الماتىنىڭ يندۋستريالىق ايماعىندا بولمەارالىق ەسىك وندىرەتىن ونەركاسىپتىك كەشەننىڭ قۇرىلىسى باستالادى، دەپ حابارلايدى aqshamnews.kz
زاۋىتتى ىسكە قوسۋ 2026 جىلدىڭ تامىزىنا جوسپارلانعان.
كاسىپورىن 0،84 گەكتار اۋماقتا ورنالاسادى. مۇندا جالپى اۋدانى 2،4 مىڭ شارشى مەتردەن اساتىن وندىرىستىك سەحتار، دايىن جانە شيكىزات قويمالارى، اكىمشىلىك عيمارات جانە ينفراقۇرىلىم نىساندارى سالىنادى.
زاۋىت ىسكە قوسىلعان سوڭ نارىقتا سۇرانىسقا يە 120 مىڭ ەسىككە دەيىن ءونىم شىعارا الادى. ولاردىڭ قاتارىندا سارگالى، بويالعان، سونداي-اق زاماناۋي قاپتامالارى بار ۇلگىلەر – لامينات، پۆح، شپون، ەمال جانە ۆاندالعا ءتوزىمدى پلەنكالار بولادى.
ءوندىرىس ۇدەرىستەرى ەۋروپانىڭ «جاسىل» ستاندارتتارىنا (EU Green Standards) ساي ۇيىمداستىرىلادى. شىعارىلاتىن ءونىم قۇرامىندا كانسەروگەندىك زاتتار جوق ەكولوگيالىق ماتەريالداردان جاسالادى. ەسىك مەكتەپتەردە، بالاباقشالاردا جانە مەديسينالىق مەكەمەلەردە ورناتۋعا جارامدى، تولىقتاي ءقاۋىپسىز.
دايىن ءونىم ىشكى نارىقتى قامتاماسىز ەتۋگە جانە ورتالىق ازيا مەن شىعىس ەۋروپا ەلدەرىنە ەكسپورتتاۋعا باعىتتالعان.
جوبا اياسىندا كەمىندە 25 جاڭا جۇمىس ورنى اشىلادى. قالا بيۋدجەتىنە تۇسەتىن سالىق تۇسىمدەرى بەس جىل ىشىندە 70 ملن تەڭگەدەن اسپاق.
جوبانى «Le porte M» ج ش س جۇزەگە اسىرادى. قارجى جاعىن «Almaty Finance» ج ش س – «الماتى» الەۋمەتتىك-كاسىپكەرلىك كورپوراسياسىنىڭ ەنشىلەس ۇيىمى قامتاماسىز ەتەدى. 280 ملن تەڭگە مولشەرىندەگى قارجى 7 جىل مەرزىمگە جىلدىق 6% مولشەرلەمەمەن بەرىلگەن. نەگىزگى كەپىلگەر – «ابسوليۋت فلور» ج ش س، ول «Le porte M» كومپانياسىنىڭ سەرىكتەسى ءارى ءونىم ديستريبيۋتورى. ەلدىڭ 16 وبلىسى مەن قالالارىنداعى ءىرى قۇرىلىس كومپانيالارىمەن جۇمىس ىستەيدى.
«جوبا جەرگىلىكتى ءوندىرىستى دامىتۋعا جانە ەسىك ونىمدەرىنىڭ ساپاسىن ارتتىرۋعا باعىتتالعان. سونىمەن قاتار زاۋىت جاڭا جۇمىس ورىندارىن اشىپ، الماتىنىڭ ونەركاسىپتىك ينفراقۇرىلىمىنىڭ دامۋىنا سەرپىن بەرەدى»، – دەدى «Almaty Finance» باسقارما ءتوراعاسى بەرىك قۇسايىنوۆ.