ولار ۇرلاعان زاتتارىمەن قالادان كەتۋدى جوسپارلاعان
الماتىدا پوليسەيلەر ارنايى ءىس-شارا كەزىندە ەكى ەر ادامنان قارۋ-جاراق پەن ارنايى قۇرالدار تاركىلەدى، دەپ حابارلايدى Almaty-akshamy.kz.
قالالىق كريمينالدىق پوليسيانىڭ حابارلاۋىنشا، ەكى قارۋ-جاراق دۇكەنىن تونادى دەگەن كۇدىكپەن جامبىل وبلىسىنىڭ 44 جاستاعى تۇرعىنى مەن الماتى وبلىسىنان كەلگەن 24 جاستاعى ەر ادام ۇستالدى.
جالعا الىنعان پاتەردى ءتىنتۋ كەزىندە اڭشى مىلتىعى، پاتروندار، وقتان قورعايتىن كەۋدەشە، ءدۇربى، اسكەريلەندىرىلگەن كيىمدەر، ۇيالى تەلەفوندار مەن كيەتىن زاتتار تابىلىپ، تاركىلەندى.
كۇدىكتىلەر توناعاندارىن مويىندادى. ولار ۇرلاعان زاتتارىمەن قالادان كەتۋدى جوسپارلاعاندارىن ايتتى. ۇستالعانداردىڭ جەكە باسى جاپپاي تارتىپسىزدىكتەرگە جانە باسقا دا زاڭسىز ارەكەتتەرگە قاتىسى بار-جوعىنا تەكسەرىلۋدە.
