الماتىدا اۋا ساپاسىن جاقسارتۋعا باعىتتالعان كەشەندى جۇمىس جالعاسۋدا. قالالىق شىعارىندىلاردىڭ شامامەن 60 پايىزى اۆتوكولىكتەردەن شىعاتىندىقتان، وسى باعىتقا ەرەكشە كوڭىل اۋدارىلىپ وتىر. بۇل تۋرالى قالانىڭ ەكولوگيا جانە قورشاعان ورتا باسقارماسىنىڭ وكىلدەرى ايتتى.
اتموسفەرالىق اۋانى قورعاۋ جونىندەگى شارالار جوسپارى اياسىندا ەكولوگيالىق قىزمەت ماماندارى پوليسيا دەپارتامەنتىمەن بىرلەسىپ جولدا رەيدتەر جۇرگىزۋدە. «Eco Almaty» ءجشس-نىڭ جىلجىمالى زەرتحانالارى كولىك قۇرالدارىنىڭ شىعارىندىلار دەڭگەيىن وقيعا ورنىندا ولشەيدى.
ايتا كەتەيىك، 2025 جىلى Eco Almaty جانە «رەنەسسانس پليۋس» كومپانياسىنىڭ قىزمەتكەرلەرى 186 مىڭنان استام ولشەم جۇرگىزىپ، 20 مىڭعا جۋىق حاتتاما جاسادى. سالىنعان ايىپپۇلداردىڭ جالپى سوماسى 653 ملن تەڭگەدەن استى.
جوسپار اياسىندا قاتتى وتىندى قولداناتىن قوعامدىق تاماقتانۋ ورىندارى – كاۋاپحانالار مەن مونشالاردى انىقتاۋ بويىنشا جۇمىستار دا قولعا الىنعان. بۇل باعىتتاعى جۇمىستار جالعاسىپ جاتىر.
ەسكە سالا كەتەيىك، الماتىدا «الماتى قالاسىنىڭ اۋماعىندا اتموسفەرالىق اۋانى قورعاۋ سالاسىنداعى ارنايى ەكولوگيالىق تالاپتاردى ەنگىزۋ تۋرالى» جاڭا ەرەجەلەر جوباسى ازىرلەنگەن. قۇجات ءقازىر كەلىسۋ راسىمىنەن ءوتىپ جاتىر. ەرەجە حالىق پەن بيزنەسكە قولداۋ شارالارىن ەنگىزۋگە، ەكولوگيالىق تەحنولوگياعا كوشۋگە جانە اۆتوپاركتى جاڭارتۋعا قۇقىقتىق نەگىز قالىپتاستىرادى.
ەرەجەلەر قابىلدانعاننان كەيىنگى ناتيجە جان-جاقتى بولماق. نەگىزگى لاستاۋشى رەتىندە اۆتوپارك باستى ەكولوگيالىق باقىلاۋعا الىنادى. بۇرىن رەتتەۋگە شامالى تارتىلعان III ساناتتاعى كاسىپورىندار دا جاڭا تالاپتارعا باعىنادى: ولار ەكولوگيالىق نورمالاردى ساقتاۋعا جانە تەكسەرۋدەن وتۋگە مىندەتتى. سونىمەن قاتار اۋا ساپاسىن جەدەل باقىلاۋعا مۇمكىندىك بەرەتىن ءبىرىڭعاي مونيتورينگ جۇيەسى قۇرىلىپ، تۇرعىندارعا اشىق دەرەكتەر ۇسىنىلادى. قالادا LEZ ايماقتار پايدا بولادى. بۇل كولىك قوزعالىسىنا ەكولوگيالىق تالاپتار ەنگىزىلەتىن اۋماقتار، ولاردىڭ ماقساتى – اۋا لاستانۋىن ازايتۋ جانە قالالىق ورتانى جاقسارتۋ.