الماتىدا ورنالاسقان قازاقستان رەسپۋبليكاسى مەملەكەتتىك ورتالىق مۋزەيىندە جەتكىنشەكتەردىڭ يگىلىگى ءۇشىن بىرنەشە ۇيىرمە جۇمىس ىستەيدى.
شىعارماشىلىققا جاقىن بالالار ۇيىرمەلەرگە ءارقاشان قۋانا دا اسىعا كەلەدى دەيدى مۋزەي ماماندارى.
اتالمىش مۋزەيدىڭ پەداگوگتارى جۋىردا «شەبەرKIDS» قولونەر ۇيىرمەسى (جەتەكشىسى ايجان قۇربانوۆا) شەڭبەرىندە كىشى جانە ۇلكەن توپتارعا ارنالعان شەبەرلىك ساباقتارىن وتكىزدى. «قازاقتىڭ ۇلتىق ويۋ-ورنەكتەرى» تاقىرىبىندا بالالار كيىزدەن ويۋ-ورنەك («قوشقار ءمۇيىز»، «تۇيە ءىزى»، «قۇس قاناتى») كەستەلەنگەن ساندىك توسەنىشتەر جاسادى.
ال «الماتى – ورتاق ءۇيىمىز» اكسياسى اياسىندا «شىعارماشىلىقتىڭ باسپالداقتارى» ينكليۋزيۆتى ۇيىرمەسىندە (جەتەكشىسى زۋحرا بايانوۆا) ورەندەرگە ارنالعان «قىزعالداقتار قۋانىش سىيلايدى» تاقىرىبىندا ينكليۋزيۆتى ساباق وتكىزىلدى.
ساباققا «بيىك بەلەسكە باعىت» قوعامدىق قورى جانە «شىڭعا ورلەۋ» الەۋمەتتىك كلۋبىنىڭ بالالارى شاقىرىلدى. ۇيىرمەنىڭ ۇيىتقىسى بولعان ۇلكەندەر كىشكەنتاي دوستارعا الماتىنىڭ كورىكتى جەرلەرى تۋرالى اقپارات بەردى جانە تابيعاتتى ءسۇيۋ، ونى ايالاي ءبىلۋ كەرەكتىگىن ءتۇسىندىردى. الماتىدا وسەتىن قىزعالداقتار تۋرالى مالىمەتتەر ايتىلىپ، بالالار ءتۇرلى-تۇستى قاعازدان «قىزعالداق» اپپليكاسياسىن جاسادى.