بۇگىندە مەملەكەت باسشىسىنىڭ تاپسىرماسىنا سايكەس، ەلىمىزدىڭ 20 وڭىرىندە پسيحولوگيالىق قولداۋ كورسەتۋ ورتالىقتارى جۇمىس جاساۋدا.
بۇل ورتالىقتار مەكتەپ پسيحولوگتارىنا ادىستەمەلىك قولداۋ كورسەتەدى جانە وقۋشىلار مەن ولاردىڭ اتا-انالارىنا كەڭەس بەرۋمەن اينالىسادى، - دەپ حابارلايدى Aqshamnews.kz وقۋ-اعارتۋ مينيسترلىگىنە سىلتەمە جاساپ.
بيىلعى جىلدىڭ باسىنان ورتالىقتار 13 مىڭنان استام بالاعا جانە شامامەن 10 مىڭ اتا-اناعا پسيحولوگيالىق جانە كونسۋلتاسيالىق كومەك ۇسىندى.
ەلىمىزدىڭ ءبىلىم بەرۋ ۇيىمدارىندا 9 مىڭنان استام مامان وقۋشىلار مەن ولاردىڭ اتا-انالارىنا پسيحولوگيالىق-پەداگوگيكالىق قولداۋ كورسەتۋدە. جىل سايىن ولاردىڭ كومەگىن ونداعان مىڭ بالا انىق سەزىنەدى.
مينيسترلىك پەداگوگ-پسيحولوگتاردىڭ شتات سانىن ارتتىرۋ، ءبىلىم بەرۋ ۇيىمدارىنداعى پسيحولوگيالىق قىزمەتتىڭ نورماتيۆتىك-قۇقىقتىق بازاسىن جەتىلدىرۋ بويىنشا ءبىرقاتار شارالاردى جۇزەگە اسىرۋدا.
«مەملەكەت مەكتەپتەردەگى پسيحولوگيالىق قىزمەتتى كۇشەيتۋگە ەرەكشە ءمان بەرەدى. پەداگوگ-پسيحولوگتاردىڭ سانىن ارتتىرۋ، ماماندارعا كاسىبي جانە ادىستەمەلىك قولداۋ كورسەتۋ بويىنشا جۇيەلى جۇمىستار جۇرگىزىلۋدە، پسيحولوگيالىق قىزمەت تۋرالى زاڭ جوباسىن ازىرلەۋ قاراستىرىلۋدا. بۇل شارالاردىڭ بارلىعى بالالارعا كورسەتىلەتىن پسيحولوگيالىق كومەكتىڭ ساپاسىن ارتتىرۋعا باعىتتالعان»، — دەيدى وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ ءتوراعاسى ناسىمجان وسپانوۆا.
ەستەرىڭىزگە سالا كەتەيىك، مەملەكەت باسشىسىنىڭ ۇلتتىق قۇرىلتايدىڭ IV وتىرىسىندا بەرگەن تاپسىرماسىنا سايكەس، قازاقستان رەسپۋبليكاسىنىڭ ءماجىلىس دەپۋتاتتارى «پسيحولوگيالىق قىزمەت تۋرالى» زاڭ جوباسىن ازىرلەپ، ەنگىزگەن بولاتىن. قۇجات پسيحولوگيالىق كومەك كورسەتۋ ينستيتۋتىن جۇيەلى دامىتۋعا باعىتتالعان جانە قازىرگى ۋاقىتتا مەملەكەتتىك ورگانداردا كەلىسۋ كەزەڭىنەن وتۋدە.