇل ينۆەستورلار ءۇشىن اجەپتاۋىر ىنتالاندىرۋ بولىپ وتىر. سونىڭ ناتيجەسىندە جاتاقحانا سالۋ جەدەلدەپ، ستۋدەنتتەر زاماناۋي ءارى جايلى تۇرعىن ۇيمەن قامتاماسىز ەتىلەدى.
ستۋدەنتتىك جاتاقحانالار ينفراقۇرىلىمىن دامىتۋ – جاستار ءۇشىن جايلى قالا قالىپتاستىرۋداعى جۇيەلى جۇمىستىڭ ءبىر بولىگى. بۇل قالادا ءاربىر ستۋدەنت ساپالى ءبىلىم الىپ، دامىپ، ءوزىنىڭ الەۋەتىن تولىقتاي جۇزەگە اسىرا الۋعا ءتيىس.