مەديابىلىم بەرۋ جاعدايىنداعى جۋرناليستيكا جانە PR
وسىنداي اتاۋمەن بوكەتوۆ ۋنيۆەرسيتەتىنىڭ فيلولوگيا فاكۋلتەتىندە جۋرناليستيكا كافەدراسىنىڭ 30 جىلدىعىنا ارنالعان فورۋم ءوتتى. سالتاناتتى جيىن كافەدرادا قىزمەت ەتكەن ۇستازداردىڭ، تۇلەپ ۇشقان تۇلەكتەردىڭ باسىن قوستى، دەپ حابارلايدى Almaty-akshamy.kz.
فورۋمعا «Alatau - Aqparat» مەدياحولدينگىنىڭ باس ديرەكتورى ەرجان قالىمباي ۇلى قاتىسىپ، ءوز ۇسىنىسىن ايتتى. بۇدان بىلاي «جۋرناليستيكا» جانە «قوعاممەن بايلانىس» ستۋدەنتتەرى «Almaty Aqshamۋ»، «ۆەچەرنيي Almaty» باسىلىمدارى مەن مەدياحولدينگ سايتىنان وندىرىستىك ىس-تاجىريبەدەن وتە الادى. ەندى ە.ا.بوكەتوۆ ۋنيۆەرسيتەتى مەن «Alatau - Aqparat» مەدياحولدينگى ەكىجاقتى مەموراندۋم اياسىندا بىرلەسىپ جۇمىس جاساي الادى.
ءوز سوزىندە ەرجان قالىمباي ۇلى: «قازىرگى ۋاقىتتا جۋرناليستەر ۇلتتىق جۋرناليستيكاعا، اقپاراتتىق ساياساتتىڭ قالىپتاسۋىنا، مەملەكەتتىك سانانىڭ ورنىعۋىنا وزدەرىنىڭ قالام قارىمىمەن تابىستى ەڭبەك ەتەدى. ارىپتەستەرىمىز قازاقستاندا عانا ەمەس، شەت مەملەكەتتە دە جەمىستى قىزمەت ەتۋدە. جۋرناليستيكا سالاسىندا عانا ەمەس، مەملەكەتتىك قىزمەتتە، بۇقارامەن بايلانىس، ۇكىمەتپەن بايلانىس سالاسىندا دا ەڭبەك ەتىپ جۇرگەن ارىپتەستەرىمىز جەتەرلىك. ءبىز ءارقاشان بوكەتوۆ ۋنيۆەرسيتەتى جۋرناليستيكا كافەدراسىنىڭ تۇلەگى ەكەنىمىزدى اسا ماقتانىشپەن ايتىپ جۇرەمىز. الداعى ۋاقىتتا دا وسى قاراشاڭىراقتا ءوز ءىسىنىڭ حاس شەبەرى اتاناتىن، ءبىلىمدى دە بىلىكتى ماماندار شىعاتىنىنا سەنىمىمىز مول»، — دەدى.
ءىس-شارانىڭ باسىندا فورۋم قاتىسۋشىلارى جۋرناليستيكا كافەدراسىنىڭ تاريحى جايلى قىسقامەتراجدى ءفيلمدى تاماشالادى. جيىندا قالامى قارىمدى جۋرناليست، قازاقستاننىڭ ەڭبەك سىڭىرگەن قايراتكەرى، قازاقستان جوعارى مەكتەبىنىڭ اكادەميگى زارقىن تايشىباي «وسىدان 30 جىل بۇرىن قازاق ۇلتتىق ۋنيۆەرسيتەتىنەن كەيىن قاراعاندى بوكەتوۆ ۋنيۆەرسيتەتى جۋرناليستيكا ماماندىعىن اشۋ باقىتىنا يە بولدى. اقپارات مايدانىندا يىقتاسا قاتار شايقاسىپ جۇرگەن جۋرناليستەرگە تەك ساتتىلىك تىلەيمىن. تاۋەلسىزدىكتى تۋ ەتىپ، قاجىرلى ەڭبەك ەتىڭدەر. جازارلارىڭ كوپ، سوزدەرىڭ ءوتىمدى، ەڭبەكتەرىڭ جەمىستى بولسىن!» دەي كەلە، سوناۋ 1993 جىلى ءوزى نەگىزىن قالاعان جۋرناليستيكا كافەدراسىنىڭ تاريحىنا كەڭىنەن توقتالدى.
كافەدرادا ۇستازدىق قىزمەت ەتكەن ارداگەر ۇستازدار، بۇقارالىق اقپارات قۇرالدارىنىڭ تىزگىنىن ۇستاعان وزگە تۇلەكتەر دە ۋنيۆەرسيتەت قابىرعاسىندا وتكەن جىلداردىڭ ەستەن كەتپەس ىستىق ەستەلىكتەرىمەن ءبولىستى. جاس ۇرپاققا جۋرناليستيكانىڭ قىر-سىرىن ۇيرەتكەن قۋاندىق شاماحاي، ماعاۋيا سەمباي، كارىم ساۋعابايەۆ، مارتبەك توقمىرزا سىندى تاۋ تۇلعالاردى ساعىنىشپەن ەسكە الدى.
جۋرناليستيكا كافەدراسى وتىز جىلدىڭ ىشىندە ەكى مىڭعا جۋىق تۇلەكتى قاناتتاندىردى. قازىرگى تاڭدا جۋرناليستيكا جانە قوعاممەن بايلانىس ماماندىقتارىندا وقيتىن ءبىلىم الۋشىلارعا ەكى پروفەسسور، ەكى قاۋىمداستىرىلعان پروفەسسور، 1 PhD دوكتور، تاجىريبەلى اعا-وقىتۋشىلار مەن بۇقارالىق اقپارات قۇرالدارى سالاسىنىڭ ماماندارى ءدارىس بەرەدى. مامانداردىڭ تەوريالىق بىلىمىمەن قاتار پراكتيكالىق بىلىكتىلىگى دە جوعارى. ستۋدەنتتەردىڭ شىعارماشىلىعىن شىڭداۋىنا بارلىق جاعداي جاسالعان. وقۋ تەليەۆيزياسى مەن Buketov راديوسىندا، بوكەتوۆ ۋنيۆەرسيتەتىنىڭ باسپا ءسوز قىزمەتىندە، «جاستار الەمى» جۋرنالىنىڭ رەداكسياسىندا تەوريالىق ءبىلىمدى پراكتيكامەن ۇشتاستىرادى. تۇلەكتەر جەتەكشى بۇقارالىق اقپارات قۇرالدارىندا، باسپا ءسوز قىزمەتتەرىندە، اقپاراتتىق جانە جارنامالىق اگەنتتىكتەردە جەمىستى قىزمەت ەتۋدە.
ءىس-شارانىڭ العاشقى رەسمي ءبولىمى اياقتالعاننان كەيىن فورۋمعا قاتىسۋشىلار ءۇش سەكسياعا ءبولىندى. بەلگىلى جۋرناليستەر مەن PR-ماماندار جۋرناليستيكا تەورياسى مەن پراكتيكاسىنا، مەديابىلىم بەرۋگە، مەدياەتيكاعا جانە مەدياكوممۋنيكاسيانىڭ باسقا دا اسپەكتىلەرىنە قاتىستى وزەكتى تاقىرىپتار بويىنشا بايانداما جاسادى.