جالپى ەلدەگى كولىكتەردىڭ 60 پايىزى ەسكى.
شاھاردىڭ ەكو-بەكەتتەرىندە ءبىر جىل ىشىندە 223 مىڭنان اسا ماشينا توقتاتىلسا، ونىڭ 34 مىڭىنان شامادان تىس ۋلى گاز بولىنەتىنى انىقتالعان. ەندى بيىلدان باستاپ تۇتىندەگەن كولىكتەردى «ەكوسەرگەك» بەينەكامەرالارى انىقتاپ، پوليسياعا ءتىزىمىن بەرىپ وتىرادى، دەپ حابارلايدى Almaty-akshamy.kz.
«بۇل كامەرالار كوشەدەگى بارلىق كولىكتەردى تۇسىرەدى. شامادان تىس تۇتىندەگەن تەحنيكالاردى بىردەن انىقتالىپ، ورتالىق جۇيەگە تۇسەدى. ارى قاراي ءتارتىپ ساقشىلارى اينالىسادى»، - دەيدى جوبا مەنەدجەرى اندرەي ليتۆينوۆ.
ەكولوگتار قالاداعى اۋانىڭ لاستانۋىنا باستى سەبەپ – وسى كولىكتەردەن شىعاتىن زياندى زاتتار ەكەنىن ايتادى. ءقازىر تەمىر تۇلپارلاردىڭ ەكولوگياعا اسەرى 70%-عا جەتكەن. سوندىقتان ءار جۇرگىزۋشى بۇل ماسەلەگە جاۋاپكەرشىلىكپەن قاراعاندا عانا وڭ شەشىمىن تابادى دەپ وتىر.
«ەكولوگيانىڭ جاقسارۋى تەك مۇنداي اكىمشىلىك شارالارعا عانا ەمەس، حالىقتىڭ وزىنە تىكەلەي بايلانىستى. حالىقتىڭ ەكولوگيالىق مادەنيەتىنىڭ تومەندىگى ءبىزدىڭ ەكولوگيالىق احۋالىمىزدى جاقسارتۋعا كەدەرگى كەلتىرىپ وتىرعان فاكتور»، - دەيدى ەكولوگ دىنمۇحامەد لەسبەكوۆ.
مامانداردىڭ سوزىنشە، ەلىمىز بويىنشا قولدانىستاعى كولىكتەردىڭ 60%-ى 20 جىلدان اسقان. ءقازىر ەكولوگيالىق باقىلاۋ سالاسىنداعى زاڭدارعا ەنگىزۋ مەن تۇزەتۋلەر ەنگىزۋ ماجىلىستە قارالىپ جاتىر. ماسەلەن، بۇعان دەيىن اۋانى لاستاۋشى كولىكتەردىڭ جۇرگىزۋشىلەرىنە العاشقىدا ەسكەرتۋ بەرىلسە، ەندى بۇل ءتارتىپ الىنىپ تاستالۋى مۇمكىن.
قالا اكىمدىگى ەكولوگيانى جاقسارتۋ ماسەلەسى وزەكتى ەكەنىن جاقسى بىلەدى. ءقازىر قالاداعى قوعامدىق كولىكتەر گازعا اۋىستىرىلىپ جاتىر. ال ەسكى تەمىر تۇلپارلاردىڭ پروبلەماسى ءالى كۇن تارتىبىندە تۇر. مەگاپوليستە وتكەن جىلدىڭ وزىندە اۋانى لاستاعان كولىك يەلەرىنە 207 ملن تەڭگەدەن اسا ايىپپۇل سالىنعان.