الماتىنىڭ مەدەۋ اۋدانىندا جاڭا قوعامدىق كەڭىستىكتەر قۇرىلۋدا، سونداي-اق تاريحي كەلبەتىن ساقتاي وتىرىپ، عيماراتتارعا كۇردەلى جوندەۋ جۇرگىزىلۋدە. شىلدە ايىندا جەكە قاراجات ەسەبىنەن ق ر پرەزيدەنتى جانىنداعى ۇلتتىق عىلىم اكادەمياسىنىڭ عيماراتى - ساۋلەت ەسكەرتكىشىن كۇردەلى جوندەۋ جانە قالپىنا كەلتىرۋ جۇمىستارى باستالدى. بۇل تۋرالى مەدەۋ اۋدانىنىڭ اكىمى ەركەبۇلان ورازالين الماتىدا وتكەن وكق بريفينگىندە ايتتى.
«جوبادا عيماراتتىڭ قاسبەتى، شاتىرى، ينجەنەرلىك جەلىلەردى اۋىستىرۋ بويىنشا كەشەندى جوندەۋ، ىشكى ارلەۋ جۇمىستارى، سونداي - اق ىرگەلەس اۋماقتاردى-شوقان ءۋاليحانوۆ اتىنداعى سكۆەردى جانە شيەۆچەنكو كوشەسى جاعىنان عيماراتقا ىرگەلەس جاتقان سكۆەردى اباتتاندىرۋ كوزدەلگەن. بۇگىنگى تاڭدا جۇمىستار 90%-عا ورىندالدى. شەتىنەگەن تاس پليتكالار مەن ىرگەتاستاردى قالپىنا كەلتىرۋ، گرانيتتى جيەكتەردى تەگىستەۋ بويىنشا جۇمىستار جۇرگىزىلدى، سونداي - اق قولدانىستاعى تاس تپليتكالار ءتيىستى تۇرگە كەلتىرىلدى»، - دەپ اتاپ ءوتتى ول.
ونىڭ ايتۋىنشا، وسىنداي جۇمىستار پۋشكين كوشەسىنىڭ جانىنداعى عىلىم اكادەمياسىنىڭ عيماراتىنا ىرگەلەس الاڭدا جۇرگىزىلۋدە. بۇل جوبا «حالىق قاتىساتىن بيۋدجەت» باعدارلاماسى اياسىندا جۇزەگە اسىرىلۋدا. ءۇش گۇلزار بويىنشا جۇمىستار جىل سوڭىنا دەيىن اياقتالادى.
«سونداي-اق، ءبىز قالا كوركىنىڭ ءبىرى – «كوك توبە» تەلەمۇناراسىن ساۋلەتتىك-كوركەمدىك جارىقتاندىرۋدى بەزەندىرۋ بويىنشا جۇمىستاردى جوسپارلادىق. قۇرىلىس-مونتاج جۇمىستارىنىڭ باستالۋى 2024 جىلدىڭ قاڭتارىندا، 2024 جىلدىڭ مامىرىندا اياقتالادى دەپ جوسپارلانعان»، - دەدى ەركەبۇلان ورازالين.
«سامال -1» شاعىن اۋدانىنداعى قوعامدىق كەڭىستىكتەردى دامىتىلۋدا. 2023 جىلدىڭ سوڭىنا دەيىن «جۋرناليستەر» سكۆەرىن قايتا قۇرۋ جۇمىستارى جۇرگىزىلۋدە. ال «الاتاۋ» شاعىن اۋدان تۇرعىندارىنىڭ ءوتىنىشى بويىنشا بيىل يبراگيموۆ كوشەسىندەگى كونكي پاركىنىڭ قۇرىلىسى باستالدى. جۇمىستار اعىمداعى جىلدىڭ سوڭىنا دەيىن اياقتالادى.
