ەڭبەك كوشى-قونى سالاسىنداعى حالىقارالىق ىنتىماقتاستىقتى كەڭەيتۋ جانە قازاقستاندى Employment Permit System (EPS) جۇيەسىنە قوسۋ ماقساتىندا 2026 جىلى 21 قاڭتاردا الماتى قالاسىنا كورەيا رەسپۋبليكاسىنىڭ جۇمىسپەن قامتۋ جانە ەڭبەك مينيسترلىگىنىڭ دەلەگاسياسى كەلدى. دەلەگاسيانىڭ ساپارى قازاقستاندا EPS ورتالىعىن ۇيىمداستىرۋعا ارنالعان ينفراقۇرىلىمنىڭ دايىندىق دەڭگەيىمەن تانىسۋعا باعىتتالعان.
EPS جۇيەسىنە قوسىلۋ ءراسىمى ءۇش كەزەڭنەن تۇرادى:
1. ىشكى مەملەكەتتىك كەلىسۋ؛
2. EPS ورتالىعىن اشۋعا ارنالعان نىساندارمەن تانىسۋ جانە ولاردى تەكسەرۋ؛
3. كورەيا رەسپۋبليكاسىنىڭ ۆەدومستۆوارالىق كوميسسياسىنىڭ تۇپكىلىكتى شەشىم قابىلداۋى.
قازىرگى ۋاقىتتا قازاقستان رەسپۋبليكاسى ءبىرىنشى كەزەڭنەن ءساتتى ءوتىپ، ەكىنشى كەزەڭگە كىرىستى. بۇل كەزەڭ الماتى قالاسىندا، سونداي-اق الماتى وبلىسىندا وتكىزىلىپ، EPS ورتالىعىن اشۋعا جوسپارلانعان نىسانداردى تەكسەرەدى.
سوڭعى شەشىم بارلىق كەزەڭنەن وتكەننەن كەيىن قابىلدانادى.
ايتا كەتۋ كەرەك، ەڭبەك جانە حالىقتى الەۋمەتتىك قورعاۋ مينيسترلىگى مۇددەلى ورتالىق مەملەكەتتىك ورگاندارمەن، سونداي-اق الماتى قالاسى مەن الماتى وبلىسىنىڭ اكىمدىكتەرىمەن بىرلەسىپ، كورەيا رەسپۋبليكاسىندا زاڭسىز جۇمىس ىستەپ جۇرگەن قازاقستان ازاماتتارىنىڭ سانىن كەزەڭ-كەزەڭىمەن ازايتۋعا ارنالعان ءىس-قيمىل جوسپارىن ازىرلەدى. جوسپاردى ىسكە اسىرۋ زاڭدى ءارى ءقاۋىپسىز جۇمىسپەن قامتۋدى قامتاماسىز ەتۋگە، زاڭسىز كوشى-قوننىڭ الدىن الۋعا، سونداي-اق قازاقستاندى EPS جۇيەسىنە قوسۋ ءۇشىن قاجەتتى جاعداي جاساۋعا باعىتتالعان.