الماتىدا ازەربايجان مەن ارمەنيا رەسپۋبليكاسىنىڭ سىرتقى ىستەر مينيسترلەرى دجەيحۋن بايراموۆ پەن ارارات ميرزويان اراسىنداعى كەلىسسوز اياقتالدى.
ەكى تاراپ اشىق ماسەلەلەر بويىنشا كەلىسسوزدەردى جالعاستىرۋعا ۋاعدالاستى. بۇل تۋرالى ازەربايجان مەن ارمەنيا سىرتقى ىستەر مينيسترلىكتەرى حابارلادى.
ديپلوماتتار الماتى دوستىق ۇيىندە وتكەن كەلىسسوز ەكى مەملەكەت اراسىندا بەيبىتشىلىك ورناتۋ تۋرالى ەكىجاقتى كەلىسىم جوباسىن تالقىلاۋعا كومەكتەسكەنىن اتاپ ءوتتى.
«مينيسترلەر مەن ولاردىڭ دەلەگاسيالارى ءازىربايجان مەن ارمەنيا اراسىنداعى بەيبىتشىلىك پەن مەملەكەتارالىق قاتىناستاردى ورناتۋ تۋرالى ەكىجاقتى كەلىسىم جوباسىنىڭ ەرەجەلەرىن تالقىلادى. تاراپتار ءالى دە كەلىسىلمەگەن ماسەلەلەر بويىنشا كەلىسسوزدى جالعاستىرۋعا كەلىستى»، - دەلىنگەن ءازىربايجان ءسىم مالىمدەمەسىندە.
مينيسترلەر دەليميتاسيا بويىنشا ىلگەرىلەۋدى، سونداي-اق وسى باعىتتا قول جەتكىزىلگەن كەلىسىمدەردى قۇپتادى.
«ساپار بارىسىندا مينيسترلەر قازاقستان پرەمەر-مينيسترىنىڭ ورىنباسارى، سىرتقى ىستەر ءمينيسترى مۇرات نۇرتىلەۋمەن جەكە جانە ءۇشجاقتى فورماتتا كەزدەستى»، - دەلىنگەن حابارلامادا.
ەكى مەملەكەتتىڭ سىرتقى ىستەر ۆەدومستۆولارىنىڭ باسشىلارى دجەيحۋن بايراموۆ پەن ارارات ميرزويان كەلىسسوز الاڭىن ۇسىنعان قازاقستانعا العىس ءبىلدىردى.
ەسكە سالايىق، 10 مامىر كۇنى ازەربايجان مەن ارمەنيانىڭ cىرتقى ىستەر مينيسترلەرى كەلىسسوز جۇرگىزۋگە الماتىعا كەلگەن بولاتىن.