بۇرىن ۇستالعان كۇدىكتى پاتەردە جيھاز قۇراستىرىپ، يەلەرىن توناماق بولعان. تەرگەۋ جۇمىستارى جالعاسۋدا.
الماتى قالاسىندا پوليسيا قىزمەتكەرلەرى 2024 جىلدىڭ 20 جەلتوقسانىندا ناۋرىزباي اۋدانىنىڭ تۇرعىن ءۇي كەشەنىندە ورىن العان اسا اۋىر قىلمىستى اشتى. سول كۇنى ەرلى-زايىپتىنى توناۋعا ارەكەتتەنۋ كەزىندە ەكەۋى دە اۋىر جاراقات الىپ، قازىرگى ۋاقىتتا اۋرۋحانادا جاتىر، دەپ حابارلايدى aqshamnews.kz.
«كۇدىكتى، 38 جاستاعى جەتىسۋ وبلىسىنىڭ تۇرعىنى، جاساعان قىلمىسىن مويىندادى. ونىڭ ايتۋىنشا، ول بۇعان دەيىن زارداپ شەككەندەردىڭ پاتەرىندە جيھاز قۇراستىرىپ، ولاردىڭ سەيفى بار ەكەنىن بايقاعان. 20 جەلتوقسان كۇنى تاڭەرتەڭ ول بەت-اۋزىن مەديسينالىق ماسكا مەن شارفپەن جاسىرىپ، ەرلى-زايىپتىلاردىڭ ەسىگىن قاققان. قولىنا تاپانشا ۇستاپ، اقشالارىن بەرۋدى تالاپ ەتكەن»، – دەپ حابارلادى پوليسيا.
الايدا ءۇي يەسى كومەككە شاقىرا باستاعان سوڭ، قاسكوي ەرلى-زايىپتىعا وق اتىپ، وقيعا ورنىنان قاشىپ كەتكەن.