الماتى قالاسىنىڭ ءماسليحاتىندا كوممۋنالدىق ينفراقۇرىلىم، تۇرعىن ءۇي ينسپەكسياسى، ەنەرگەتيكا، سۋمەن جابدىقتاۋ جانە قالالىق موبيلدىلىك جونىندەگى تۇراقتى كوميسسيانىڭ وتىرىسى ءوتتى. وندا ق ر زاڭناماسىنداعى اۋىر جۇك اۆتوكولىكتەرىنىڭ تالاپتاردى ساقتاۋ ماسەلەسى قارالدى، - دەپ حابارلايدى Aqshamnews.kz.
وتىرىستا جول قوزعالىسىن ۇيىمداستىرۋ جانە جولاۋشىلار كولىگى باسقارماسىنىڭ وكىلدەرى قالا بويىنشا جۇك كولىكتەرىنىڭ قوزعالىسىن رەتتەۋ بويىنشا قابىلدانىپ جاتقان شارالار مەن ۇسىنىستار تۋرالى باياندادى. مالىمەتتەرگە سايكەس، رۇقسات ەتىلگەن ماسساسى 3،5 توننادان اساتىن كولىكتەردىڭ قوزعالىسىن شەكتەۋ كولىك قۇرالدارىنان شىعاتىن زياندى زاتتاردىڭ جالپى كولەمىن 6%-عا، ال كەيبىر ءقاۋىپتى كومپونەنتتەر بويىنشا 30%-عا دەيىن ازايتۋعا مۇمكىندىك بەرەدى. وسىنداي تاجىريبە ماسكەۋ، سانكت-پەتەربۋرگ، كازان، لوندون، بۋداپەشت جانە بەيجىڭ قالالارىندا ءساتتى ىسكە اسىرىلىپ كەلەدى.
پروفيلدىك كوميسسيانىڭ ءتوراعاسى، ءماسليحات دەپۋتاتى سادير حامرايەۆ جولدارداعى شامادان تىس جۇكتەمە ماسەلەسى بۇرىننان بار ەكەنىن جانە ونى جۇيەلى شەشۋ قاجەتتىگىن اتاپ ءوتتى. ونىڭ ايتۋىنشا، قالانىڭ قاۋىپسىزدىگى مەن جولداردىڭ ساقتالۋى باستى باسىمدىق، الايدا جۇكتەمە نورمالارى ءجيى بۇزىلادى، سونىڭ سالدارىنان جول جابىنى مەرزىمىنەن بۇرىن توزادى.
«بۇگىن ءبىز جۇمىس توبىن قۇرىپ، جول پوليسياسى، كولىك باقىلاۋ جانە جول قوزعالىسىن ۇيىمداستىرۋ باسقارماسىمەن بىرلەسكەن جۇمىستى كۇشەيتۋ تۋرالى شەشىم قابىلدادىق. ب ا ق وكىلدەرىنىڭ قاتىسۋىمەن رەيدتەر ۇيىمداستىرىلىپ، زاڭ تالاپتارىن بۇزاتىن جۇرگىزۋشىلەر مەن كومپانيالار انىقتالادى»، – دەدى دەپۋتات.
سونداي-اق ول الماتىدا جۇك كولىكتەرىنىڭ سالماعىن ولشەيتىن تەك ءبىر عانا جىلجىمالى ستانسيا جۇمىس ىستەيتىنىن ايتىپ، كولىك باقىلاۋ ورگاندارىن زاماناۋي ولشەۋ قۇرالدارىمەن قوسىمشا جابدىقتاۋ قاجەت ەكەنىن جەتكىزدى.
ءماسليحات دەپۋتاتى رۋسلان يدريسوۆ قالا جولدارىنىڭ تەحنيكالىق نورمالارىن ساقتاۋ ماڭىزدىلىعىن اتاپ ءوتتى.
«قالاداعى اسفالت جابىندىسى ءبىر وسكە 8 توننا جۇكتەمەگە ەسەپتەلگەن. ءبىز وسى نورمانى ساقتاۋىمىز كەرەك. كەيبىر جۇك كولىكتەرى نورمادان ارتىق، 18 تونناعا دەيىن تاسىمالدايدى، بۇل جولدىڭ تەز بۇزىلۋىنا اكەلەدى. سوندىقتان جولدارعا ارنايى سالماق ولشەيتىن داچيكتەر ورناتىپ، جۇكتەمەنى اۆتوماتتى تۇردە باقىلاۋ قاجەت»،-دەدى ر.يدريسوۆ.
الماتى قالاسىنىڭ پوليسيا دەپارتامەنتى باستىعىنىڭ ورىنباسارى ەرجان ۇزابايەۆ قازىرگى ۋاقىتتا اۋىر جۇك كولىكتەرىنىڭ قوزعالىسىنا شەكتەۋ تەك ءۇش ماگيسترالدا، ءال-فارابي، دوستىق جانە نازاربايەۆ داڭعىلدارىندا بار ەكەنىن حابارلادى. ول زاڭناماعا وزگەرىستەر ەنگىزىپ، مۇنداي ايماقتاردى كەڭەيتۋ قاجەتتىگىن اتاپ ءوتتى.
وتىرىس قورىتىندىسى بويىنشا جول قوزعالىسىن ۇيىمداستىرۋ باسقارماسى، كولىك باقىلاۋ جانە پوليسيا اراسىندا ءوزارا ءىس-قيمىلدى ۇيلەستىرەتىن جۇمىس توبى قۇرىلاتىن بولدى. سونىمەن قاتار دەپۋتاتتار جولداردىڭ جۇكتەمەسىن ولشەۋگە ارنالعان قوسىمشا قۇرالدارمەن جابدىقتاۋ جانە الماتى قالاسىندا جۇك كولىكتەرىنىڭ قوزعالىسىن وڭتايلاندىرۋ تۇجىرىمداماسىن ازىرلەۋ باستاماسىن كوتەردى.
بۇدان بىلاي زاڭ تالاپتارىنىڭ ساقتالۋىن باقىلاۋ جانە شامادان تىس جۇكتەمەنىڭ الدىن الۋ ماسەلەلەرى تۇراقتى تۇردە ۆەدومستۆوارالىق ءوزارا جۇمىستىڭ ءبىر بولىگىنە اينالادى.