الماتىنىڭ جەتىسۋ اۋدانىندا 2025 جىلدىڭ سوڭىنا قاراي 97 شاقىرىمنان استام جاڭا ينجەنەرلىك جەلىلەر سالىنادى
جاڭا ينجەنەرلىك جەلىلەردىڭ ارقاسىندا الماتىداعى جەتىسۋ اۋدانىنىڭ 6 مىڭنان استام تۇرعىنى ورتالىق سۋمەن جابدىقتاۋعا قوسىلادى، دەپ حابارلايدى aqshamnews.kz
الماتى اكىمى ەربولات دوسايەۆ جۇمىس ساپارى بارىسىندا جەتىسۋ اۋدانىندا سۋمەن جابدىقتاۋ جانە سۋ بۇرۋ جەلىلەرى قۇرىلىسىنىڭ بارىسىمەن تانىستى.
بۇرىن بۇل ۋچاسكەدە ماگيسترالدىق جەلىلەر بولماعان. كەڭەس زامانىندا تۇرعىندار ۇجىمدىق سۋ قۇبىرىن تارتىپ، كەيىن جەكە جەلىلەرگە قوسىلدى. قۇبىرلاردىڭ كىشى ديامەترى جانە حالىق سانىنىڭ وسۋىنە بايلانىستى قىسىم جانە سايكەسىنشە سۋ تاپشىلىعى بولدى. پايدالانۋ كەزىندە توزعان قۇبىرلار جۇكتەمەلەرگە توتەپ بەرە المادى، سونىڭ سالدارىنان ءجيى قىسىمنىڭ تومەندەۋى جانە سۋمەن جابدىقتاۋدا ۇزىلىستەر ورىن الدى.
جەتىسۋ اۋدانىندا سۋمەن جابدىقتاۋ جانە سۋدى بۇرۋدىڭ جاڭا جەلىلەرىن سالۋدىڭ اۋقىمدى قۇرىلىسى 2023 جىلدىڭ ناۋرىز ايىندا باستالدى. جوبا بويىنشا ينجەنەرلىك جەلىلەردىڭ جالپى ۇزىندىعى — 97،75 كم: 25،7 كم سۋ قۇبىرى جانە 72 كم – كارىز جەلىلەرى. بۇگىنگى تاڭدا نىساننىڭ دايىندىعى 30%-دى قۇرايدى. جۇمىستاردى اياقتاۋ 2025 جىلدىڭ جەلتوقسانىنا جوسپارلانعان.
سونداي-اق، جوبادا جولدىڭ بۇكىل ەنى بويىنشا 13 كوشەدە اسفالت توسەمىن قالپىنا كەلتىرۋ كوزدەلگەن، ونىڭ 9-ى بويىنشا جۇمىستار اياقتالدى: تايمىر، مەششەرسكيي، شىلدەحانا، فيەۆرالسكايا، وبسكايا، فەوكتيستوۆ، لەونوۆ، بىكوۆسكيي، سەرىكوۆ كوشەلەرى. بورالداي جانە وكتيابرسكايا كوشەلەرى بويىنشا ۇزىندىعى 1،5 كم جول توسەمىن قالپىنا كەلتىرۋ جۇمىستارى جۇرگىزىلۋدە. وسىنداي جۇمىستار لوگوۆايا جانە ەرمولوۆا كوشەلەرىندە دە جالعاسادى.
جوبا اياقتالعاننان كەيىن 6 مىڭعا جۋىق ابونەنت ورتالىق ينجەنەرلىك جەلىلەرمەن قامتاماسىز ەتىلەدى.
قالا باسشىسى جەتىسۋ اۋدانىنىڭ اكىمىنە قۇرىلىستىڭ بارىسى مەن ساپاسىن باقىلاۋدى جانە جۇمىستى مەرزىمىندە اياقتاۋدى تاپسىردى. ەربولات دوسايەۆ بۇل جوبانى ىسكە اسىرۋ قالالىق ينفراقۇرىلىمدى جانە جەتىسۋ اۋدانى تۇرعىندارىنىڭ ءومىر ءسۇرۋ ساپاسىن جاقسارتۋداعى ماڭىزدى قادام ەكەنىن اتاپ ءوتتى.