كەلەسى جىلى بيوفارماسيەۆتيكالىق كەشەن سالىنادى
الماتىدا جالپى ينۆەستيسيا كولەمى 15،4 ملرد تەڭگەنى قۇرايتىن بەس ءىرى ءوندىرىس ورنى سالىنۋدا، دەپ حابارلايدى Almaty-akshamy.kz LS-كە سىلتەمە جاساپ.
قالا اكىمدىگىنىڭ مالىمەتىنشە، قۇرىلىس جۇمىستارى وسى جىلى باستالعان. «يننوۆاسيالىق تەحنولوگيالار پاركى» ارنايى ەكونوميكالىق ايماعىندا فارماسيەۆتيكالىق جوبا 11،1 ملرد تەڭگەگە جۇزەگە اسىرىلادى. مۇندا كەلەسى جىلى زاماناۋي دارىلىك پرەپاراتتاردى ازىرلەۋ جانە شىعارۋ بويىنشا بيوفارماسيەۆتيكالىق كەشەندى ىسكە قوسۋ جوسپارلانىپ وتىر. كاسىپورىندا 231 ادام جۇمىسپەن قامتىلماق.
سونداي-اق، مەگاپوليستە 1،5 ملرد تەڭگەگە ارماتۋرالايتىن تور، كۆارس اگلومەراتتارى مەن ءپروفيلدى قۇبىرلار شىعاراتىن زاۋىت سالىنۋدا.
«اكىمشىلىك عيماراتتىڭ ەكىنشى قاباتىن قالاۋ جۇمىستارى جۇرگىزىلۋدە. جەر ۋچاسكەسىن جوسپارلاۋ بويىنشا جۇمىستار اياقتالدى. ينجەنەرلىك جەلىلەردى سالۋ باستالدى»، - دەدى اكىمدىكتە.
كاسىپورىن 2024 جىلى ىسكە قوسىلىپ. جاڭا 100 جۇمىس ورنى قۇرىلادى.
ءۇشىنشى ءىرى جوبا – گازدالعان بەتون بلوكتارىن شىعاراتىن زاۋىت سالۋ. ينۆەستيسيالار – 1،24 ملرد تەڭگە. اقپاراتقا سايكەس، مەتالل كونسترۋكسيالار مەن سەندۆيچ-پانەلدەردى مونتاجداۋ اياقتالدى. قازىرگى ۋاقىتتا ينجەنەرلىك جەلىلەر قوسىلىپ، تەحنولوگيالىق جابدىقتاردى مونتاجداۋ جۇرگىزىلۋدە. كاسىپورىن 2022 جىلى اشىلىپ، 30 ادام جۇمىسقا ورنالاسادى.
سونداي-اق، مەگاپوليستە كەلەسى جىلى 800 ملن تەڭگەگە تومەن ۆولتتى جۇيەنىڭ ەلەكتر تەحنيكالىق جابدىقتارىن شىعاراتىن زاۋىت سالىنىپ، ىسكە قوسىلادى. نىساندا 50 ادام جۇمىسپەن قامتىلادى.
بەسىنشى ءىرى ءوندىرىستىڭ اشىلۋى 2023 جىلعا جوسپارلانىپ وتىر. قالادا 800 ملن تەڭگەگە لاك-بوياۋ ونىمدەرىن شىعاراتىن زاۋىت سالىنىپ جاتىر. اتاپ ايتقاندا، باستاپقى ىرگەسىن كوتەرۋ جۇمىستارى باستالدى. جۇمىسپەن 120 ادام قامتاماسىز ەتىلەدى.
بۇعان دەيىن، LS رەداكسياسى يندۋستريالىق ايماقتا تۇرىك ينۆەستيسيالارى بار ەكى زاۋىت سالىنا باستاعانىن جازعان بولاتىن. وسىلايشا، 2023 جىلى 1،5 ملرد تەڭگەگە مەتالل قورشاۋلار ءوندىرىسى ىسكە قوسىلادى. كاسىپورىندا جىلىنا 12 مىڭ توننا جول قورشاۋلارى مەن 15 مىڭ توننا ىستىق مىرىشتاۋ بۇيىمدارى شىعارىلاتىن بولادى. جانە 3،7 ملرد تەڭگەگە Panelsan سەندۆيچ-پانەلدەرىن شىعاراتىن زاۋىت ىسكە قوسىلادى. نىساندا جىلىنا 1 ملن شارشى مەترگە دەيىن ءونىم شىعارۋ جولعا قويىلماق.