ۇلتتىق كينونى قولداۋ مەملەكەتتىك ورتالىعى ەلىمىزدىڭ تۇكپىر-تۇكپىرىندە قازاق كينوسىنىڭ ونكۇندىگى شاراسىن جالعاستىرۋدا. 28 ناۋرىزدا شارا جامبىل وبلىسىندا مادەنيەت جانە تىلدەردى دامىتۋ باسقارماسىنىڭ قولداۋىمەن ءوتتى.
تاراز قالالىق مادەنيەت ۇيىندە ۇيىمداستىرىلعان شارادا ق ر مادەنيەت جانە اقپارات مينيسترلىگىنىڭ، سونداي-اق كينو ورتالىعىنىڭ قولداۋىمەن تۇسىرىلگەن «جامبىل. جاڭا ءداۋىر» ءفيلمى كورسەتىلدى.
«تاريحىڭدى بىلمەسەڭ، كەلەشەكتى بولجاي المايسىڭ» دەگەن ءسوز بار. ءبىزدىڭ دە جامبىل وبلىسىندا «جامبىل. جاڭا ءداۋىر» ءفيلمىن ۇسىنۋىمىز بەكەر ەمەس. بيىل 6 جىلدىعىن اتاپ وتكەن ۇلتتىق كينو ورتالىعىنىڭ نەگىزگى ميسسياسى – وتكەننەن سىر تارتىپ، وسىنداي تاريحي تۇلعالارىمىزدىڭ جارقىن مۇراسىن جاس ۇرپاققا ناسيحاتتاۋ.
ءفيلمنىڭ اتى ايتىپ تۇرعانداي، قازاق اۋىز ادەبيەتىنىڭ ايتۋلى تۇلعاسى، جىر الىبى جامبىل جابايەۆ تۋرالى. فيلمدە اقىننىڭ ومىرىنە اسەر ەتكەن ايتۋلى وقيعالار سۋرەتتەلگەن. اتاپ ايتقاندا، اقىندار سلەتى، اقىن ولەڭدەرىنىڭ باسپاسوزدە جاريالانۋى. سونداي-اق جامبىل جابايەۆتىڭ وراز جاندوسوۆپەن جانە باسقا دا كورنەكتى قايراتكەرلەرمەن كەزدەسۋى كورسەتىلەدى. شارا ەلىمىزدىڭ وزگە وڭىرلەرىندە دە جالعاسادى. ءبىزدىڭ ماقسات – اۋىل-ايماقتاعى كورەرمەندى وتاندىق كينومىزبەن، ورتالىقتىڭ فيلمدەرىمەن تانىستىرۋ»، – دەدى ۇلتتىق كينونى قولداۋ ورتالىعىنىڭ باسقارما ءتوراعاسى قۇرمانبەك جۇماعالي.
تاريحي بايوپيكتىڭ سەناريسى ءارى قويۋشى-رەجيسسەرى – جاندوس قۇسايىنوۆ. شىعارماشىلىق توپ تۋىندىعا كىرىسپەس بۇرىن ارحيۆتەردى اقتارعانىن ەسكەرۋ كەرەك. ول ءۇشىن ءتىپتى ماسكەۋدەگى مۇراعاتتار زەرتتەلگەن.
ايتا كەتەيىك، بۇعان دەيىن قازاق كينوسىنىڭ ونكۇندىگى قاراعاندى وبلىسىندا ءوتتى.