الماتىدا ق ر ۇعا اكادەميگى، قازاقستاننىڭ ەڭبەك سىڭىرگەن عىلىم قايراتكەرى، مەملەكەتتىك سىيلىقتىڭ لاۋرەاتى ابدىمالىك نىسانبايەۆتىڭ، سونداي-اق قازاقستان رەسپۋبليكاسىنىڭ حالىق سۋرەتشىسى، مەملەكەت جانە قوعام قايراتكەرى سابىر مامبەيەۆتىڭ قۇرمەتىنە مەموريالدىق تاقتالار اشىلدى. ەسكەرتكىش تاقتايشالار ولار تۇرعان ۇيدە ورناتىلدى.
ابدىمالىك نىسانبايەۆتىڭ ءومىرىنىڭ كوپ بولىگى فيلوسوفيا جانە قۇقىق ينستيتۋتىمەن تىعىز بايلانىستى. مۇندا ول اعا زەرتحاناشىدان ديرەكتورعا دەيىن كوتەرىلدى. ابدىمالىك نىسانبايەۆ 570-تەن استام عىلىمي، عىلىمي-ساراپتامالىق، عىلىمي-ادىستەمەلىك جۇمىستىڭ، سونىڭ ىشىندە 30 مونوگرافيا، جەكە كىتاپتار مەن وقۋ قۇرالدارىن جازدى. ءبىرقاتار ەڭبەكتەر 25 شەت تىلىندە جارىق كوردى.
اكادەميكتىڭ نەگىزگى زەرتتەۋ جۇمىسى ديالەكتيكا مەن تانىم تەورياسى، عىلىم فيلوسوفياسى مەن ءادىسناماسى، قازاق جانە تۇركى فيلوسوفياسى، الەۋمەتتىك جانە ساياسي فيلوسوفيا، ساياساتتانۋ مەن مادەنيەتتانۋ ماسەلەلەرىنە ارنالدى. ول عىلىم مەكتەبىن قۇرىپ، كوپتەگەن PhD دوكتورلارى مەن كانديداتتارىن دايىندادى.
«ابدىمالىك نىسانباي ۇلى ءوزىنىڭ بۇكىل سانالى ءومىرىن عىلىمعا ارنادى. ول قازاقستان رەسپۋبليكاسى مەن شەت ەلدەردىڭ بەدەلدى ناگرادالارىمەن ماراپاتتالدى. ول ۇلت رۋحانياتىنىڭ دامۋى مەن وركەندەۋىنە ەلەۋلى ۇلەس قوسقان كورنەكتى عالىم رەتىندە حالقىمىزدىڭ جۇرەگىندە ماڭگى قالادى»، - دەدى الماتى قالاسى اكىمىنىڭ ورىنباسارى بەيبىت شاحانوۆ.
ايتا كەتەيىك، سابىر مامبەيەۆ 1946 جىلى الماتى كوركەمسۋرەت ۋچيليششەسىن، سودان كەيىن ي.ە. رەپين اتىنداعى لەنينگراد كەسكىندەمە، ءمۇسىن جانە ساۋلەت ينستيتۋتىن ءتامامدادى. قازاقستان سۋرەتشىلەر وداعىن باسقارىپ، وقىتۋشىلىق قىزمەتتى قاتار الىپ ءجۇردى. ونىڭ كوپتەگەن جۇمىسى ءا.قاستەيەۆ اتىنداعى مەملەكەتتىك ونەر مۇراجايىندا ساقتالعان. ەڭ ۇزدىك كارتينالارى «تاۋدا» (1957)، «كيىز ۇيدە» (1958). ەسكەرتكىش تاقتا ەڭبەك سىڭىرگەن ونەر قايراتكەرى تۇرعان نازاربايەۆ داڭعىلىنداعى №128 ۇيدە ورناتىلدى.