«پەرنەسىندە سويلەيدى ۇلى دالا»
بۇگىن ق ر مەملەكەتتىك ورتالىق مۋزەيىندە دومبىرا جاساۋ شەبەرلەرىنە ارنالعان «پەرنەسىندە سويلەيدى ۇلى دالا» اتتى رەسپۋبليكالىق بايقاۋدىڭ قورىتىندى كەشى ءوتتى، دەپ حابارلايدى Almaty-akshamy.kz.
بايقاۋ ق ر مادەنيەت جانە سپورت مينيسترلىگىنىڭ قولداۋىمەن ۇيىمداستىرىلعان بولاتىن. شارا اياسىندا مۋزەي قورى قازاق كۇي ونەرىنىڭ الىپتارى مەن تاريحي تۇلعالار قۇرمانعازى ساعىرباي ۇلى، اباي قۇنانباي ۇلى، جامبىل جابايەۆ، ماحامبەت وتەمىس ۇلى، اقان سەرى قورامسا ۇلى، ءبىرجان سال قوجاعۇل ۇلى، دينا نۇرپەيىسوۆا، قازانعاپ تىلەپبەرگەن ۇلى، سۇگىر ءالي ۇلى، ەسباي بالۇستا ۇلى، كەنەن ازىربايەۆ دومبىرالارىنىڭ كوشىرمەلەرىمەن تولىقتىرىلدى.
شارانىڭ باستى ماقساتى - دومبىرا جاساۋشى قولونەر شەبەرلەرىن كوپشىلىككە تانىستىرۋ جانە كۇي اتاسى قۇرمانعازىنىڭ مادەني مۇراسىن ناسيحاتتاۋ. سونداي-اق يۋنەسكو-نىڭ ماتەريالدىق ەمەس مادەني مۇرالارىنىڭ تىزىمىنە ەنگىزىلگەن «ورتەكە» اسپابى مۋزەيدىڭ «قازاق ەتنوگرافياسى» زالىنا ورنالاستىرۋ.
شارانى ق ر مادەنيەت جانە سپورت مينيسترلىگى مادەنيەت كوميتەتىنىڭ ءتوراعاسى كارىپجانوۆا روزا ساميدوللا قىزى سالتاناتتى تۇردە اشىپ، بابادان امانات بولىپ قالعان كۇمبىرلەگەن كۇي مەن اۋەلەگەن سازىمىزدىڭ بۇگىنگى كۇنگە دەيىن جەتۋى - قوس ىشەكتى دومبىرا اسپابىنىڭ قۇندىلىعىندا ەكەنىن باسا ايتتى. مۋزەي قورىن قازاق زيالىلارى دومبىرالارىنىڭ كوشىرمەسىمەن تولىقتىرۋعا ۇلەس قوسقان شەبەرلەرگە دە العىس ءبىلدىردى.
«پەرنەسىندە سويلەيدى ۇلى دالا» رەسپۋبليكالىق بايقاۋىنا قولونەر شەبەرلەرى اراسىندا ۇيىمداستىرىلعان حالىقارالىق جانە رەسپۋبليكالىق سايىستاردىڭ جۇلدەگەرلەرى مەن قازاق ونەرى مەن مادەنيەتىنە ەڭبەك سىڭىرگەن قايراتكەرلەر قاتىستى.
شارا اياسىندا قۇرمانعازى اتىنداعى قازاق ۇلتتىق حالىق اسپاپتار وركەسترى، قۇرمانعازى اتىنداعى قازاق ۇلتتىق كونسەرۆاتورياسىنىڭ ۇستازدارى جانە ق ر ەڭبەك سىڭىرگەن ارتىستەرى ايگۇل ۇلكەنبايەۆا، رامازان ستامعازييەۆ، ق ر ەڭبەك سىڭىرگەن قايراتكەرلەرى ءشامىل ابىلتايەۆ، ءابدىلحاميت رايىمبەرگەنوۆ، ەركىن شۇكىمان، مادەنيەت سالاسىنىڭ ۇزدىكتەرى دينارا نۇربايەۆا، سايان اقمولدا، تىلەۋلەس قۇرمانعالييەۆ، حالىقارالىق جانە رەسپۋبليكالىق بايقاۋلاردىڭ جۇلدەگەرلەرى سىرىم شوڭبايەۆ، بيبول عاپپار جانە دياس مۇراتحاندار ءان شىرقاپ، كۇمبىرلەگەن كۇي دە توكتى.
