تاۋەلسىزدىك مەرەكەسى قارساڭىندا الماتىنىڭ بيىلعى جىلعى ەگىزدەرى مەن ەسىمدەرىن سارالاپ كوردىك.
جاقىندا عانا قازاقستان حالقى 20 ميلليونىنشى تۇرعىنىن قارسى الدى. باقىتتى ساتكە قازاقستاننىڭ ءار وڭىرىنەن سول ساعات، سول مينۋتتا دۇنيەگە كەلگەن سابيلەر ىلىكتى. ءدال سول ساتتە تۋىلعان الماتىلىقتار بولماسا دا، ەلىمىزدىڭ دەموگرافياسىنىڭ وسۋىنە ايتارلىقتاي ۇلەس قوسقان انالارىمىزدىڭ الماتىدا دا كوپ ەكەنىنە كوزىمىز جەتتى. جىل باسىنان بەرى بۇگىنگە دەيىن الماتىدا دۇنيەگە كەلگەن تەك قانا ەگىزدەردىڭ ءوزى 217 جۇپتى قۇرايدى ەكەن. اراسىندا ۇشەمدەر دە بار، دەپ حابارلايدى اlmaty-akshamy.kz.
«ازاماتتارعا ارنالعان ۇكىمەت» مەملەكەتتىك كورپوراسياسى الماتى قالاسى فيليالى اۋداندىق احاج بولىمدەرىنىڭ بەرگەن مالىمەتىنشە، بيىلعى جىلى ەگىزدەردىڭ كوشىن 39 ەگىزبەن بوستاندىق اۋدانى، 38 ەگىزبەن تۇركسىب جانە 31 ەگىزبەن الاتاۋ اۋدانى باستاپ تۇر. ودان كەيىن ءتىزىمدى 31 ەگىزبەن – الاتاۋ، 30 ەگىزبەن مەدەۋ اۋدانى، 29 ەگىزبەن المالى اۋدانى جالعاستىرعان. ءتىزىمنىڭ سوڭىن 28 ەگىزبەن اۋەزوۆ، 13 ەگىزبەن جەتىسۋ، 8 ەگىز 1 ۇشەممەن ناۋرىزباي اۋدانى اياقتاپ تۇر.
«بۇل وتە قۋانارلىق جاعداي. ەلىمىزدە حالىق سانىنىڭ ءوسىپ جاتقانى – جاقسى قۇبىلىس. تالاي ناۋبەتتى باسىنان وتكەرىپ، ءوسۋ قارقىنى باسەڭسىپ قالعان حالقىمىز، بيىل 20 ميلليوندىق مەجەگە جەتىپ قۋانتىپ وتىر. ەلىمىزدە حالىقتىڭ الەۋمەتتىك جاعدايىنا اسا ءمان بەرىلىپ، انالاردىڭ دا الاڭسىز بالالى بولۋىنا جاعدايلار قاراستىرىلىپ جاتىر.بوسانعانعا دەيىنگى، بوسانعاننان كەيىنگى جاردەماقىلارى ءوستى. ءاربىر بالا تۋىلعاندا بەرىلەتىن جاردەماقىلار دا جىل سايىن ءوسىپ وتىر. كورسەتىلەتىن مەملەكەتتىك قىزمەتتەر پرواكتيۆتى جانە كومپوزيتتى نۇسقالارعا كوشىرىلدى. انالار كوپ قىزمەتتەردى حقو-عا كەلمەي-اق ونلاين الاتىن بولدى»، - دەيدى «ازاماتتارعا ارنالعان ۇكىمەت» مەملەكەتتىك كورپوراسياسى الماتى قالاسى فيليالى ديرەكتورىنىڭ ورىنباسارى فاريدا بوكيجانوۆا.
