قازگيدرومەت سينوپتيكتەرى 17، 18 جانە 19 قاڭتارعا ارنالعان اۋا رايى بولجامىن ۇسىندى، - دەپ حابارلايدى aqshamnews.kz ءتىلشىسى.
سينوپتيكتەر بولجامى بويىنشا، دەمالىس كۇندەرى ءسىبىر اۋماعىندا ورنالاسقان ورتالىعى بار كەڭ اۋقىمدى انتيسيكلون قازاقستاننىڭ سولتۇستىك جانە شىعىس وڭىرلەرىندە ايازدى اۋا رايىن ساقتاپ تۇرادى. ال رەسپۋبليكانىڭ باتىسى مەن وڭتۇستىگىندە اۋا رايىنا وڭتۇستىك سيكلون جانە ونىمەن بايلانىستى اتموسفەرالىق فرونتتىق بولىكتەر اسەر ەتەدى.
بۇل وڭىرلەردە جاۋىن-شاشىن (نەگىزىنەن قار تۇرىندە)، بۇرقاسىن، جەلدىڭ داۋىلدى دەڭگەيگە دەيىن كۇشەيۋى، سونداي-اق كوكتايعاق قۇبىلىستارى تۇرىندەگى قولايسىز مەتەورولوگيالىق جاعدايلار كۇتىلەدى.
"17–18 قاڭتاردا تۇركىستان، جامبىل جانە الماتى وبلىستارىنىڭ جەكەلەگەن اۋداندارىندا قاتتى جاۋىن-شاشىن بولجانادى. جاڭا اپتانىڭ باسىندا رەسپۋبليكانىڭ سولتۇستىگىنە، سولتۇستىك-باتىسىنا جانە ورتالىعىنا كەزەكتى سولتۇستىك-باتىس سيكلون ىعىسىپ، قار مەن بۇرقاسىن اكەلەدى، سونداي-اق اتالعان وڭىرلەردە اۋا تەمپەراتۋراسىنىڭ بىرتىندەپ جوعارىلاۋى كۇتىلەدى. رەسپۋبليكا بويىنشا تۇمان تۇسەدى دەپ بولجانادى"، - دەلىنگەن حابارلامادا.