سەنبىلىككە ءتۇرلى ۇيىمداردان 150-دەن استام ەرىكتى جۇمىلدىرىلعان
الماتى اكىمدىگى عيماراتىن ورتتەن كەيىنگى تازارتۋ جۇمىستارى جالعاسىپ جاتىر. بۇگىن كومەككە قالانىڭ ۆولونتەرلەرى كەلدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
HAQ قوعامدىق قوزعالىسىنىڭ جەتەكشىسى توعجان قوجالييەۆانىڭ ايتۋىنشا، سەنبىلىككە ءتۇرلى ۇيىمداردان 150-دەن استام ەرىكتى جۇمىلدىرىلدى.
«اتاپ ايتار بولسام، «قىزىل كرەست»، «جانسايا ابدىمالىك شاحمات اكادەمياسى»، Lider.kz، HAQ قوعامدىق قوزعالىسى، «Narkostop»، «Jas Otan» جاستار قاناتىنىڭ مۇشەلەرى، سونداي-اق كاسكادەرلار مەن الماتى قالاسىنىڭ قامقور ازاماتتارى جۇمىلدىرىلدى. ولاردىڭ بارلىعى الدىن الا جازىلدى، بىزدە ءتىزىم بار. ولار ءوز ەركىمەن كەلدى، قالانى قالپىنا كەلتىرۋگە ۇلەس قوسقىسى كەلەدى. كوبىنەسە جاستار. بۇل وتە قۋانتادى. ءبىز اكىمدىك عيماراتىنىڭ ءۇشىنشى قاباتىن تازالاپ جاتىرمىز»، - دەيدى توعجان قوجالييەۆا.
سپيكەردىڭ سوزىنشە، باستى ماقسات – كۇشىمىز بىرلىكتە ەكەنىن كورسەتۋ.
«ءبىز ەلىمىزگە، سۇيىكتى قالامىزعا كومەكتەسكىمىز كەلەدى»، - دەپ قوستى ول.
ايتا كەتەيىك، 13 قاڭتاردا ورتتەن كەيىن اكىمدىك عيماراتىن تازارتۋ جۇمىستارى باستالدى. وعان شامامەن 660 ادام جۇمىلدىرىلدى. قيراعان جيھاز، كەڭسە تەحنيكاسى، قوقىس جينالىپ، كادەگە جاراتۋ ءۇشىن پوليگوندارعا شىعارىلادى.
جايلى قالالىق ورتا باسقارماسىنىڭ باسشىسى ساپار نۇراشيەۆ ورتتەن زارداپ شەككەن قالالىق اكىمدىك عيماراتى قاشان قالىپقا كەلتىرىلەتىنىن ايتتى.
ونىڭ ايتۋىنشا، قازىرگى ۋاقىتتا عيمارات ىشىندە ءورت سالدارىنان تازارتۋ جۇمىستارى جۇرگىزىلىپ جاتىر. بۇعان شامامەن ەكى-ۇش كۇن كەتەدى. جۇمىس كولەمى وتە ۇلكەن. الداعى ۋاقىتتا ونى 100 پايىز قايتا قالپىنا كەلتىرەمىز. تەحنيكالىق تەكسەرۋ جۇرگىزىلەدى. وعان تاعى 10 كۇن كەتەدى. وسىدان كەيىن ماماندار عيماراتتى قالپىنا كەلتىرۋ بويىنشا جوبالاۋ-سمەتا قۇجاتتاماسىن ازىرلەيدى.
قالپىنا كەلتىرۋ جۇمىستارى شامامەن 5-6 ايعا سوزىلادى. بيۋدجەت ءالى انىقتالعان جوق.