ايتا كەتۋ كەرەك، سوڭعى جىلدارى ەلىمىزدە ەگىز جىگىتتەر مەن ەگىز قىزداردىڭ قوسىلۋ جايتتارى دا جيىلەپ كەلەدى. بۇل جامان ءۇردىس ەمەس، البەتتە. اقتوبە، ماڭعىستاۋ وبلىستارىندا ەگىز جىگىتتەر ەگىز قىزدارعا ۇيلەنگەن جايتتار بار. ءتىپتى، وڭتۇستىك قازاقستان وبلىسىندا 32 جىل بۇرىن ەگىز قىزدارعا ۇيلەنگەن ەگىز باۋىرلار تۇرادى ەكەن. ولاردىڭ قاي-قايسىسى دا ومىرلەرىنە ريزا.
الەمدە 80 مىڭعا جۋىق ەگىز بار كورىنەدى. رەسمي مالىمەت بويىنشا جىل سايىن الەمدە 1،6 ميلليون ەگىز تۋادى ەكەن. قازاقستان ەگىزدەردى ومىرگە الىپ كەلۋى جونىنەن الەمدە 48 ورىندا ەكەن. دەگەنمەن، قازاقستاننىڭ ءاربىر قالالارى مەن اۋىلدارى جاقسى كورسەتكىش كورسەتىپ جاتسا، 48-ورىننان جىلجۋىمىز دا عاجاپ ەمەس.
سونداي-اق، الماتىنىڭ سابيلەرى يەمدەنگەن ەسىمدەرمەن دە بولىسسەك. «ازاماتتارعا ارنالعان ۇكىمەت» مەملەكەتتىك كورپوراسياسى احات بولىمدەرىنىڭ بەرگەن مالىمەتىنشە، الماتىلىقتاردىڭ كوپشىلىگى بالالارىنا قاسيەتتى يسلامداعى ەسىمدەردى تاڭداپتى. ولاردىڭ قاتارىندا مۇحاممەد، ال-مۇحاممەد، يسلام، مۇحاممەدالي، ومار، ابدراحمان، فاتيما، رايانا، كاۋسار، ايشا، مەدينا، ياسينا بولسا، كوپ كەزدەسەتىن ەسىمدەر قاتارىندا تاريحي تۇلعالار مەن قايراتكەرلەر ەسىمدەرى دە بار. ماسەلەن، ابىلايحان، قازبەك، ءابىلحايىر، كەنەسارى، ءاليحان، امىرە، نۇرسۇلتان، قاسىم-جومارت، حان، ايعانىم، بورتە، زەرە، توميريس جانە ت.ب. سونىمەن قاتار، الديار، ايسۇلتان، الينۇر، نۇرالي، اليار، ايون، ايلين، ءىنجۋ ، مارجان، اسىلىم، ماريام، سوفيا، ايالا سىندى قازىرگى زامانعى ەسىمدەردى دە ءبىرقاتار اتا-انالار تاڭداعان.
«ايەل ادام ءۇشىن انا بولۋدان اسقان باقىت جوق شىعار. بالالاردىڭ دۇنيەگە كەلۋى تەڭدەسى جوق قۋانىش اكەلەدى جانە ولارمەن بايلانىستى بارلىق قيىندىقتار بىرتىندەپ ۇمىتىلادى. ونىڭ ۇستىنە ءبىر ەمەس، ەگىز ءسابي دۇنيەگە كەلىپ جاتسا، ءوزىڭ جانە تۋعان-تۋىستار ءۇشىن دە قۋانىش ەسەلەنە تۇسەدى ەكەن»، - دەيدى جاي عانا انا باقىتىمەن بولىسكەن دينارا ابدۋكاريموۆا.
وسى جىلدىڭ قاڭتار-قازان ارالىعىندا الماتى قالاسىندا 29 560 بالا دۇنيەگە كەلدى. ونىڭ 15 251 - ۇل، 14 309 - قىز. ولاردىڭ 435 بالا ەگىز تۋىلعان - 216 جۇبى ەگىز، 1ء-ى ۇشەم. الماتى ءۇشىن تامىز ايى نارەستەلەردىڭ كوپ تۋىلۋىمەن ەرەكشەلەندى. بۇل ايدا 3310 بالا ءومىر ەسىگىن اشقان.