الماتى پروكۋراتۋراسى بالالاردىڭ قۇقىقتارى مەن زاڭدى مۇددەلەرىن قامتاماسىز ەتۋ، ونىڭ ىشىندە اليمەنتتىك تولەمدەردى ءوندىرىپ الۋ جونىندەگى جۇيەلى جۇمىستى جالعاستىرۋدا.
كامەلەتكە تولماعانداردىڭ قۇقىقتارى مەن زاڭدى مۇددەلەرىن قورعاۋ پروكۋراتۋرا ورگاندارى قىزمەتىنىڭ باستى باسىمدىقتارىنا جاتادى، - دەپ حابارلايدى Aqshamnews.kz.
نەگىزگى باعىتتاردىڭ ءبىرى – كىرىستەردى جاسىرۋ جاعدايلارىن قوسا العاندا، اليمەنت تولەۋشىلەردىڭ مىندەتتەمەلەردى ورىنداۋىن قاداعالاۋ بولىپ تابىلادى.
پروكۋراتۋرا اليمەنت بويىنشا 1 741 757 تەڭگە قارىزى بار بورىشكەردى انىقتادى، ول كازينودان 4 ميلليون تەڭگەدەن اسا ۇتىس ۇتقان، الايدا ءۇش ايدان استام ۋاقىت بويى مىندەتتەمەلەرىن ورىنداۋدان قاساقانا جالتارعان.
كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتتىڭ ۇكىمىمەن ول، ق ر قك-نىڭ 139-بابىندا كوزدەلگەن قىلمىستىق قۇقىق بۇزۋشىلىقتى جاساعانى ءۇشىن كىنالى دەپ تانىلىپ، ءبىر جىلعا باس بوستاندىعىن شەكتەۋگە سوتتالعان.
اعىمداعى جىلدىڭ 10 ايىندا قالا پروكۋراتۋراسىنىڭ باستاماسىمەن 14 بورىشكەر اليمەنت تولەۋدەن جالتارعانى ءۇشىن قىلمىستىق جاۋاپتىلىققا تارتىلدى.
سونىمەن قاتار ق ر اقبتك-نىڭ 669-بابىمەن اليمەنت ءوندىرىپ الۋ تۋرالى سوت اكتىلەرىن ورىنداماعانى ءۇشىن 253 بورىشكەر اكىمشىلىك جاۋاپتىلىققا تارتىلدى.
قابىلدانعان شارالاردىڭ ناتيجەسىندە 16 مىڭ بالانىڭ پايداسىنا 1 ملرد تەڭگەدەن استام سوماعا اليمەنت بەرەشەگى وتەلدى.
الماتى قالاسىنىڭ پروكۋراتۋراسى كامەلەتكە تولماعان بالالاردى كۇتىپ-باعۋ مىندەتى اتا-انالارعا جۇكتەلگەنىن ەسكە سالىپ، بارشانى بالالار الدىنداعى ءوز مىندەتتەرىن ۋاقتىلى ورىنداۋعا شاقىرادى.
اليمەنت تولەۋدەن جالتارۋ اكىمشىلىك (ق ر اقبتك-نىڭ 669-بابى) جانە قىلمىستىق جاۋاپتىلىققا (ق ر قك-نىڭ 139-بابى) اكەپ سوعادى.