25 قاراشا مەن 10 جەلتوقسان ارالىعىندا الماتى قالاسىندا جانە بارلىق رەسپۋبليكا اۋماعىندا "گەندەرلىك زورلىق-زومبىلىققا قارسى 16 كۇن بەلسەندى ءىس-قيمىل" اتتى جىل سايىنعى حالىقارالىق كامپانيا وتۋدە. اكسيانىڭ ماقساتى - قوعامنىڭ نازارىن تۇرمىستىق جانە گەندەرلىك زورلىق-زومبىلىق ماسەلەسىنە اۋدارۋ، ازاماتتاردىڭ قورعانۋ شارالارى تۋرالى حاباردار بولۋ دەڭگەيىن ارتتىرۋ، سونداي-اق پروفيلاكتيكا سالاسىندا مەملەكەتتىك ورگاندار مەن قوعامدىق قۇرىلىمدار اراسىنداعى ىنتىماقتاستىقتى نىعايتۋ.
اكسيا جىل سايىن 25 قاراشا - ايەلدەرگە قاتىستى زورلىق-زومبىلىقتى جويۋدىڭ حالىقارالىق كۇنىندە باستالىپ، 10 جەلتوقساندا - ادام قۇقىقتارىنىڭ حالىقارالىق كۇنى اياقتالادى. بۇل كۇندەر ءار ادامنىڭ ەركىندىككە، قۇرمەتكە جانە قاۋىپسىزدىككە دەگەن فۋندامەنتالدى قۇقىعى بار ەكەنىن سيمۆولدىق تۇردە كورسەتەدى.
كامپانيا اياسىندا الماتى قالاسىندا اقپاراتتىق ءىس-شارالار، حالىقپەن كەزدەسۋلەر، دارىستەر، تاقىرىپتىق اكسيالار، مامانداردىڭ كونسۋلتاسيالارى، سونداي-اق پروفيلاكتيكالىق رەيدتەر وتكىزىلەدى. ەرتە كەزەڭدە تۇرمىستىق زورلىق-زومبىلىقتى انىقتاۋ، جابىرلەنۋشىلەردى قولداۋ جانە تاۋەكەل توپتارىمەن جۇمىس ىستەۋ ماسەلەلەرىنە ەرەكشە كوڭىل بولىنەدى.
الماتى قالاسى پد قوعامدىق قاۋىپسىزدىك باسقارماسىنىڭ تۇرمىستىق زورلىق-زومبىلىققا قارسى ءىس-قيمىل ءبولىمىنىڭ باستىعى، پوليسيا پودپولكوۆنيگى جادىرا دجەلەۋ قىزى كانتاربايەۆانىڭ ايتۋىنشا، مۇنداي باستامالار قوعام قاۋىپسىزدىگى ءۇشىن اسا ماڭىزدى:
"اكسيانىڭ باستالۋى – جاي عانا فورمالدىلىق ەمەس. بۇل كەزەڭدە ءبىز پروفيلاكتيكالىق جۇمىستى كۇشەيتىپ، ازاماتتارعا دەر كەزىندە ارەكەت ەتۋدىڭ جانە قولداۋدىڭ ماڭىزدىلىعىن ەسكە سالامىز. تۇرمىستىق زورلىق-زومبىلىق – ۇزاق ۋاقىت بويى جاسىرىن قالۋى مۇمكىن ماسەلە. ءبىزدىڭ مىندەتىمىز – ادامدارعا كومەك بار ەكەنىن، پوليسيا ءارقاشان جانىندا ءارى قورعاۋعا دايىن ەكەنىن جەتكىزۋ"، - دەدى ول.
ول سونداي-اق الماتى قالاسى پد ققب قىزمەتكەرلەرى وسى كۇندەرى حالىقپەن كەزدەسۋلەر وتكىزىپ، وتباسىلاردى ارالاپ، ءتۇسىندىرۋ جۇمىستارىن جۇرگىزىپ، كەڭەس بەرىپ جاتقانىن اتاپ ءوتتى:
"ءبىز قالا تۇرعىندارىن بەيجاي قالماۋعا شاقىرامىز. ەگەر ءسىز زورلىق-زومبىلىقتىڭ كۋاگەرى نەمەسە جابىرلەنۋشىسى بولساڭىز - 102 نومىرىنە حابارلاسىڭىز. ءاربىر قوڭىراۋ ماڭىزدى، ول قايعىلى جاعدايدىڭ الدىن الۋى مۇمكىن. تەك بىرلەسكەن كۇش-جىگەر ارقىلى ءبىز زورلىق-زومبىلىق دەڭگەيىن تومەندەتىپ، ازاماتتارىمىزدىڭ قاۋىپسىزدىگىن قامتاماسىز ەتە الامىز"، - دەپ قوستى جادىرا قانتاربايەۆا.
ۇيىمداستىرۋشىلاردىڭ ايتۋىنشا، قوعامنىڭ بەلسەندى قاتىسۋى - اكسيانىڭ تابىستى ءوتۋىنىڭ نەگىزگى فاكتورى. حالىقتىڭ اقپاراتتانۋى ارتقان سايىن، كومەككە مۇقتاج ادامداردى قورعاۋ مۇمكىندىگى دە جوعارىلايدى.