«اياقتالۋ ساتىسىندا تۇرعان تاعى ءبىر جوبا – دوستىق داڭعىلىنان «ەسەنتاي» وزەنىنە دەيىنگى وسپانوۆ كوشەسىندەگى جاياۋ جۇرگىنشىلەر ايماعى. جوبا اياسىندا ءبىز ۇزىندىعى 500 مەترگە جۋىق تروتۋار جولىن كەڭەيتتىك. جاياۋ جۇرگىنشىلەر ايماعىنىڭ باستى ەرەكشەلىگى-80 سۋرەتشىنىڭ ونداعان كوركەم كومپوزيسيالارىمەن بەزەندىرىلگەن گراففيتي قابىرعاسى بولدى»، - دەدى ەركەبۇلان ورازالين.
اۆتورلاردىڭ ويىنشا، قابىرعاداعى سۋرەتتەر قازاق ءالىپبيىنىڭ ارىپتەرىن بەينەلەيدى: بارلىق 42 تاڭبا جالپى سيۋجەتتىك كومپوزيسياعا ەنگەن. جوبانى ىسكە اسىرۋ الماتى اكىمدىگىنىڭ، جوبالىق كەڭسە اياسىندا شىعارماشىلىق زيالى قاۋىم وكىلدەرىمەن - REPAS كومانداسىنىڭ وكىلدەرىمەن جانە «Almaty Creative Bureau» باسشىسى كريستينا بەكمۋرزايەۆامەن ىنتىماقتاستىق ارقاسىندا مۇمكىن بولدى.
جالپى، جايلى قالالىق ورتا قۇرۋ ءۇشىن اعىمداعى جوندەۋ اياسىندا 122 جوبانى ىسكە اسىرۋ اياقتالدى. بۇگىنگى تاڭدا 80 اۋلا اۋماعى اباتتاندىرىلدى، 23 ءۇيدىڭ قاسبەتتەرى جاڭارتىلدى، 13 جەر ءۇستى جانە جەراستى جاياۋ جۇرگىنشىلەر وتكەلىنە جوندەۋ جۇمىستارى اياقتالدى، 4 اۆتو سۋارۋ جۇيەسى قايتا جاڭارتىلدى، قوعامدىق كەڭىستىكتى اباتتاندىرۋ، گۇلزارلار ورناتىلدى.
«حالىق قاتىساتىن بيۋدجەت» باعدارلاماسى اياسىندا 44 جوبا ىسكە اسىرىلۋدا. بۇگىنگى تاڭدا 34 جوبا بويىنشا جۇمىستار اياقتالدى، قالعان 10 جوبا جىل سوڭىنا دەيىن اياقتالادى.
«جەكە قاراجات ەسەبىنەن قىركۇيەك ايىنىڭ باسىندا «كوك توبە» ساياباعىنا دەيىنگى ۇزىندىعى 1،2 كم جاياۋ جۇرگىنشىلەر تروتۋارىن جايلاستىرۋ جۇمىستارى باستالدى. بۇگىنگى تاڭدا جول سالۋ جانە اسفالتتاۋ بويىنشا نەگىزگى جۇمىستار اتقارىلدى. كىرۋ توبىن جايلاستىرۋ، قاراۋ الاڭدارىن ورناتۋ جانە جارىقتاندىرۋ جۇمىستارى 2024 جىلدىڭ كوكتەمىندە اياقتالادى»، - دەپ تولىقتىردى مەدەۋ اۋدانىنىڭ اكىمى.
سونداي-اق، بيىل «كوك بازاردى» جاڭعىرتۋ جۇمىستارى باستالدى. جەلىلەردى رەكونسترۋكسيالاۋ جۇرگىزىلۋدە، ال ورتالىق كىرەبەرىستىڭ الدىندا بەتون جابىندىسىن جاڭارتۋ، تىرەك كونسترۋكسيالارىن كۇشەيتۋ جانە اۋماقتى اباتتاندىرۋ جوسپارلانۋدا. جۇمىستاردى 2025 جىلدىڭ سوڭىنا دەيىن اياقتاۋ جوسپارلانۋدا.