مەملەكەت باسشىسىنىڭ 2025-جىلدىڭ كوكتەمگى ەگىن ەگۋ مەن كۇزگى جيىن-تەرىم جۇمىستارىن ەرتە قارجىلاندىرۋ جونىندەگى تاپسىرماسىنا سايكەس، جەڭىلدەتىلگەن نەسيە بەرۋ بويىنشا وتىنىمدەردى قابىلداۋ 2024- جىلدىڭ 29-قاراشاسىندا باستالدى.
Aشم مالىمەتىنە ساي، بۇل شارا فەرمەرلەردىڭ قاجەت تۇقىمدى، تىڭايتقىشتى، وسىمدىك زيانكەستەرىنە قارسى دارى-دارمەكتەردى ەرتە ساتىپ الىپ، تەحنيكالارىن جاراقتاپ، ەگىن ەگۋ ناۋقانىن ساپالى جۇرگىزۋلەرى ءۇشىن قابىلداندى، دەپ حابارلايدى aqshamnews.kz.
«اگرارلىق نەسيە كورپوراسياسى» اق «كەڭ دالا 2» باعدارلاماسى اياسىندا جىلدىق سىياقى مولشەرلەمەسى 5% بولاتىن جەڭىلدەتىلگەن نەسيە بەرۋ جۇمىسىن باستاپ كەتتى. قازىرگى تاڭدا جالپى سوماسى 153،9 ملرد تەڭگەنى قۇرايتىن 1337 اۋىل شارۋاشىلىعى تاۋار ءوندىرۋشىسى كورپوراسياعا جۇگىنگەن. ونىڭ ىشىندەگى جالپى سوماسى 136،2 ملرد تەڭگە بولاتىن 1002 فەرمەردىڭ ءوتىنىمى قارالۋدا. ال 674 فەرمەر كوكتەمگى ەگىن ەگۋ ناۋقانىنا 100،2 ملرد تەڭگە نەسيە قارجىلارىن الىپ ۇلگەردى.
اقمولا، قوستاناي جانە سولتۇستىك قازاقستان وبلىستارى سياقتى استىقتى ايماقتاردىڭ ەگىن ەگەتىن فەرمەرلەرى اراسىندا بەلسەندىلىك جوعارى ەكەنى بايقالۋدا.
«ماكسيموۆسكوە» ج ش س «كەڭ دالا 2» باعدارلاماسىنا قاتىسۋ ءۇشىن ءوتىنىم بەرگەن العاشقى شارۋاشىلىقتاردىڭ ءبىرى بولدى.
«2024-جىلعى كوكتەمگى ەگىس جۇمىستارى باستالار الدىندا بىزگە «كەڭ دالا 2» باعدارلاماسى بويىنشا نەسيە الۋ ۇسىنىلدى. ءبىز 500 ملن تەڭگە كولەمىندە قاراجات الدىق، وسىمدىكتەردى قورعاۋ قۇرالدارى مەن تىڭايتقىشتارعا قاتىستى بارلىق مىندەتتەمەلەردى وتەدىك. ەگىن جيناۋ جۇمىستارىن ءساتتى اياقتاپ، قارىزىمىزدى جاپتىق. 2025-جىلدىڭ كوكتەمگى ەگىس جۇمىستارىن ەرتە قارجىلاندىرۋ جۇمىستارىنىڭ ارقاسىندا ءبىز ءقازىردىڭ وزىندە 800 ملن تەڭگە الدىق. بۇل تەڭدەسسىز باعدارلاما. اۋىل شارۋاشىلىعى وندىرۋشىلەرى ءۇشىن بۇدان جاقسىسىن تابۋ مۇمكىن ەمەس دەپ ويلايمىن»، – دەدى «ماكسيموۆسكوە» ج ش س ديرەكتورى الەكساندر زاكۋسيلوۆ.
ەسكە سالا كەتەيىك، پرەزيدەنتتىڭ تاپسىرماسىن ورىنداۋ اياسىندا كوكتەمگى ەگىن ەگۋ مەن كۇزگى جيىن-تەرىم جۇمىستارىنا 700 ملرد تەڭگەگە دەيىن قاراجات بولىنەدى، ونىڭ شامامەن 560 ملرد تەڭگەسى نارىقتىق كاپيتال كوزدەرىنەن تارتىلادى. ۇكىمەت قابىلداعان شارالار فەرمەرلەرگە ەڭ قولايلى شارتتارمەن قارجىلىق قولداۋ الۋعا مۇمكىندىك بەرەدى.
سونداي-اق، قارىزداردى راسىمدەۋ مەن وتەۋ ءۇشىن جۇگىنۋگە بولاتىن قارجى ينستيتۋتتارىنىڭ سانى كوبەيتىلدى. قارجىلاندىرۋ ەكىنشى دەڭگەيلى بانكتەر، نەسيە سەرىكتەستىكتەرى، الەۋمەتتىك-كاسىپكەرلىك كورپوراسيالار مەن اگرارلىق نەسيە كورپوراسياسى ارقىلى قولجەتىمدى بولادى.
كەپىلدىك جەتىسپەۋشىلىگىن شەشۋ ماقساتىندا «دامۋ» كاسىپكەرلىكتى دامىتۋ قورى نەسيە سوماسىنىڭ 85%-ىنا دەيىن كەپىلدىك بەرۋدى قاراستىرعان.