ساياباق حاليۋللين كوشەسى، 45ا مەكەنجايىندا ورنالاسقان.
16 جەلتوقساندا الماتىدا قازاقستان حالىقتارىنىڭ ەرتەگىلەرى ساياباعىنىڭ اشىلۋى وتەدى، دەپ حابارلايدى Almaty-akshamy.kz
قازاق، ورىس، نەمىس، گرەك، وزبەك، شەشەن، كورەي، ۋكراين، ۇيعىر، ەۆرەي ەرتەگىلەرى مەن اڭىزدارىنا نەگىزدەلىپ سالىنعان ساياباق كوپۇلتتى قازاقستان حالقىنىڭ بىرلىگىن بەينەلەيدى.
نىساننىڭ اشىلۋ باعدارلاماسىندا بالالار مەن ەرەسەكتەرگە ارنالعان قىزىقتى كۆەستتەر، ءتۇرلى ويىن-ساۋىقتار قاراستىرىلعان. ەرىكتىلەر بالالارعا قازاقستان حالىقتارىنىڭ ەرتەگىلەرىن ايتىپ بەرەدى، ال ەتنومادەني بىرلەستىكتەر شىعارماشىلىق نومىرلەرىن كوپشىلىك نازارىنا ۇسىنادى. ودان بولەك، مەرەكەلىك جارمەڭكە وتەدى، وندا اركىم جاڭا جىلدىق سىيلىقتار مەن كادەسىيلار ساتىپ الا الادى.
ەرتەگىلەر ساياباعىنىڭ جالپى اۋدانى 3000 شارشى مەتردى قۇرايدى. مۇندا ناعىز مادەنيەت جانە دەمالىس باعى بار. قىلقاندى جانە جاپىراقتى اعاشتار ءوازيسى، گۇلدەنگەن بۇتالار، راۋشان كوشەتتەرى، گۇلزارلار جانە "التىن بالىقتارى" بار توعاندا سۋبۇرقاق ورنالاسقان.
دەمالىس ورنىندا شىرشا، قاراعاي، تۋيا، مايقاراعاي، جوكە اعاشى، بورتەگۇل، سونداي-اق مۇندا 150 جىلدان استام ۋاقىت بۇرىن وتىرعىزىلعان ەمەندەر بار. بۇتالاردان: گورتەنزيا، كوپىرشىك بۇتاسى، فورزيسيا، كورىكتال، توبىلعى، ارشا، قىرىققۇلاق. اعاشتاردىڭ ساياسىندا جاياۋ جۇرگىنشىلەر جولدارى مەن ورىندىقتار ورناتىلعان.
ساياباقتا قازاقستان اۋماعىندا تۇراتىن حالىقتاردىڭ ەرتەگىلەرى مەن اڭىزدارى كەيىپكەرلەرىنىڭ مۇسىندىك فيگۋرالارى ورناتىلعان. اتاپ ايتقاندا، "الدار كوسە"، "كۇنەكەي قىز"، "قوجاناسىر"، "چين تيمۋر"، "ماشا مەن ايۋ"، "حاسان مەن احمەد"، "پەرسەي"، "قويان مەن تاسباقا"، "التىن بالىق"، "پاسيۋك"، "گەنزەل ي گرەتەل" جانە "تيەۆە ءسۇت ساتۋشى". جالپى، قولادان قۇيىلعان ون ءۇش اۆتورلىق ءمۇسىن قويىلعان.
ولاردىڭ ىشىندە "سانتا كلاۋس تاعى" دەپ اتالاتىن ەرەكشە مۇسىندىك كومپوزيسيا بار. مۇندا سانتامەن ەستەلىك فوتوعا تۇسۋگە بولادى.
ساياباق مۇسىندەرىنىڭ اۆتورى ايگىلى قازاقستاندىق ءمۇسىنشى، ستانوكتى، مونۋمەنتالدى، مەموريالدىق جانە ساياباق ءمۇسىنىنىڭ ەڭ تانىمال شەبەرلەرىنىڭ ءبىرى – پاۆەل يۆانوۆيچ شوروحوۆ.
دەمالىس ورنىندا انا مەن بالاعا ارنالعان جايلى جانە جابدىقتالعان بولمەلەر جۇمىس ىستەيدى. سونداي-اق ساياباقتا ىستىق شايمەن نەمەسە كوفەمەن جىلىنىپ، وسىندا جاڭا پىسىرىلگەن نان ونىمدەرىنەن ءدام تاتۋعا بولادى.
ەرتەگىلەر ساياباعىنىڭ جۇمىس كەستەسى – كۇن سايىن ساعات 8.00-دەن 19.00–گە دەيىن. سەنبى، جەكسەنبى جانە مەرەكە كۇندەرى ساعات 10.00-دەن 16.00-گە دەيىن بالالارعا ارنالعان باعدارلامالار وتكىزىلەدى. كىرۋ تەگىن.
ساياباق الماتىنىڭ ەڭ كونە پراۆوسلاۆيە عيباداتحاناسى، مادەنيەت جانە ساۋلەت ەسكەرتكىشى – قازان سوبورىنا ىرگەلەس اۋماقتا ورنالاسقان. كوپ جىلدار بويى بۇل قوقىس شاشىلعان بوس جەر ەدى. ەندى بۇل وڭتۇستىك استانا تۇرعىندارى مەن قالا قوناقتارى ءۇشىن بەزەندىرىلگەن دەمالىس ورنى بولماق.